སྟག་རིག་འབྲུག་ཐར། 2018-08-10
སྐར་ཚོགས་ཀྱིས་ཟླ་བ་པང་བའི་མཚན་མོ་སླེབས་ཐེངས་རེར།
དངོས་འབྲེལ་སྤྲོ་འཆམ་གྱི་ལོ་ཟླའི་གསེང་ནས།
དུང་བརྩེའི་མེ་ཏོག་གི་གང་བུ་རྒྱས་པ་དྲན་འོང་ཞིང་།
ཀྱ་ཀྱུར་བཞུར་བའི་ཆུ་ཕྲན་གྱིས་གླུ་ཆུང་གྱེར་ཐེངས་རེར།
ཤག་ཤག་བྱོ་བའི་མཛའ་གཏམ་གྱི་ཀློང་ཡངས་ནས།
མཐུན་པའི་དགོད་འཛུམ་གྱི་གཞས་དབྱངས་འཕྱོ་བའང་དྲན་སྲིད།
ཏག་ཏག་ལྷིང་འཇགས་འཐུང་བའི་མཚན་མོས།
འཁྱག་པ་རྡོ་དང་འདྲ་བའི་ངའི་སྙིང་ཆུང་ལ་དྲོད་ཁོལ་སྦྱིན་འོང་ཞིང་།
ལྗོན་པའི་རྩ་བ་འགྱེལ་འདྲའི་ངའི་རེ་སྨོན་ལ་ཁ་དོག་བསྣན་ཡོང་།
ཟང་ཟིང་དང་འདུ་འཛིས་བསླུས་པའི་གྲོང་ཁྱེར་འདིའི་ཕྱི་ནང་བར་གསུམ་ལ།
དབྱར་ཟླ་དྲུག་པའི་ཚ་སྨུག་གི་སྒྲིབ་ཡོལ་དཔྱངས་དུས།
རེ་སྒུག་གྲངས་མེད་ཅིག་བསགས་ནས།
རླུང་བུའི་བསིལ་འཇམ་དང་ཆར་བའི་ནེམ་ཤ་ཐོབ་པར་སྨོན་པའི་བཟོ་ལྟ་དེ།
ཡུན་རིང་ལས་ཀྱིས་བྲལ་བའི་སྙིང་སྡུག་མ་ཞེ་རྩར་སྒོམ་པ་དང་ཇི་འདྲའི་མཚུངས་ཨང་།
དྭངས་བསིལ་བསིལ་གྱི་ངོ་གདོང་དང་རློན་ནེམ་ནེམ་གྱི་མཆུ་སྒྲོས།
ད་དུང་སྐར་འོད་འཚེར་འདྲའི་མིག་མདངས་དག
ཡོད་ཚད་གོ་རིམ་འཁྲུག་པའི་འདུ་འགོད་འདིའི་ཁྲོད་ནས་དབང་མེད་དུ་དྲན་འོང་།
ལྷིང་འཇགས་ནི་བརྩེ་དུང་གི་རྣམ་ཤེས་སྦྲུམ་སའི་དྭངས་གཙང་གི་རྩྭ་ཐང་དེ་ཡིན་ཚེ།
ལྷུག་པོར་བཞད་པའི་བདེ་སྐྱིད་ཀྱི་མེ་ཏོག་དང་སྙན་ཆ་དོད་པའི་མཛའ་འབྲེལ་གྱི་བྱེའུ་ཆུང་
ཟུང་ནི་གནས་ཡུལ་དེའི་རྒྱན་ཆར་འཐིམས་ཡོད།
རེ་འདོད་ནི་ལྗང་མདོག་གི་མྱུ་གུ་ལ་ཟམ་ཟིམ་འཇོ་བའི་སྦྲང་ཆར་དེ་ཡིན་ན།
མཉམ་འཛོམས་ནི་འགལ་རྐྱེན་བྲལ་བའི་རང་བྱུང་མར་ཐོན་པའི་ཐུན་མོང་གི་གཏད་སོ་དེ་ཡིན།
བར་ཐག་གི་རྐྱེན་པས། དུང་བའི་གླུ་ཞིག་བླངས་ཀྱང་དབྱངས་རྟར་རྒས་ཉམས་ཐོན་འདུག
དྲན་པའི་སྐྱེས་ཤིག་བསྐུར་ཡང་འབྱོར་བའི་ཨ་ལན་མི་ལྡོན།
ནམ་རྒྱུན་ས་སྲོད་དང་གོམ་འགྲོས་འཐབ་ནས།
དྲན་པ་སྨག་ལ་གཞིབ་སྟེ།
རྒྱང་རིང་བའི་མཁའ་མཐར་ཅེར་དུས།
མཚན་མོའི་ལྷིང་འཇགས་འོག་གི་དུང་ཟླ་ཁོ་ན།
སེམས་གཏམ་སྦྱོར་སའི་སྙིང་སྡུག་གི་ཚབ་མཚོན་ཡིན།
དུང་བརྩེ་རྣལ་མ་དེའི་སླད་དུ། དྲན་པའི་ཟབ་སར་སྦས་ཡུན་རིང་ལ།
སེམས་པའི་གཞི་རུ་ཁུར་དུ་ལྕི་བའི་གསེར་མདོག་གི་ཡིག་རྡོག་འདི་དག་ནི།
ཡུན་རིང་སྨྱུག་ཁ་ནས་སྒོམ་པའི་འབྲི་སྙིང་ཆེ་བའི་བརྩེ་འཕྲིན་དམར་པོ་དེ་ཡིན་ལ།
དེ་ནི་བསྡུས་བརྗོད་ཀྱི་སྦུབས་ལ་འཚང་བའི་མཛེས་པའི་ཡང་རྩེའང་ཡིན།
དྲན་པ་འདི། མཚན་མོའི་ཧྲག་བར་ནས།
ལྷད་མེད་སེམས་ཀྱིས་ཡང་ཡང་མཆོད་ཅིང་།
དུང་ཞེན་ཕྲ་མོས་ཡང་ཡང་སྒུལ་བས།
ཡོད་ཚད་འདི་ལྟར་ཁྱེད་ཕྱོགས་སུ་འཕུར་སོང་།
མཚན་མོར་ཉི་མ་གཞོན་ནུའི་གཟི་བྱིན་གྱི་བཀྲག་མདངས་མེད་ན་ཡང་།
ལྷིང་འཇགས་ལ་བརྒྱུས་པའི་ལྷད་མེད་དུང་བརྩེ་ཡི་གཏམ་རྒྱུད་སྙན་མོ་དག
མཐོངས་དབྱིངས་ཀྱི་སྐར་མའི་འབྱེད་འཛུམ་བར་ནས།
ཡ་ཆུང་གི་ཁུད་དུ་ལྷུང་སྲིད་ལ།
དྭངས་གསལ་མེ་ལོང་ལྟ་བུའི་དུང་ཟླའི་ངོས་སུ་གསལ་གྱི་ལེར་མཇལ་འོང་།
དེ་ནི་དངོས་དོན་ཁྱེད་རང་མ་ཡིན་ནམ། སྙིང་སྡུག་ལགས།
རྩོམ་གསར། 10