ཤེལ་དཀར་པོ། 2019-12-23
༡
ཀ་དག་དབྱིངས་ཀྱི་འཇའ་གུར་མཛེས་པའི་ལྡིང་ཁང་ན།།
ཀ་ལ་པིང་ཀའི་མགྲིན་དབྱངས་སྙན་མོ་ཟིལ་གནོན་པའི།།
ཀ་དག་གདངས་སྙན་རྒྱུད་མངས་ཐོགས་པའི་མཚོ་བྱུང་མས།།
ཀ་མེད་སེམས་ཀྱི་ཀྱོ་བ་བཀུགས་པས་ཕྱག་འཚལ་ལོ།།
༢
ཁ་བ་འབྲོག་པའི་འཚོ་བ་སྐྱིད་པོ་བདེ་དགའ་ཅན།།
ཁ་རྗེ་དབང་ཐང་ཡར་ངོའི་ཚེས་བཅུའི་དུང་ཟླ་འཕེལ།།
ཁ་བའི་ལྗོངས་ཀྱི་སྣོད་བཅུད་མཛེས་པའི་རེ་ཁཱ་དེ།།
ཁ་བ་འདྲ་བའི་ཤོག་དཀར་ལེབ་མོའི་རྒྱན་དུ་འགོད།།
༣
ག་སར་མེད་པའི་གངས་རིས་བསྐོར་བའི་དག་ཞིང་གི།
ག་ཐག་བསླད་མེད་སྔོ་བསངས་བུ་མོའི་རང་མདངས་ལ།།
ག་ལེར་བསྐྱོམས་པའི་སྤྲིན་པ་དཀར་བོའི་ལྷན་པ་མེད།།
ག་དུས་བལྟས་ཀྱང་གཡའ་དག་མངའ་བས་ཀྱེ་མ་ཧོ།།
ང་རྒྱལ་མགོ་བོ་མཁའ་ལ་ཟུག་ནས་རྟག་བརྟན་འགྱིང་།།
ང་ཆེ་ང་བཙན་དོན་ལ་གནས་བའི་དཔའ་ཡོན་ཅན།།
ང་ར་བཙན་པོའི་གངས་རི་དཀར་བོའི་སོ་ཕྲེང་དེ།།
ང་ཡི་གོ་ལའི་གཙུག་ཏོར་མཛེས་པའི་ཅོན་པན་ཉིད།།
ཅ་རེ་ཉ་རེས་ལྡིང་ལ་རྩེན་པའི་ཕྱེ་ལེབ་དང་།།
ཅ་ཅོ་རང་སྒྲོག་གཡུ་སྦྲང་གཞོན་ནུའི་གར་གྱི་སྟེགས།།
ཅ་རེར་མེ་ཏོག་ཕྲ་རྒྱན་བཏབ་པའི་ནེའུ་གསིང་ཁྱོན།།
ཅ་གེར་གནས་པའི་འཆི་མེད་ལམ་དང་གཉིས་སུ་མེད།།
ཆ༵་ཡོད་གངས་ལས་བརྡོལ་བའི་ཡན་ལག་བརྒྱད་ལྡན་ཆུ།།
ཆ༵་མེད་བཞུད་པའི་གཞན་ཕན་མངའ་བའི་དཀའ་ཐུབ་པ།།
ཆ༵་ཆོར་རྒྱུ་ཡང་སེམས་ཅན་སྐྱེ་དངོས་མ་ལུས་ལ།།
ཆ་ཚང་སྐོམ་གྱི་གདུང་བ་འཇོམས་པའི་བདུད་རྩི་མཆོག།
ཇ་དང་འོ་མ་དབྱར་གྱི་ཆུ་གཏེར་རྒྱས་ལ་འཁྲུལ།།
ཇ་ཐུད་མར་གསུམ་རི་བོ་ཞིག་གི་གཏོས་དང་མཉམ།།
ཇ་སོགས་ཟས་ཀྱི་འཕེལ་ཁ་སྐྱེན་པའི་རྟེན་འབྲེལ་ལ།།
ཇ་ཕུད་མཆོད་ཀྱི་བཀྲ་ཤིས་བརྟན་པའི་སྨོན་ལམ་སྤུར།།
ཉ་རྒྱས་ཟླ་བཞིན་ནོར་འཛིན་གོར་མའི་གདན་ཡངས་ན།།
ཉ་ར་མིན་པར་ལག་ཟུང་རྩལ་གྱིས་ལེགས་བཏབ་པའི།།
