སྟག་རིག་འབྲུག་ཐར། 2018-05-18
ཨ་སྔོན་འགྲིམ་པའི་ཉི་ཟླས།།
གླིང་བཞིའི་མུན་པ་སེལ་སོང་།།
ཡིད་ཀྱི་རྨོངས་པའི་མུན་པ།།
ཉི་ཟླས་སེལ་ན་སྙམ་བྱུང་།
མཁའ་ལྡིང་དབྱར་སྐྱེས་རྔ་སྒྲས། །
རྨ་བྱའི་སྒྲོ་གུར་བརྐྱངས་སོང་།།
ཕུགས་བསམ་གསེར་གྱི་གཤོག་པ། །
ལྷན་ཅིག་བརྐྱང་ན་བསམ་བྱུང་། །
དྲི་བཞོན་བསིལ་བསིལ་རླུང་བུས། །
རྩྭ་ལྗང་མྱུ་གུ་རྒྱས་བྱུང་། །
རིག་པའི་བློ་ཡི་ཁོ་ལག།
རླུང་བུས་བསྐྱེད་ན་བསམ་བྱུང་། །
དལ་འབབ་གཙང་ཆུ་སྔོན་མོས།།
མེ་ཏོག་ཞལ་ཁ་ཕྱེ་སོང་།།
ཤེས་བྱའི་ལྗང་མྱུག་གསར་པ།
གཙང་ཆུས་བཏེགས་ན་བསམ་བྱུང་།།
ལྷ་བྱ་ཁུ་བྱུག་སྔོན་མོས།།
དཔྱིད་དཔལ་བུ་མོ་བསུ་བྱུང་།།
རྒྱང་རིང་སེམས་ཀྱི་འདུན་མ། །
ལྷ་བྱས་དྲངས་ན་སྙམ་བྱུང་། །
ལྷ་ཤིང་ཙན་དན་ལྗོན་པས།།
བསང་ཞིམ་ཕྱོགས་སུ་བསྟབས་སོང་།།
རྩ་བའི་བླ་མའི་ཐུགས་རྗེ།།
རིས་མེད་བྱིན་གྱིས་རློབས་ཤིག།
དུང་གི་ཟླ་བ་དཀར་པོས།།
མཛེས་སྡུག་ཀུ་མུད་གྲོལ་སོང་། །
སྐྱོ་སྡུག་ཁོང་གི་ན་ཟུག།
དུང་ཟླས་གྲོལ་ན་སྙམ་བྱུང་། །
དལ་འབབ་རྫ་ཆུ་སྔོན་མོས། །
ཡིད་ཀྱི་སྐོམ་གདུངས་སེལ་བྱུང་། །
འབྱུང་འགྱུར་ཕུགས་ཀྱི་རེ་སྨོན། །
ཁད་ཀྱིས་སེལ་ན་སྙམ་བྱུང་། །
ཚོར་བའི་གློག་གི་འགྱུ་བས། །
སེམས་ཀྱི་སྨྱུག་ཆུང་སྒུལ་བྱུང་། །
རེ་འདོད་ཡིད་ཀྱི་འབོད་པ། །
ཚོམ་མིན་ཁོང་ནས་བརྡོལ་བྱུང་། །
རྩོམ་གསར། 10