མཁར་རྫོང་མཐོན་པོའི་རྩིག་པར།

རྨི་ལམ་གྱི་ཁ་ཏས་ཚང་བཟོས།

མི་དེ། མེ་ལོང་གི་ཕ་རོལ་ན།

རི་བོ་དེའི་ཚུལ་རོལ་ན།

ཀ་གདུང་མེད་པའི་རྡོ་ཁང་གྲུ་བཞིའི་ནང་།

སུ་ཞིག་གིས་གློ་མཆིན་བརྡར་ཞིང་།

རླངས་པ་ཐོལ་ཐོལ་གྱི་ཁ་ཟས་བསླངས།

ཟུམ་པར་དཀའ་བའི་མིག་སྐྱིབས་མཐའི་དངུལ་གྱི་ལོ་མ།

དུས་ཚིགས་འདིའི་རླུང་ནང་གི་རྡུལ་གྱི་ས་བོན་བཞིན།

ལྕུག་ཕྲན་ལྡེམ་ལྡེམ་གྱི་ལྗང་ལོའི་རྩེ་རུ་འཕྱོ།

རྨི་ལམ་ནི་རྫོགས་མཐའ་མེད་པའི་ལམ་གྱི་ཉི་འོད།

ཉི་འོད་ལམ་ལམ་འཚེར་བའི་འབྲོག་སྡེའི་རྩྭ་ཐང་།

སྦྲ་ནང་དྲོད་ཀྱིས་ཁེངས་པའི་ཐབ་ཀྱི་མེ་ལྕེ།

ཕ་མར་འོ་ཇ་འདྲེན་པའི་བོད་ཀྱི་བུ་མོ།

གཡང་དཀར་ལུག་ཁྱུའི་མཐའ་ན་འཇོལ་ལེ་འཇོལ་ལེ།

འཛུམ་དཀར་པད་མ་གྲོལ་འདྲའི་མཆུ་ཡི་འདབ་མར།

འབྲི་མོའི་འོ་དྲི་མངར་མོ་ཐ་ལི་ཐུལ་ལེ།

གནའ་གཏམ་ཉན་པར་སྤྲོ་བའི་བོད་ཀྱི་བྱིས་པ།

སྐར་མ་ཚབ་ཚུབ་ཤར་རིའི་རྩེ་ནས་འཕུར་ཡོང་།

སྲུང་སྐུད་དར་གྱི་མདུད་པས་དམ་ལ་བཏགས་པའི།

ཤིང་ཕོར་མགོ་བསེད་ཅན་པོ་སྙིང་རྩར་བརྡབས་པའི།

ཡིད་ལ་ཡོད་ཡོད་འདྲ་ཡང་མེད་པར་སྣང་བའི།

ཚོར་བའི་ལྡེམ་ཤུགས་སྣ་ཚོགས།

མངོན་ལྐོག་གཉིས་ཀྱི་བར་ན།

ཉིན་མོར་སྤྲིན་དཀར་ཐར་ཐོར།

མཚན་མོར་ཆར་ནག་རྡོག་རྡོག

མདང་ནུབ་རྨི་ལམ་ཇི་བཞིན།

སྐྱ་ཐེར་ཐེར་གྱི་བྱང་ཐང་ངམ།

སྐྱོ་ལྷང་ལྷང་གི་གར་སྟེགས་འདི།

སུ་ཞིག་གིས་ང་ལ་བཞག་པའི།

གྱང་ངོས་ཀྱི་དུས་ཚོད་རལ་བོ་ལྟར།

ཁྲོག་ཁྲོག་ཏུ་འཁོར་ཞིང་ཆག་གམ།

རྨི་ལམ་བོར་བའི་མཚན་མོ་གྲངས་མེད་ལ།

གློག་ཆད་པས་རྣམ་ཤེས་བོར་བ་ལྟར།

ཐོག་བརྒྱབ་སྟེ་སྲོག་སྐུད་ཆད་པ་ལྟར།

ཁང་ཀླད་ཀྱི་གནམ་ཁུང་བརྡིབས་ཏེ།

བསམ་མེད་གྱི་རྒན་པོ་འགྱེལ་ཏེ།

ཡུལ་གྱར་བའི་མགྲོན་པོ་སུ་དང་གང་།

ལོ་དང་ཟླ་བ་སྟོང་ནས།

སེམས་དང་བསམ་པར་འགལ་ནས།

འཁྱག་ཤིད་ཤིད་ཀྱི་རྐང་ལག་འདར་སིག་སིག

གངས་དཀར་སྔུན་དུ་ཡུན་གྱིས་བརྐྱངས་རུང་།

སྣོད་བཅུད་ཆགས་ཀྱང་འཇིག་ལ་འཇིག་ཀྱང་ཆགས།

རྨི་ལམ་ལ་གཤོག་པ་ཐོགས་ན།

འཇིག་རྟེན་གྱི་མཁའ་དབྱིངས་སུ་སྤུར་འདོད།

འཚོ་བ་ནི་རི་རྩེ་རུ་འགྲེང་བའི་དར་ལྕོག་བཞིན།

འཛིན་རྒྱུ་མེད་པའི་རླུང་ཁ་རུ་ཟད་པར་བྱ།