ས་ཡུལ་ཤུལ། གནམ་ཡུལ་ཤུལ།

རིག་སྨོན་དཀོན་མཆོག(དཀར་མཛེས) 2017-09-06

4.14ཡུལ་ཤུལ་ས་ཡོམ་ཆེན་མོའི་དུས་དྲན་ལ།

ཞོགས་པ་དེ་ནི་ནམ་རྒྱུན་གྱི་ཞོགས་པ་དང་གཏན་ནས་མི་འདྲ།

ཤེས་ཚོར་མེད་པའི་ས་ཆེན་གྱི་ཆག་འཇིག་དེས།

གཅེས་སུ་འོས་པའི་ཚེ་སྲོག་མང་པོ་ཞིག་གློ་བུར་དུ་ཁྱུར་མིད་བཏང་སོང་།

ཨ་ཤུ་རེ། ས་ཡུལ་ཤུལ། གནམ་ཡུལ་ཤུལ།

ཁ་སང་། གནས་འདི་ནི་སྐལ་བཟང་མེ་ཏོག་གི་འདབ་མ་ལྷུག་ལྷུག་གྲོལ་སའི་རྩྭ་ཐང་དང་།

ཅང་ཤེས་རྟ་ཕོ་ཡི་གོམ་སྒྲ་བང་གིས་འགྲན་སའི་བྱང་ཐང་།

རྨ་རྫ་འབྲི་གསུམ་གྱི་ཆུ་མོ་ཤག་ཤག་རྒྱུ་སའི་ཡིད་འོང་གི་ཕ་ས་ལགས་ཀྱང་།

དུས་དེ་རིང་། བེམ་པོ་དང་མཆོད་མེ།

མིག་ཆུ་དང་ངུ་འབོད།

དྭ་ཕྲུག་བྱིས་པ། བདག་མེད་རྒན་རྒོན།

བྱ་ཁྱུ་བོར་བའི་བྱེའུ་ཆུང་བཞིན།

ཁེར་རྐྱང་གི་ལམ་ཕྲན་བརྒྱུད་ནས་འགྲོ་དགོས་བྱུང་།

སུ་ཡི་སེམས་ནའང་ཡལ་ཐབས་མེད་པའི་ཕ་ས་གོར་མོ་འདི་ལ།

ས་ཆེན་པོས་རྩེད་མོ་ཐེངས་གཅིག་གིས།

ང་ཚོའི་ལུས་སེམས་གཉིས་ཀར་རྨ་ཁ་ཚབས་ཆེན་བཟོས་ན་ཡང་།

སྙིང་དུ་སྡུག་པའི་ཤ་རུས་སྤུན་ཟླ་དག་གི་གཟི་བརྗིད་ཀྱི་བློ་སྤོབས་མཐོང་ཚེ།

ཁྱེད་ཉིད་ཡང་བསྐྱར་མགོ་བོ་དགྱེ་ཆོག་ཨང་།

ང་ཡི་ཡུལ་ཤུལ་བ།

སང་ཉིན་ནས་བཟུང་།

ཁྱེད་ཀྱི་འདས་སོང་ཡོད་ཚད།

ལོ་རྒྱུས་དེབ་ཐེར་གང་ཞིག་ཏུ་གསལ་བོར་བཀོད་ན་ཡང་།

གསོས་ཀྱང་སོས་ཐབས་བྲལ་བའི་སེམས་ཀྱི་རྨ་ཁ་ཆེན་པོ་དེ།

དུས་ཡུན་ག་ཙམ་ཞིག་ལ།

ན་ཟུག་གིས་བསྐྱོར་དགོས་ཨང་།

ས་ཡུལ་ཤུལ། གནམ་ཡུལ་ཤུལ།

ཡང་བསྐྱར་མི་ཡུལ་ལ་སྨོན་ལམ་ཐེངས་གཅིག་གནོངས་དང་།

ཕ་ས་གོར་མོ་འདིས།

ཁྱེད་ཕྱོགས་ལ་འཕྲེང་སེམས་ཡང་ཡང་གནང་གིན་འདུག