ནེམ་ལྗང་གི་སྤང་ཐང་དུ།

ཆར་རྗེས་ཀྱི་འཇའ་ཚོན་མཁའ་རུ་ཕུབ་ཅིང་།

མེ་ཏོག་ཁྲ་ཚོམ་གདན་དུ་བཏིང་ནས་དབྱར་ཟླ་དྲུག་པ་གླུ་རུ་ལེན་པ།

བདེ་སྐྱིད་ཀྱི་འཛུམ་མདངས་མངར་མོ་དེ་ཡིན་ནམ།

མཐའ་ཡས་པའི་རྩྭ་ཐང་དུ་རང་གི་སེམས་རྒྱ་བྲིས་ནས།

དྭངས་གསལ་ལེའི་ནམ་མཁར་རང་གི་མིག་འཛུམ་ཕབ་ནས།

ཆུ་ངོགས་སུ་མཛའ་གཞས་ཁོ་ན་བཙལ་བ།

རི་ཀླུང་འདིའི་སེམས་དབུས་ན་སྨིན་པའི་རྨི་ལམ་དེ་ཡིན་ནམ།

དྲན་གདུང་མང་བའི་གཏམ་རྒྱུད་ཞིག་དང་འདྲ་བར།

དུས་འདི་ལ། ངས་ཅི་ཡང་དྲན་མི་འདོད།

ཨར་འདམ་དང་རྣོ་ལྕགས་ཀྱི་གཟེབ་དྲྭར་ཚུད་པའི་ངས།

བཅོས་འཛུམ་དང་མུན་འཐོམས་སྟུག་སའི་ངས།

ཁ་རོག་གེར། དལ་ཅག་གེར།

མིག་ཟུང་བཙུམ་སྟེ་སེམས་ངོགས་སུ་ཕ་ཡུལ་སྨིན་དུ་འཇུག་འདོད།

སྤྲིན་དཀར་ལྡིང་དུ་འཇུག་འདོད།

ནས་ཞིང་གི་སྙེ་རླབས་ལུག་ཁྱུར་འདྲེས་སུ་འཇུག་དགོས།

ད་དུང་་་་་་

དུས་འདི་ལ། ངས་ཅི་ཡང་དྲན་མི་འདོད།