སྒྲོམ་ཅོག་སྟེང་གི་ཇ་ཕོར་བ་གང་དང་དཔེ་དེབ།

གཡུ་སྒྲོན་འཚོས་ཁྱུར་མིད་གཏོང་ཐུབ་པའི་མིག་ཆུ།

མལ་ཁྲིའི་སྒང་ལ་ལྷུང་བའི་ཚེ་སྲོག་གི་གྲངས་ཀ

ལག་པ་དང་བྲང་གཞུང་ནས་ཡང་ཡང་བསྒུལ་པས།

སྒྱུ་མའི་གར་ལ་རྩེན་པའི་འོད་ཀྱི་གཤོག་པར་བྲིས།

ཕྱི་རོལ་དུ་ཙག་རླུང་གིས་མི་སེམས་དཀྲུགས་པ།

སྦལ་ཆུང་གྲོག་ཚང་ལས་ཉལ་བའི་ཟློས་གར།

སེང་རས་སྲབ་མོ་གྱོན་པའི་འབུ་ཕྱེ་མ་ལེབ།

སེམས་པའི་སྐྱོ་གླུ་ལེན་པའི་སྒྲ་སྒམ་ཆག་རོ།

རླུང་གི་ཁ་ནང་གི་མཆེ་བ་དང་ང་ཡི་ཁ་མཆུ།

རུས་པའི་རྐང་ལ་ཟུག་པའི་རྡུལ་གྱི་མེ་ལྕེ་དེའོ།

ཁྱོད་ཀྱི་མིག་དང་ཉན་བྱེད་ཀྱི་རྣ།

སེམས་པ་འདི་དུམ་བུ་བརྒྱ་རུ་བགོས།

རྡོ་བ་དེ་རྐང་ཆུང་ལ་དལ་མོར་རེག

ཡང་ཞིང་ཡང་བའི་ཉི་ཐིག་དེ་བཅོམ་པར་གནས།

ས་བོན་ལས་འཕེལ་གྲིབ་བྱུང་བའི་ནས་འབྲུ།

མི་དང་ཚེ་སྲོག་ཡོད་དོ་ཅོག་ལ་གསོན་ཤུགས་སྦྱིན།

སྙིང་ཉེ་བའི་ང་ཡི་སྙན་ངག

ཚེར་མའི་རས་ལྭ་གྱོན་པའི་བུ་མོ་གཅེར་བུ།

བསེ་རུའི་བ་སྤུ་གཟེངས་བའི་ཚི་གུ་བྲོ་བ།

སྟག་སེང་ཁ་སྤྲོད་འཁྱུད་པའི་བང་བའི་རི་མོ།