ཚངས་ཐིག 2019-02-25
ལོ་ཟླའི་འགྱུར་བག་གིས།
ངའི་ངོ་གདོང་ལ་འཁྲུལ་སྣང་གི་ས་བོན་བཏབ།
སྐབས་དེར།
སྡུག་བསྔལ་གྱིས་གྲུབ་པའི་ཕུང་པོ།
གློ་བུར་ངང་རང་དང་རྗེས་མེད་དུ་གྱུར་པས།
ད་གཟོད། མི་ལོ་བཅུ་བདུན།
ཉོན་མོངས་ཀྱིས་དྲུད་ནས་ཡོངས་སུ་རྫོགས་པ་རྟོགས།
འདོད་ཆགས་ཀྱིས་ཁུར་བའི་འཁོར་བའི་ནུབ་རླུང་།
ང་ཡི་ཁ་གཏད་དུ་གཡུགས་རྗེས།
མིག་ཟུང་རྡུལ་གྱིས་གཙེས།
མི་དག་གིས་མྱ་ངན་གྱི་ཁ་འབོད་གཏོང་།
སྡིག་སྒྲིབ་ལས་སྐྱེས་པའི་བདག་གི་ཡན་ལག
ཞིབ་ཏུ་བལྟས་ཚེ།
རྒས་སོང་བའི་ཤིང་སྐམ་བཞིན་ཕྱི་འཁྱོག་ནང་འཁྱོག་ཏུ་མཐོང་།
དེ་ལྟ་མོད། ཡོད་ཚད་འགྱུར་ལྡོག་གི་ཚོར་སྣང་ཞན་པས།
རྣམ་རྟོག་གི་གཟེབ་དྲའི་ནང་དུ་ཡང་ཡང་བརྒྱུགས།
དུས་ཚོད་ནི་གཙང་བོ་བཞིན་མདུན་ནས་མདུན་དུ་བཞུར།
དེ་ལ་སེམས་ཁྲལ་དང་དོགས་པ་མི་སྐྱེའམ།
གང་ཡང་མི་དགོས་ཞེ་ན།
འདས་སོང་བ་ནི་དུས་ཚོད་ཁོ་ན་རེད་ཨང་།
རྩོམ་གསར། 10