ཀརྨ་བསྟན་འཛིན། 2019-09-25
སྲིད་པའི་གནས་ཀྱི་ཉེ་བའི་འཁོར་བ་རུ།།
འདུ་འབྲལ་ལས་གཞན་ནམ་མཁའ་གཡའ་དག་པ།།
སྣང་བའི་ཉི་འོད་འདུས་པའི་གཏན་དུ་འཁྱིལ།།
ཚེ་རབས་ལས་ཀྱིས་དེད་པའི་ལམ་ངོགས་སུ།།
སྤྱི་ནས་མཛེས་པའི་ཁྲོན་ན་ཁྱེད་ཉིད་ནི།།
དྲི་ངད་སྤོས་ཆུ་སྒྲ་དབྱངས་མཆོད་པའི་རྫས།།
ལྷ་ཚོགས་ཞིང་གི་སྙན་པའི་ཆོས་ཀྱི་སྒྲ།།
རྨི་ལམ་མིན་གྱུར་དུས་གསུམ་ཀུན་ཏུ་གྲགས།།
གོམས་པའི་འདུ་བྱེད་ལམ་ལ་མི་ལྟུང་བ།།
རྐང་པའི་ལོང་བུ་ཆ་འཇོག་མེད་པ་ཡི།།
གཅིག་ཏུ་མི་གནས་དྲང་སྲོང་ཆེན་པོ་གང་།།
མར་མི་དྭགས་གསུམ་སྲིད་ན་འཇིང་བ་ཡི།།
བསྟན་པའི་རྒྱལ་མཚན་དྲི་མ་མེད་པ་གང་།།
ཇི་སྲིད་ཏིང་འཛིན་ཟས་ཀྱིས་འགྲངས་པ་ཡི།།
ཉིན་མཚན་ཀུན་ཏུ་ཞེན་པའི་འོད་ཀྱིས་ནི།།
བསླུ་བའི་ཆོས་འདི་ཡུན་གྱིས་བཏང་བ་ཡི།།
སེམས་འདི་གང་གནས་བསྟན་པའི་བྱེད་པོ་གང་།།
ཡུན་དུ་གནས་ཤོག་སྐྱེས་བུ་ཁྱོད་མཆོད་དོ།།
རྩོམ་གསར། 10