ཉ་ཞའི་མེས་པོས་བསྐྱངས་བའི་སྦྲ་ཁྱིམ་སྨུག་པོ་དེ།།
ཉ་ཉུང་བག་ཡངས་ངང་ནས་འགྱིང་བ་ཡི་གར་འོང་།།
ཏ་ག་རཾ་ཡི་དྲི་བསུང་ཕྱོགས་བཅུར་མཆེད་པ་ཡིས།།
ཏ་ཛིན་འགྲོ་བའི་དྲི་འཛིན་མ་ལུས་བཟི་བྱས་བས།།
ཏ་ཐཱ་ག་ཏའི་བསྟན་པའི་ཞིང་ཞེས་མིང་མཚུངས་བའི།།
ཏ་མ་བཱན་གྱི་གནས་མཆོག་ཨེ་མ་རྨད་དུ་བྱུང་།།
ཐ་གིར་སྦྲང་ཆར་སིལ་མས་ཁྲུས་བཟང་བགྱིས་བ་ཡི།།
ཐ་མདོག་རྡུལ་ཀུན་བྲལ་བའི་རི་ལུང་མཛེས་པོ་ལ།།
ཐ་བྲལ་མདངས་ལྡན་དབང་གཞུའི་རི་མོ་རབ་དཔྱངས་པས།།
ཐ་མའི་དུས་ཀྱི་མིག་དབང་འཛུམ་པའི་སུམ་རྩེན་གནས།།
ད་གོང་རང་བྱུང་འབྱུང་བཞིས་ལེགས་པར་བཏབ་པ་ཡི།།
ད་བར་ཚང་ཚིང་གཡུ་ལོ་ཐགས་སུ་བཀྲ་བ་འདི།།
ད་ལྟའི་རྫས་ཀྱི་ལྗོན་པས་འགྲན་པར་མ་ནུས་པའི།།
ད་ཆའི་འཇིག་རྟེན་བརྒྱན་པའི་སྒེག་ཆོས་གཅིག་པུ་ཉིད།།
ན་ཀྲའི་གྲོང་ཁྱེར་སྔོན་པོའི་མདངས་འཛིན་མཁའ་འོག་གི།
ན་བུན་ཀཻ་ལ་ཤ་རྩེར་བག་ཡངས་འཁྱུད་པ་ཡི།།
ན་རམ་རྫུབས་པོར་འཁྲུགས་པའི་བསིལ་ལྡན་གོ་ལའི་ཏོག།
ན་ཚོད་བགྲང་བྱ་སྟོང་གི་ཞིང་ཁམས་ཡ་མེད་དོ།།
༤
པ་སངས་མདངས་ལ་འཁུ་བའི་ལྷག་བསམ་མངའ་བ་དེ།།
པ་ཕ་ཨ་མ་བྲག་སྤྲེལ་གཉིས་ཀྱི་རིགས་འཕེལ་བའི།།
པ་ཅར་རྣམ་པར་མཛེས་བའི་འབྲོག་པའི་སྐྱེ་བོ་ཚོ།།
པ་རི་ཧཱ་སས་འཚོ་བ་རོལ་བ་བླ་ན་འཕགས།།
ཕ་བཟང་སྟག་ཤར་གཞོན་ནུས་དགའ་འབོད་འཐེན་དང་ལྷན།།
ཕ་རྟ་བཟང་བོའི་བང་རྩལ་རླུང་ལ་བསྡེབས་ནས་ནི།།
ཕ་ནོར་ཕྱུགས་ཀུན་འཚོ་བའི་ནོར་འཛིན་ཡངས་པོ་རུ།།
ཕ་གིའི་མི་ཚོགས་དགྱེས་པ་ཆེན་མོའི་ལྟད་མོར་བསྒྱུར།།
བ་ཕྱུགས་ནོར་གྱི་མི་ལྟུང་ཕྲེང་བའི་དགའ་ཚལ་དེ།།
བ་མཛོ་གཡག་གི་རྩིད་ལས་འཁྲུངས་བའི་སྦྲ་མཐར་བཀྲམ།།
བ་ལས་བྱུང་བའི་འོ་མ་རྒྱ་མཚོ་རབ་བྲུག་པས།།
བ་འཇོ་མཁན་གྱི་འཛུམ་མདངས་པདྨའི་འདབ་བརྒྱ་གྲོལ།།
