ཀླུ་པད་བཟང་། 2018-05-28
ཆུ་འཁྱག་ཕོར་གང་ཧུབ་ཀྱིས་བཏུངས་རྗེས།
མེ་ལྕེའི་རྦ་རླབས་དྲག་ཏུ་འཕྱུར།
སྣུམ་སྒྲོན་གྱིས་མི་ཁེབས་པའི་གྲུ་ཟུར་ཞིག་ཏུ།
བྱིས་པ་གཅེར་བུ་འགའ་མཆོང་ལྡིང་གིས།
བདག་གི་རྨི་ལམ་གྱི་སྒོ་མོ་དལ་གྱིས་བརྡུང་།
ཆར་བ་བབས་མཚམས་ཆད་རྗེས།
ཉི་ཟླ་གཉིས་ནི་རི་བོའི་ཕ་རོལ་ཏུ་ནུར།
ང་ནི་མ་ཕམ་གཡུ་མཚོའི་འགྲམ་གྱི་གཡུ་ཡི་མེ་ཏོག་ཅིག་ཡིན།
མི་ཞིག་གི་རྨི་ལམ་དུ་ཉི་ཟླ་གཉིས་ལྷན་དུ་འཚེར།
དེ་ནི་ཆུ་རྡོ་འཁྱག་པ་ཞིག་དང་འདྲ།
ས་རུབ་དུས་སྙིང་ཉེ་བའི་གདོན་འདྲེ་དྲན།
མ་ཕམ་གཡུ་མཚོའི་བྲག་ཐེམ་གྱི་གླག་རྒོད་འཕུར་རྗེས།
བྲེལ་འཚུབ་ངང་འོང་བའི་སྐྱ་མི་དག་གིས།
གྲིབ་མ་སྟུག་པོ་རྒྱང་དུ་བསྐྱུར་ནས།
བར་སྐོར་གྱི་སྡིག་སྒྲིབ་གསལ་བར་བྱེད།
ང་ནི་མ་ཕམ་གཡུ་མཚོའི་འགྲམ་གྱི་གཡུ་ཡི་མེ་ཏོག་ཅིག་ཡིན།
བྱེ་མ་སྤར་གང་རླུང་འཚུབ་ཀྱིས་སྤུར་རྗེས།
མིག་མདངས་ནི་མེ་ལྕེ་བཞིན་དུ་འབར།
ཅི་ཞིག་ལེན་འདོད་སྒོས་ལག་པ་ཕར་སྲིང་ཚེ།
ཁང་ཆག་སྟོང་ཤུལ་གྱི་ཕ་ཡུལ་ནས་ཤུགས་རིང་མང་ཙམ་འབྱིན།
ཨ་ཕའི་གྲིབ་གཟུགས་ལས་མེ་ཏོག་བཞད།
དུག་ཆུས་བངས་པའི་མེ་ཏོག་བཞད།
ཕྱི་དྲོ་གང་མང་ཞིག་ལ་འུ་ཅག་གཅིག་པུར་ཙོག་ནས།
ཉི་ནུབ་འོག་གི་རྨི་ལམ་ལ་སྟ་གོན་བྱེད།
ང་ནི་མ་ཕམ་གཡུ་མཚོའི་འགྲམ་གྱི་གཡུ་ཡི་མེ་ཏོག་ཅིག་ཡིན།
འཇིག་རྟེན་གྱི་སྨག་རུམ་ཧ་ཅང་སྟུག་པོའི་ཁྲོད།
ལྕགས་ཐག་ཤུགས་ཀྱིས་འཐེན་པའི་སྒོ་ཁྱི་འགས།
སྐར་ཆ་རེ་རེའི་ཚག་སྒྲ་བགྲངས་ནས་མགོ་བོ་སྒུར་རྗེས།
བདག་གིས་བསྐལ་བ་དུ་མར་བསགས་པའི་དངན་པ་དག
གཞོན་ནུ་མ་ཞིག་གི་རྨི་ལམ་དུ་བསྲིངས།
རྩོམ་གསར། 10