རྐང་ཚའི་ཆོས་བཟང་། 2017-02-27
གནམ་ལོ་གསར་བའི་སྐྱ་རེངས་དང་འགྲོག་སྟེ།།
ཆོལ་གསུམ་ཆོས་རིག་དར་བའི་ཞིང་ཁམས་ལ།།
ཁ་གཡང་བཀྲ་ཤིས་བདེ་ལེགས་འབྱུང་བ་ཡི།།
ཤིས་ཚིག་དྲི་མེད་ཁ་བཏགས་ཡུག་གཅིག་འབུལ།།
གནམ་ལོ་གསར་བ་མེ་མོ་བྱ་ཡིས་ཚེས།།
ལྷ་བྱ་དཀར་མོ་སྲིད་པའི་ལྗོངས་ལ་བྱོན།།
ཞི་བདེའི་འབོད་སྒྲ་ཁ་བའི་ཡུལ་ལ་བསྒྲགས།།
ཆོལ་གསུམ་བོད་ལ་སྐྱིད་པའི་ཉི་མ་ཤར།།
ཁྲི་གཤོག་མཚོ་མོའི་རླབས་སྒྲ་དགུང་ལ་རྩེན།།
བྱ་ཁྱུ་དཀར་པོའི་གཤོག་རྡང་གར་ལ་བསྒྱུར།།
ཕུན་ཚོགས་ཕྱྭ་གཡང་ཀླུ་རྒྱལ་མཛོད་ལས་དྲངས།།
གནམ་ལོ་གསར་བར་བདེ་སྐྱིད་དཔལ་ཡོན་བསུ།།
འཛམ་གླིང་ཞི་བདེ་མི་མཐུན་རྒོལ་བ་འཇོམས།།
ཚན་རྩལ་ཡར་རྒྱས་རྣམ་པ་གསར་བ་བསྐྲུན།།
སློབ་གསོ་གོང་འཕེལ་མ་རིག་མུན་པ་སེལ།།
གནམ་ལོ་གསར་བར་རེ་བའི་ཤིས་ཚིག་བྲི།།
དཔལ་ལྡན་བླ་མའི་འཕྲིན་ལས་རྒྱས་པ་དང་།།
ཆོས་བྱེད་སྐྱེས་བུར་བར་ཆད་མི་འབྱུང་བའི།།
མཐུན་རྐྱེན་བསོད་ནམས་དཔལ་དང་འབྱོར་བ་ཡི།།
དབུ་འཕང་ཡར་ལ་འདེགས་པའི་ཤིས་པ་སྩོལ།།
ཡ་རབས་མེས་པོའི་གཤིས་བཟང་སྤེལ་བ་དང་།།
སྟོབས་འབྱོར་རིགས་རྒྱུད་ཁོ་ལག་རྫོགས་པ་ཡི།།
དགེ་མཚན་འབུམ་གྱི་རླུང་རྟའི་དར་པོ་ཆེ།།
མི་ནུབ་བསྒྲེང་ལ་སྤོབས་པའི་དཔལ་གཡང་ཁུགས།།
ལས་ལ་ནད་མེད་བདེ་སྐྱིད་འབྱུང་བ་དང་།།
ཡིད་ལ་གང་དྲན་བསམ་དོན་འགྲུབ་པ་ཡི།།
རེ་བའི་སྨོན་ལམ་མ་ལུས་ཡོངས་རྫོགས་ཏེ།།
ལེགས་ཚོགས་གསར་བའི་དཔལ་ཡོན་རྒྱས་གྱུར་ཅིག།
གངས་ཅན་བོད་མིའི་བསོད་ནམས་ཡར་ངོའི་ཟླ།།
གོང་ནས་གོང་འཕེལ་ཚེ་དཔལ་སྟོབས་འབྱོར་དར།།
སྙན་གྲགས་འདོད་དགུའི་ལོངས་སྤྱོད་མ་ལུས་པ།།
གནམ་ལོ་གསར་བར་ལྷུན་གྱིས་འགྲུབ་པར་ཤོག།
རྩོམ་གསར། 10