མ་ཀུ་ར་འདྲའི་ལྷ་ལམ་ཡངས་བོའི་ཕང་བ་རུ།།
མ་བྲེལ་བག་ཡངས་རྩེན་པའི་སྤྲིན་གྱི་ཚོམ་བུ་བཞིན།།
མ་མིག་སྤང་ལྗོངས་སྔོན་མོའི་གདན་ཡངས་བཀྲ་བ་རུ།།
མ་མོ་གཡང་དཀར་ལུག་གི་ཁྱུ་ཚོགས་བག་ཡངས་འཁྱིལ།།
ཙ་རི་གནས་མཆོག་འདྲ་བའི་རྫ་སྟོད་གོང་མ་ནས།།
ཙ་གོ་ར་ཡི་མགྲིན་དབྱངས་སྙན་མོ་རབ་འཐོར་བས།།
ཙ་ཏ་ཀ་སོགས་འདབ་ཆགས་ཚོགས་ཀྱིས་རྩེད་འཇོའི་ངང་།།
ཙ་གེ་ཙིག་གེའི་ལྗོན་ཤིང་སྤོ་ན་སྤྲོ་བས་བཟི།།
ཚ་གྲང་སྙོམས་ལ་དུས་བཞིའི་རེས་མོས་མངོན་པར་གསལ།།
ཚ་ཟེར་ཅན་གྱི་གཟི་འོད་ངར་མོ་མཆེད་ཀྱང་རུང་།།
ཚ་ཟེར་འཇོམས་ཀྱི་ཡོལ་བ་སྲབ་མོས་ལྷོད་བཏེགས་དུས།།
ཚ་ཁུལ་ཕེབས་པའི་ཁྲུང་ཁྲུང་ཁྱུ་ཡི་ལྡིང་སྐོར་མཛེས།།
ཛ་ཡའི་བསྟན་པ་ལེགས་པར་སྐྱོང་མཁས་བསྟན་འཛིན་ཀུན།།
ཛ་དྲག་མ་གོས་ཕར་ཕྱིན་དྲུག་གིས་ཞི་བར་བཏུལ།།
ཛ་ཡའི་གསུང་རབ་བརྩེགས་པའི་གསེར་གྱི་འདུ་ཁང་དེ།།
ཛ་རེ་མེད་པའི་དབེན་རིའི་རྐེད་ན་གསལ་ལེམ་བཀྲ།
ཝ་ཞྭ་གྱོན་པའི་ལོ་རྒྱུས་བྱུང་གནས་བྱང་རྒྱུད་དེར།།
ཝ་ལུང་ཡུལ་འདྲའི་རྫ་རི་ཆེན་པོའི་རྩེ་མོ་རུ།།
ཝ་ལྟར་འཁྱུག་པའི་འདབ་ཆགས་ཚོགས་ཀྱི་རྩེད་འཇོ་མཛེས།།
ཝ་ལེར་སྣང་བའི་མཛེས་པ་སྟོང་གི་འདབ་ཆགས་གླིང་།།
ཞྭ་མོ་རྩེ་རྣོ་ཕྱིང་ཞྭ་གྱོན་པའི་ཆར་བཞའ་དང་།།
ཞྭ་མོ་ཚེ་རིང་རྒྱན་ལ་སྤྲས་བའི་སྤྲོ་སྣང་སོགས།།
ཞྭ་མོ་མི་གཅིག་དུས་བཞི་འབྱེད་པའི་འབྲོག་པའི་ཐང་།།
ཞ་ཞི་མང་པོ་རྩེད་ལ་གཡེང་བའི་རྩེ་ར་གླིང་།།
ཟ་མ་དཀར་གསུམ་བཅུད་ཀྱིས་ལུས་ཟུངས་བསྐྱེད་པ་ལས།།
ཟ་བས་མངར་གསུམ་བྲོ་བ་ལྷན་སྐྱེས་མངའ་བ་ཡི།།
ཟ་མ་མཆོག་གྱུར་འབྲོག་པའི་ཕ་སའི་སེམས་ཅན་ཀུན།།
ཟ་མའི་དྲི་བསུང་ཕྱོགས་བཅུར་འཕྲོས་པས་ལྟོ་བ་འགྲངས།།
འ་ལེ་འོལ་ལེའི་སེམས་ཀྱི་སྤྲོ་བསང་བྱེད་སའི་མཆོག།
འ་འུར་སྟོངས་ལ་བག་ཡངས་རྣམ་པར་འཕེལ་བ་ཡི།།
