བཀྲ་ཤིས་དུས་བཟང་དྲུག་པའི་ཚེས་གཅིག་ཤར།།

བྱིས་པའི་གདོང་ན་འཛུམ་མདངས་ཤིག་སེ་ཤིག།

སློབ་གྲྭའི་ཕྱོགས་སུ་དགའ་བའི་དགོད་སྒྲས་ཁེངས།།

ང་ཚོ་བྱིས་པའི་དུས་སྟོན་རོལ་དུ་འགྲོ།།

དཀར་ལ་དམར་མདངས་གཞོན་ཤ་རྒྱས་པའི་གདོང་།།

ཁྲ་ཐར་ཐར་གྱི་རྣམ་རིག་རྨད་དུ་བྱུང་།།

གཡོ་སྒྱུ་མེད་པའི་སེམས་པ་རྩེད་དགར་རོལ།།

བྱིས་པའི་དུས་ནི་སློབ་གྲྭའི་ནང་ནས་འདས།།

དགུན་གྱི་དུས་སུ་གྲང་བས་ཀུན་ནས་གཙེ།།

ཁ་བའི་འདབ་མས་གནམ་ས་བཀང་བའི་ཁྲོད།།

རིལ་རིལ་དཔེ་ཁུག་འཕོངས་ཚོས་འགོར་དྲུད་བཞིན།།

ང་ཚོ་བྱིས་པ་སློབ་གྲྭའི་ཕྱོགས་སུ་བསྐྱོད།།

དབྱར་གྱི་ཚ་གདུག་ཆེ་བའི་ཉི་འོད་དང་།།

ཐོག་འབྲུག་གློག་གསུམ་འཁྱུག་པའི་འཇིགས་སྐྲག་ཁྲོད།།

ཆུ་འདམ་བཙོག་པ་ལུས་སུ་བསྒོ་བཞིན་དུ།།

ང་ཚོ་བྱིས་པ་སློབ་གྲྭའི་ཕྱོགས་སུ་བརྒྱུགས།།

སྟོན་གྱི་ལོ་ལེགས་བསྡུ་བའི་དུས་དང་བསྟུན།།

ང་ཚོ་བྱིས་པས་ལོ་མཇུག་རྒྱུགས་ཡིག་ལེན།།

རང་རང་སོ་སོའི་སྦྱངས་འབྲས་བཟང་ངན་ལྟར།།

ང་ཚོ་བྱིས་པས་གཅར་རྡུང་ཉོ་བར་རྩོམ།།

དུས་ཚིགས་བཞི་ཡི་འགོ་མ་དཔྱིད་དེ་སླེབས།།

སློབ་གྲྭ་ཚུགས་པའི་བརྡ་ཐོ་འབྱོར་དང་ལྷན།།

སློབ་གྲྭའི་ཕྱོགས་སུ་དགའ་མཆོང་རྩེད་མོའི་ངང་།།

ང་ཚོ་སློབ་མས་ཤེས་རིག་སྦྱོང་དུ་འགྲོ།

དུང་སོའི་བར་ནས་ཀ་མད་སུམ་ཅུ་འདོན།།

རིག་གནས་མང་པོའི་རྨང་གཞི་འཇོག་ལ་བྲེལ།།

ཁང་ཆེན་བཞེངས་པར་རྨང་གཞི་སྲ་བརྟན་བཞིན།།

ཤེས་ཡོན་སྦྱང་བའི་སྤོབས་པ་མཁའ་དང་མཉམ།།

གནའ་བོའི་དཔལ་ཡོན་རྒྱལ་ཁབ་བཞི་པོ་དང་།།

བགྲང་བྱ་ལྔ་སྟོང་ལྡན་པའི་ལོ་རྒྱུས་དང་།།

རང་རིགས་བཅུ་ཕྲག་རིག་པའི་མཛེས་སྡུག་རྣམས།།

ང་ཚོ་བྱིས་པས་སྦྱང་བའི་སྟ་གོན་བྱེད།།

རྒྱུན་དུ་སློབ་སྦྱོང་བྱེད་པའི་ངང་ཚུལ་ལས།།

རང་བློ་ཚིམ་པའི་རྩེད་མོ་རྩེ་ཁོམ་མེད།།

དེ་རིང་བྱིས་པའི་དུས་ཆེན་རོལ་དང་བསྟུན།།

ང་ཚོ་བྱིས་པ་རྩེད་མོ་རྩེ་བར་བྲེལ།།

དུས་ཆེན་སྟེང་དུ་རང་རང་ཁྱད་ཆོས་བཏོན།།

བྲོ་གར་རོལ་རྩེད་གླུ་དབྱངས་ལེན་པ་དང་།།

ཁ་ཤགས་རྩེད་མཆོངས་ཧ་ཧའི་དགོད་སྒྲའི་ཁྲོད།།

མཚན་མོའི་ཟླ་བ་མགྲོན་གྱི་ཚུལ་བཞིན་བསུ།།

རྒྱལ་སྤྱིའི་བྱིས་པའི་དུས་ཆེན་རྨད་དུ་བྱུང་།།

ས་སྒང་གཅིག་གི་གྲོགས་པོ་ཡོད་ཚད་དེ།།

ཉི་མ་གང་བོར་རྩེད་འཇོར་རོལ་བཞིན་དུ།།

ལག་རྡང་སྦྲེལ་ནས་མདུན་སྐྱོད་བྱེད་པར་འདོད།།