བཀྲ་ཤིས་ཤིས་པའི་མེ་ཏོག་ཆར་འབེབས་པའི།།

བདེ་ལེགས་ལེགས་བཤད་སྨྲ་བའི་མ་མ་སྟེ།།

སངས་རྒྱས་སྟོང་གི་སེམས་ཀྱི་མཛའ་ན་མོ།།

ཚངས་བའི་སྲས་མོ་གང་དེས་རྗེས་བཟུང་མཛོད།།

དཀར་གསལ་ཟླ་བ་གཞོན་ནུའི་ལང་ཚོ་དེ།།

མི་འདོད་སྤྲིན་པའི་ཡོལ་བས་སྒྲིབ་ན་ཡང་།།

མཛད་ཕྲིན་འགགས་མེད་རྟ་བདུན་དབང་བོའི་ཟེར།།

གླིང་བཞིའི་སྐྱེ་རྒུའི་མགོན་དུ་རྟག་པར་འཛུམ།།

སྙིགས་དུས་བསྟན་པའི་སྒྲོན་མེ་གསལ་མཛད་པའི།།

བྱང་སེམས་མི་རུ་སྤྲུལ་བའི་སེམས་དཔའ་གང་།།

ཆོས་ཀྱི་ཞིང་ལས་ཁ་བ་ཅན་པ་རུ།།

མཚན་དཔེའི་མེ་ཏོག་བཞད་པའི་སྐལ་བཟང་དྲན།།

སྲིད་ན་མངོན་པར་མཐོ་བའི་ཆོས་ཀྱི་ལྗོངས།།

ཡ་ཆེན་ཨྱོན་བསམ་གཏན་གླིང་ག་གཙོའི།།

ཆོལ་གསུམ་ཡུལ་གྲུ་སོ་སོའི་དད་ལྡན་ཚོར།།

དགེ་བའི་ས་བོན་འདེབས་ཁྱེད་དྲན་པར་འོས།།

ལས་སྨོན་མེ་ཏོག་དགུན་གསུམ་ཁ་བས་མནན།།

ཁྱེད་ཞལ་དངོས་སུ་མཇལ་བའི་སྐབས་མ་མཆིས།།

འོན་ཀྱང་མདོ་སྔགས་དགོངས་པ་མཐར་ཐུག་པ།།

སྐལ་ལྡན་སྐྱེས་སུ་ཕུལ་གང་དངོས་སུ་མཇལ།།

སྙིགས་དུས་འགྲོ་ལས་སོ་སྐྱེས་ཐ་མལ་བ།།

བདག་འདྲའི་རིགས་ལ་དག་སྣང་ཆུང་མོད་ཀྱང་།།

དམ་པ་ཁྱོད་ཀྱི་རྣམ་པར་ཐར་བ་ལ།།

དད་པའི་བ་སྤུ་འགུལ་བ་ཐེངས་གཅིག་མིན།།

ལུང་རྟོགས་གཉིས་ལས་རྟོགས་པའི་བསྟན་པ་གང་།།

རྒྱ་ཆེར་རྩར་འདོན་གནང་བའི་ངུར་སྨིག་འཛིན།།

ཕྱོགས་ལྷུང་ལྟ་བའི་རྒྱ་ལས་ཉེར་གྲོལ་བའི།།

དམ་པ་རྣམ་ཐར་སྐྱོང་ལ་སུ་ཡང་གུས།།

ལོག་སྨྲའི་གཡུལ་ལས་རྣམ་རྒྱལ་རྒྱལ་བའི་སྲས།།

ལུགས་གཉིས་ལམ་བཟང་སྟོན་མཁས་སྟོན་པ་ཁྱོད།།

ཐུབ་པའི་བསྟན་པའི་སྒྲོན་མེ་བགར་བ་ལ།།

བློ་གྲོས་ཕྱོགས་མཐར་རྒྱས་པའི་སེམས་དཔའ་དངོས།།

སྙིགས་མའི་འགྲོ་ཡི་བསོད་ནམས་ཟད་དྲགས་པས།།

རྗེ་ཡིས་མི་རྟག་སྟོན་བཞིན་ཞིང་ལ་བྱོན།།

འོན་ཀྱང་དྭ་ཕྲུག་སྟོང་གི་མགོན་པོ་རུ།།

ཁྱེད་སྐུ་ཉི་མ་གཞོན་ནུ་མྱུར་མཇལ་ཤོག།