སྦྲ་སྲས་གངས་བུ་འཛུམ་གྲོལ། 2020-05-06
འཛུམ་དཀར་མེ་ཏོག་ལྟ་བུའི་དགོད་པའི་འཛུམ།།
འཛུམ་ཞལ་བྱམས་སྐྱོང་བདུད་རྩིའི་ཆབ་རྒྱུན་བྱིན།།
བྱིན་རླབས་འོད་སྣང་ལང་ཚོའི་འདབ་ལག་རྒྱས།།
རྒྱས་པའི་ལྷག་བསམ་དྲོད་ཀྱིས་བསྐྱངས་པའི་མ།།
ལྷག་བསམ་ཆུ་འཛིན་དཀར་བོའི་ཕོ་བྲང་ན།།
འཛུམ་དཀར་ལྷད་མེད་འོ་མའི་རང་མདངས་ཡོད།།
གསེར་མདོག་ཉི་ཟླའི་འོད་སྣང་དཀར་པོ་འདིས།།
ང་དང་མིང་སྲིང་ཡོངས་ལ་རེ་བ་བསྩལ།།
དགེ་བཅུའི་དཔྱིད་དཔལ་དར་བའི་ཕ་ཡུལ་ན།།
ཞི་བདེ་དབྱངས་རྟ་བཀུག་པའི་མགྲིན་བཟང་སྐྱིད།།
རྩྭ་ཐང་མེ་ཏོག་སྣ་བརྒྱའི་དྲི་བསུང་ཁྱབ།།
སྦྲ་ནག་གྲུ་བཞི་ནང་གི་འབྲོག་མོ་སྐྱིད།།
རྟ་ནོར་ལུག་གི་འཕེལ་ཁ་ཁྱོད་ལས་ཚོར།།
སྙིང་རྗེས་ཡིག་དྲུག་མགུར་མ་ཁྱོད་ནས་རྙེད།།
དུང་སེམས་བརྩེ་བ་གསོན་པོའི་མ་ལོ་ལགས།།
གཞིས་ཁྱིམ་གཡང་གི་བདག་མོ་ཁྱོད་རང་ཡིན།།
བསོད་ནམས་ཞིང་ལ་དགེ་བའི་ས་བོན་འདི།།
ཚེ་རབས་རྟེན་བཟང་སྨིན་པའི་བཀྲ་ཤིས་ཡིན།།
བརྩེ་བའི་ཚིག་གསུམ་ཤར་མར་བྲིས་ན་ཡང་།།
དྲིན་ཆེན་ཨ་མའི་དྲིན་ལན་མཚོན་ཐབས་བྲལ།།
ལྷད་མེད་བརྩེ་བ་འཇམ་པའི་ཨ་མ་ལགས།།
དཀར་གསལ་དུང་གི་ཟླ་བ་ཁྱོད་རང་ཡིན།།
མ་རིག་སྲིད་པའི་སྣང་བའི་སྒྲོན་མེ་ཡིན།།
ལག་ཟུང་ཐལ་མོ་སྦྱར་ནས་ཕྱག་གསུམ་འཚལ།།
བརྩེ་བ་དྭངས་གསལ་གྱི་མཚོ་མོ།།
དུང་བའི་བུམ་ཆུང་འདི་དཀར་པོ།།
བྱམས་དང་སྙིང་རྗེ་ཡི་བདག་མོ།།
བཀའ་དྲིན་རི་རབ་ཀྱི་མ་ལོ།།
ལྷད་མེད་བློ་དཀར་གྱི་ཨ་མ།།
འཛུམ་དཀར་བརྩེ་བ་ཡི་ལག་ཟུང་།།
འཚོ་བའི་གཡང་རྟེན་འདི་ཁྱོད་ཡིན།།
སེམས་ཀྱི་དྲོད་ཐིག་འདི་ཁྱོད་ཡིན།།
གཡུ་བྱུར་མུ་ཏིག་གི་མཛེས་རྒྱན།།
ངོ་མཚར་མཛེས་སྡུག་གི་སྒེག་མཉམ།།
གསོམ་དཀར་བཞོ་ཟེའུ་འདི་བཟུང་ནས།།
དགོ་དགོ་དབྱངས་རྟ་འདི་སྐྱིད་པ།།
བརྩེ་ལྡན་ལྷ་མོ་འདི་ཁྱོད་ཡིན།།
རིག་པའི་བདུད་རྩི་འདི་ཁྱོད་ཡིན།།
འཚོ་བའི་རྨི་ལམ་འདི་ཁྱོད།།
གཡང་གི་སྒོ་མོ་འདི་ཁྱོད་ཡིན།།
རྩོམ་གསར། 10