སང་ཉིན་ཡུལ་ལ་ལོག

དར་རྩེ་མདོ་དང་གྱེས་ནས།

ཁ་སང་།

ཤ་བསྲེགས་ཀྱི་དྲི་ངད་ངན་པ་ཁྱབ་པའི་བསྲེགས་ཟས་ཁང་དང་།

གློག་དམར་གཡོ་འཁྱུག་བྱེད་སའི་དར་མདོའི་སྐོར་བྲོ་རུ།

གོ་རིམ་མེད་པའི་ངང་ནས་སྒྲིག་ཡོད་པའི་ཆང་དམ་བེ་མང་།

གར་སྟེགས་ཆུང་ཆུང་ཞིག

རང་ཉིད་ཀྱི་འཇིག་རྟེན་དུ་སྒོམ་པའི།

ན་གཞོན་གླུ་བ་ཆུང་ཆུང་དེ་དག་གིས།

དམངས་གླུ་ཐུང་ཐུང་སེམས་ཀྱིས་དབྱངས་སུ་ལེན།

ཆང་ཁང་མིན་པའི་གྲུ་ག་རུ།

ཆང་གིས་བཟི་བའི་གཞོན་ནུ་སྐོར་ཞིག

བཟི་གཏམ་འར་འུར་བརྡོལ་ནས།

སེམས་དམར་པོ་ཕྱི་ལ་མངོན་འདུག

ཨོ།

ཁོ་ཚོ་བཟི་ཡོད་པ་བདེན།

ཡིན་ཡང་བཟི་སོང་བའི་ཁོ་ཚོ།

གཞན་ལ་སྤྲུལ་པ་ཞིག་མིན་པར།

ངེས་པ་དོན་གྱི་རང་ཉིད་དངོས་དེ་རེད་འདུག

ཚིག་ཇ་ཁང་དེ་རུ།

བུ་མོ་སེམས་ཆུང་དེས།

བསམ་གཞིགས་ཀྱི་བས་མཐའ་ནས།

དྲན་འཁྲུལ་ཡོད་ཚད་ཕྱི་རུ་འཆད་མ་ཐུབ་པས།

ཚིག་ཇ་ཁང་ནས་མགྲོན་ཁང་ལ་ལོག་དུས།

དབང་མེད་དུ་མིག་ཆུ་ཤོར།

སྐབས་དེར།

མོས་མོ་རང་ཉིད་བོར་སོང་མོད།

ཡིན་ཡང་།

མོའི་མིག་ཆུ་དེ་སུས་ཀྱང་མ་རྟོགས།

ཐ་ན་མོ་རང་ཉིད་ཀྱིས་ཀྱང་མིག་ཆུ་འཁྱག་པ་དེར་འགྲེལ་ཐབས་བྲལ།

དར་རྩེ་མདོ།

གྲང་བའི་སྣང་བས་བཟི་བའི་ཕོ་བྲང་ཁྲ་ཁྲ་ཞིག་དང་།

རྟག་པར།

གཞོན་སེམས་མནར་ཞིང་།

དངོས་ཡོད་ལ་འཐམ་པའི་རྨི་ལམ་སྦྲུམ་པའི་མ་ཡུམ་ཞིག