རབ་འབྱམས་ཆོས་ཀུན་མཁྱེན་པའི་འཇམ་དཔལ་དངོས།།

རྨད་བྱུང་གསང་བའི་རྒྱ་མཚོའི་གཏིང་རིམ་དུ།།

ཇི་སྙེད་གནས་ལུགས་བློ་ཡིས་མཁྱེན་གཟིགས་པ།།

ཨ་འབུམ་དམ་ཆོས་མཆོག་ལ་གུས་པས་འདུད།།

བློ་དང་རིག་པ་དམན་ཞིང་རང་གཤིས་ངན།།

བཟང་པོའི་ལས་ཤིག་མ་མཆིས་སྙོམ་ལས་ང་།།

སྙན་པའི་སྐད་ཆ་ཉུང་ཞིང་ཚིག་རྩུབ་མང་།།

གྲགས་པའི་དུས་ཤིག་ནམ་ཡང་ཡོད་མ་ཡིན།།

ཚེ་དང་བསོད་ནམས་བཟང་པོས་སྐལ་བ་ཡིས།།

རིང་པོའི་ལོ་དང་ཟླ་བས་གོམས་འགྲོས་ཀྱིས།།

བསམ་པའི་དཔལ་ཡོན་དང་ནི་ཕུགས་བསམ་དག །

འགྲུབ་པའི་ལམ་ཞིག་ལོས་ཡོད་གྲོགས་ཀྱི་མཆོག །

དབང་དང་འཇོན་པོའི་གྲགས་པ་ཆུང་ན་ཡང་།།

    གྲགས་པའི་ལས་ལ་བརྩོན་པ་མ་ཆད་ན།།

རྡོ་ལ་རི་མོ་བརྐོས་འདྲའི་མཚན་སྙན་ཞིག །

རྗེས་ཤུལ་ནམ་ཡང་ཡལ་མེད་འཆར་བ་ལགས།།

མི་གཞི་བཟང་ཞིང་གཞུང་རྒྱུད་མདའ་ལྟར་དྲང་།།

གྲོགས་པོའི་མཛའ་བརྩེ་སྲུང་ཞིང་ཀུན་དང་འཕྲོད།།

མི་གཞིའི་ཀུན་སྤྱོད་ནམ་ཡང་མ་འདོར་ལགས།།

རིན་ཆེན་ནོར་བུ་འཐོབ་དང་མཚུངས་པར་ཤོག།

བསྟན་པའི་སྐྱེས་བུ་འཛིན་མཁན་གྲོགས་བཟང་ཉིད།།

པ་ཏྲའི་རི་མོ་བསྣོལ་འདྲའི་བརྩེ་བ་ཅན།།

ཆོས་དང་རིག་གཞུང་དག་ལ་སྦྱོང་བས་འབད།།

འཕེལ་བའི་རིགས་ལ་བརྩོན་ཞིག་ཕ་བཟང་བུ།།

བློ་དང་རིག་པ་གྲུང་ཞིང་འབྲེལ་འདྲིས་ཆེ།།

བཟང་པོའི་ལས་ལས་ལ་བརྩོན་ཞིང་གཞན་ཕན་ལྡན།།

བཀྲ་བཀྲ་རིག་པའི་གནས་ལ་བརྩོན་འགྲུས་ལྡན།།

ཤིས་སྨོན་བཟང་པོའི་ཁ་གཡང་ཁྱེད་ལ་ཕུལ།།

ཁྱེད་སྐུ་མཛེས་པས་ཚིགས་དྲུག་སྨྱུག་མ་དང་།།

ཁྱེད་ངག་སྙན་པས་དཔྱིད་ཀྱི་ཕོ་ཉའི་ངག །

ཁྱེད་ཐུགས་དཀར་བས་གངས་ཀྱི་མཆོད་རྟེན་ལ།།

བཟང་གསུམ་ལྡན་པས་ང་ཁྱེད་ལ་དགའ་འོ།།

འཇོན་ནུས་ལྡན་ཞིང་ལྷག་བསམ་དཀར་པོ་ཅན།།

གྲོགས་ལ་བརྩི་ཞིང་གུས་ཞབས་ལྷག་ཏུ་ལྡན།།

མངོན་ལྐོག་མེད་པའི་གྲོགས་ཀྱི་བརྩེ་བ་ཅན།།

ལི་ཐང་བསྟན་པ་མི་ཚེའི་གྲོགས་གཅེས་ཡིན། །

ཡིད་འོང་མཛེས་ལྡན་མེ་ཏོག་པད་མ་ལྟར།།

ལུས་ཕྲ་གཟུགས་མཛེས་ལྡེམ་མྱུར་གར་མཁན་ཁྱེད།།

སྨན་ཤར་སྟོང་གི་འགྲན་ཡ་ཚངས་སྲས་མ།།

སྙིང་ལ་བབས་ཤིང་ཡིད་འཕྲོག་སྙིང་སྡུག་ཡིན།།