མཁུར་ཚོས་དམར་པོའི་འབྲོག་མོ།།

ཟམ་སྣེ་བརྒྱུད་ནས་ཡོང་དུས།།

ཚེ་གྲོགས་ཨེ་ཡིན་བསམ་ནས།།

ཟུར་མིག་ལན་གཅིག་འཕངས་པས།།

དོགས་པ་ཟ་བའི་ཟོལ་གྱིས།།

འཛུམ་ཁ་ཅུང་ཙམ་གྲོལ་སོང་།།

ལུས་དྲི་བཅོས་མ་མིན་པའི།།

འོ་དྲི་ཐུལ་བའི་འབྲོག་མོ།།

ང་ལ་བཅར་ནས་ཐོན་དུས།།

སྐྱེ་གཟུགས་ཡག་པའི་སྐྱེས་མ།།

རུས་པའི་རྐང་ལ་ཟུག་སོང་།།

དུངས་བའི་འཛུམ་ཁ་གྲོལ་སོང་།།

ཆུ་བོ་མར་འགྲོ་ཞིག་ལ།།

རླུང་རྟ་ཡར་འགྲོ་མེད་པས།།

གཞོན་ཤ་རྒྱས་པའི་འབྲོག་མོ།།

ལྡེམ་ལྡེམ་འགྲོས་གྱིས་བུད་སོང་།།

དགའ་མ་མེད་པའི་བུ་ང་།།

ད་དུང་ཁེར་རྐྱང་ཡིན་ནོ།།