བྱེའུ་ཆུང་གཤོག་ཁྲ་ཞིག་ཁང་བའི་བད་ཀར་ཡིབས་ནས།།

འཇིག་རྟེན་སྐྱིད་སྡུག་གི་མངར་སྐྱུར་རེས་མོས་མྱོང་ཞིང་།།

ཡུལ་དྲུག་མེ་ཏོག་གི་རྒུམ་བུ་མཉམ་དུ་རོལ་དུས།།

དྲུག་པའི་ཆར་ཟིམ་འདི་ཁྱོད་ཀྱི་ལོངས་སྤྱོད་ཡིན་ཨང་།།

ནམ་ཞིག་ང་རང་ནི་ཚེ་ཡི་འཕེན་པ་གཏོང་དུས།།

དུར་སའི་ཞིང་ཁམས་སུ་རྡོ་དང་ཤིང་གིས་སྟོང་སྟེ།།

དྲུག་པའི་ཆར་ཟིམ་དང་ཡང་ན་ཁ་བ་མཉམ་དུ།།

སྦས་དགོས་ལུང་བསྟན་འདི་རང་གིས་རང་ལ་བརྒྱབ་ཡོད།།

ཆར་གདུགས་སེར་པོ་ཡི་རི་མོ་གསལ་མ་ནོག་རེད།།

སྟེང་གི་ཐིགས་སྒྲའང་རྣ་བའི་བཅུད་དུ་ལེན་ཞིང་།།

ལག་པ་ལག་པ་རུ་འཁྲིལ་བའི་དུས་ཤིག་ཡོད་ན།།

དྲུག་པའི་ཆར་བ་འདི་འུ་གཉིས་སྐལ་བ་ཡིན་བཞག །

སྟོང་ཉིད་ཀྱི་རབ་བྱེད།

སྟོང་པས་སྟོང་ཉིད་སྟོང་བ་དང་།།

སྟོང་པའི་རྩེ་རུ་ཆོས་རྣམས་གཡོ།།

ཆོས་ཉིད་སྟེང་དུ་སྟོང་བ་འཁྱིལ།།

ཐུབ་པས་གསེར་གྱི་ལོ་མའི་རྩེར།།

གཉུག་མའི་འོད་ཟེར་འབྲི་བར་བྱེད།།

ཕྱེ་ལེབ་གཤོག་པའི་མཁར་ཐོག་ཏུ།།

སྐྱེ་མཆེད་ཚོགས་ཀྱིས་ཕྱི་ནས་སྟོང་།།

བུང་བ་དག་ཀྱང་དར་དིར་གྱིས།།

གྲགས་སྟོང་བརྗོད་བྲལ་ངང་ནས་སྟོང་།།

ལ་ཁའི་ཉི་མ་ཞུ་བ་དང་།།

གྱང་གི་གྲིབ་སོ་གཡོ་བ་དང་།།

གྱང་ཁའི་རྩྭ་སྐྱ་ལྡིང་བ་དང་།།

གཞུང་གི་ཆུ་བོ་བྲི་བ་སོགས།།

གདོད་མའི་རང་གཤིས་འདི་ཀོ་འོ།།

དམར་སེར་སྡེ་ཡི་ཚོགས་དག་གིས།།

ཡེ་དག་སྟོང་ཉིད་འཐུང་ཞིང་ངོམས།།

དེ་དུས་ཐུབ་པ་གསེར་མདོག་ཅན།།

དེ་ལ་འཛུམ་པའི་འོད་ཟེར་འཕྲོ།།

གཙུག་ལག་ཁང་ནས་ཕྱིར་མིག་ཤོར་བ།

སྣང་བའི་སྟེང་གི་ཁྲག་ཐིགས་ནི།།

ཁྱེད་ལ་འཕོས་པའི་མེ་ཏོག་ཡིན།།

སེམས་ཀྱི་ལོ་མ་ལྗང་ཁུ་འདི།།

ལྕང་མའི་རྩེ་ནས་ཞབས་བྲོ་འཁྲབ།།

མིག་གི་བུང་བ་ཁྲ་མོ་འདིས།།

ཟུར་མིག་ཅན་ཞིག་འཚོལ་བར་བྱེད།།

ཆོས་ཀྱི་བསྐྱེད་པའི་དུང་སྒྲས་ནི།།

ཏིང་ངེ་འཛིན་ལ་སྐུལ་བར་བྱེད།།

རྨི་ལམ་སེར་པོའི་ཕྱེད་ཀ་དེ།།

བདག་མེད་ཅིག་ལ་སྒོམ་ན་ཡང་།།

བག་ཆགས་སྐུད་པ་ཕྲ་མོ་འདིས།།

ཁྱེད་ལ་མཐུད་ནས་གོམ་ཁ་ལྷོད།།

རྒྱུད་བཟང་གཤིས་ཡག་ལྷ་མོ་ཞིག །

གཤོག་པ་ཐོགས་ནས་སེམས་ནང་འཛུལ།།

དུང་ཁ་གདོད་མར་རྒྱ་ཞིག་འདེབས།།

མི་འགྱུར་ཞོ་འཐུང་རུས་སུ་སྦྲུམ།།

འཁོར་བའི་བྱེ་མ་ལ་ཆེན་དུ།།

འོད་ཀྱི་རི་མོ་ཉག་ཅིག་འབྲི།།

སྡིག་སྒྲིབ་ཀྱི་རྔུལ་ཆུ།

ཁྱེད་ནི་མེ་ཏོག་གི་བར་ནས་དགོད་ཀྱིན་པ།།

ང་ནི་བྱེ་མ་ཡི་ནང་ནས་ནུར་འགྲོས་བྱས།།

ཆར་ཆུ་ཐིགས་པ་གཅིག་ལ་མི་རེ་ཁྱེད་ཀྱི་གྲིབ་མ་གནོངས་ཤོག །

ཕན་དང་མི་ཕན་མི་དོགས་བདག་ལ་ཁྱེད་ཀྱི་དངོས་གྲུབ་སྩོལ་རོགས།

སྟོད་ཉི་མའི་གྲོང་གི་ཚ་བ།།

གཟུགས་སྐྱ་མོའི་སྟེང་གི་རྔུལ་ཆུ།།

ཟླ་བ་སྒྲོལ་མ།། བསིལ་བསིལ་གནོངས་དང་།།