མཚན་མོ་དེའི་སྐར་འོད་མིག་ལ་འཚེར་ཞིང་།

ཡབ་ཆེན་གྱི་ཁ་བརྡ་སྙིང་ལ་བཅངས་ནས།

མཐོ་སྒང་གི་རྨི་ལམ་སེམས་ན་སྦྲུམ་ཡོད།

ཁྱེད་རང་ནི་ང་ཚོའི་སེམས་ཀྱི་ཉི་མ།

མཐོ་སྒང་གི་རྒྱལ་མཚན་ནུབ་མེད་དེ་ཡིན།

ཨ།    ངའི་བློ་ཡུལ་གྱི་དྲིན་ཆེན་ཕ་ལོ།

ནམ་ཟླ་དེའི་མཛེས་སྡུག་སྙིང་ལ་འཁྲུངས་ཤིང་།

ཡབ་ཆེན་གྱི་བརྩེ་བ་དྲག་ལ་བཅོལ་ནས།

ཕ་ཁྱིམ་དེའི་མཛེས་པ་སེམས་ལ་ཉར་ཡོད།

ཁྱེད་རང་ནི་སེམས་ཀྱི་དཔྱིད་དཔལ་དེ་ཡིན།

གངས་རི་ལ་ཤར་བའི་ཉི་མ་དྲོན་པོ།

ཨ།   ངའི་བློ་ཡུལ་གྱི་དྲིན་ཆེན་ཕ་ལོ།

རྐང་འོག་གི་ལམ་བུ་རྡོག་པས་མནན་ཞིང་།

ཡབ་ཆེན་གྱི་རྔུལ་ཆུ་སེམས་ལ་ཐོར་སོང་།

ཕ་ཡུལ་གྱི་གངས་རི་ཆུ་བོ་བརྒལ་ནས།

ཡབ་ཆེན་གྱི་མིག་ཆུའི་ཁྲོད་ནས་ཆས་ཡོད།

ཁྱེད་ཉིད་ནི་ངའི་སེམས་ཁོང་ནས་འཕུར་བའི་རྒོད་པོ།

ཨ།   ངའི་བློ་ཡུལ་གྱི་དྲིན་ཆེན་ཕ་ལོ།