འ་ཚེ་འལ་ལ་དུས་བཞི་བརྗེས་བའི་ཁྱད་མཚར་སའི།།
འ་འུར་ཞི་ལ་ཞི་བའི་བཀྲ་ཤིས་སྨོན་ལམ་བརྟན།།
ཡ་ཐོག་མེས་པོ་གོང་མའི་སེམས་ཀྱིས་གཉར་བ་ཡི།།
ཡ་གི་འབྲོག་པའི་སྣོད་ཀྱི་བཀོད་པ་རྣམ་པར་མཛེས།།
ཡ་རབས་དེང་གི་རྒྱུད་འཛིན་དམ་པས་ལེགས་པར་གཅེས།།
ཡ་མེད་སྤོབས་པས་ལྷོད་ཡངས་མ་བྱེད་སྐྱོངས་བར་གྱིས།།
༥
ར་བ་གངས་རིའི་མུ་ཁྱུད་མཛེས་པའི་བསིལ་ལྗོངས་ཀྱི།།
ར་བ་གངས་རིའི་དབུ་འཕང་སྔོན་པོའི་མཁའ་ལ་འཕེལ།།
ར་བ་གངས་རིའི་གཟི་འོད་དཀར་བོ་ཕྱོགས་བཅུར་ཁྱབ།།
ར་བ་གངས་རིའི་སྣོད་བཅུད་རྒྱས་བའི་སྨོན་ལམ་སྤུར།།
ལ་ཐུར་ནགས་ལ་འདབ་ཆགས་འཁོར་བས་སྙན་པ་སྒྲོག།
ལ་ལུང་འདི་ཡི་ནང་བཅུད་སེམས་ཅན་སྤྲོ་གྱུར་ཅིག།
ལ་ལུང་འདི་ཡི་ཕྱི་སྣོད་འཇིག་རྟེན་མཛེས་གྱུར་ཅིག།།
ལ་ལུང་འབྲོག་ཐང་ཕྱུགས་ཀྱིས་ཕྱུར་བར་གཏམས་པར་སྨོན།།
ཤ་ཁྲག་གདོས་བཅས་ལུས་ཀྱི་ལྟེ་ཁྲག་གཅིག་ཐིགས་པའི།།
ཤ་རུས་གདོང་རྒྱུད་གཅིག་ལས་མཆེད་པའི་ལས་མཐུན་ཅན།།
ཤ་གཟན་སྨུག་པོ་སུམ་གཉིས་བཟུང་བའི་སྲིན་པོ་ཅན།།
ཤ་རུས་གཅིག་པུ་འཚོ་སའི་ཡུལ་དུ་འཕེལ་གྱུར་ཅིག།
ས་བཟང་གོ་ལའི་གཙུག་ཏོར་གངས་རིའི་མུ་ཁྱུད་ཅན།།
ས་ཆེན་སྐྱེ་དགུ་ཀུན་གྱིས་ཡིད་དབང་འཛིན་པ་ཡི།།
ས་ཡི་གོ་ལ་རབ་ཏུ་འཕགས་པའི་བོད་ཡུལ་འདིའི།།
ས་བཟང་དགེ་བཅུའི་མཚན་མ་རྟག་ཏུ་འབར་གྱུར་ཅིག།
༦
ཧ་ཅང་སྤྲོ་སྣང་སྦྱིན་པའི་འབྲོག་པའི་ཐང་ཆེན་ནས།།
ཧ་ལམ་མིག་གིས་ཟིན་པའི་མཛེས་པ་མ་ལུས་པ།།
ཧ་ཧ་ཧོ་ཧོའི་འདུ་འཛི་རྒོད་པའི་བར་གླགས་ནས།།
ཧ་རེ་ཧུ་རེས་ཀ་ཁ་ཕྲེང་བའི་བསྟར་ལ་བརྒྱུས།།
ཨ་སོགས་སུམ་ཅུ་ཐམ་པའི་བསྟོད་པའི་སྒྲ་དབྱངས་ལ།།
ཨ་ལ་ལ་མོ་གཉིས་མེད་གདངས་ཉམས་མེད་མོད་ཀྱང་།།
ཨ་ཧ་ཉ་ཉོག་འཛེར་སྒྲའི་དྲི་མས་བསླད་འདྲེས་ན།།
ཨ་རོགས་ཀློག་པོའི་རྣམ་དཔྱོད་ཆར་གྱིས་བྱབས་ཁྲུས་མཛོད།།
རྩོམ་གསར། 10