རྔ་བ་ཕུན་ཚོགས། 2018-12-03
ཕྱི་རོལ་དུ་ཉི་འོད་མེད་པས།
ངས་དཔེ་ཤག་ཏུ་མེར་བསྲོས་ནས་བསྡད།
ཁ་བ་མེད་པའི་དགུན་ཟླ་འདི་ཅི་འདྲའི་གྲང་ནའང་།
གཙང་བོ་ཁོ་ན།དུས་ཀྱི་ཚེག་ཤད་འབྲི་མཁན་ཡིན།
ལུས་ཀྱི་ཐོ་ཡོར་ནག་པོ།
ཧ་ཅང་ཐང་ཆད་པའི་དུས་སུ།
གཉིད་བསོར་མོ་ཞིག་ལོག་ནས།
ལོ་ཟླ་ཞིག་ལ་སྐྱེལ་མ་བྱས་ཀྱང་།
རང་སེམས་ཀྱི་མེ་ལོང་སྙིང་ལ་ཆག་ན།
ངས་སུ་ཞིག་ལ་འགྱོད་བཤགས་བྱ་ཨང་།
ལྷིང་འཇགས་ཀྱི་མཚན་མོ་རེ་རེར།
ངས་ཡུན་རིང་ཞིག་ལ་རྨི་ལམ་ཞིག་རྨིས།
ནམ་སད་དུས།
སྤྲིན་པའི་སྐ་རགས་གསེང་ནས་བལྟས་ཚེ།
ཡོད་ཚད་ནས་ཡོད་ཚད་སྟོང་པའི་མཁའ་ལ་མཛུམ།
སེམས་པའི་སྣེ་གཉིས་སུ་སྨུག་པ་ཡང་ཡང་འཐིབ།
སྨུག་པའི་ནང་དུ་དུས་ཀྱི་ཁ་བ་འབབ་རྒྱུ་མེད་ན།
དགའ་སྐྱོ་ཆགས་སྡང་གི་སྤྲིན་པ་ཅིའི་མི་འཁྲུགས།
ལོ་ཟླ་འདི།
སྙན་ངག་ཐར་ཐོར་ཞིག་གིས་སྦྲུམ་པར་མི་ནུས་ན་ཡང་།
ཤར་ནུབ་ཀྱི་མཐའ་ན་འཕྱང་བའི་ཉི་ཟླའི་རྔུལ་ཁྲག་ལས།
ང་ལ་ཁྱོད་ལས་ལྷག་པའི་སེམས་རྩ་གླན་ས་ཞིག་མེད།
དབྱངས་གསལ་གྱི་མགུལ་རྒྱན་འཆང་བའི།
དགུན་ཟླ་འདིར།
ཧ་ཅང་ཐང་ཆད་པས།
ཁ་བ་དཀར་པོའི་སྙན་ངག་ཅིག
ལེགས་སྐྱེས་སུ་འབུལ་རྒྱུ་མ་བྱུང་ཡང་།
དམར་རོ་ཁྲག་གི་ཐ་སྙད་དེ་དག
བསྐལ་བའི་བར་གྱི་སྙན་ངག་ཡིན།
རྩོམ་གསར། 10