རལ་གྲི་སྒང་སྤེན་རྒྱལ། 2018-04-25
སྔོན་ལེགས་བྱས་བསོད་ནམས་བཟང་པོའི་མཐུས། །
ཚེ་འདི་ལ་བློ་མོས་གཅིག་ཕྱོགས་པའི། །
གྲོགས་བཟང་པོ་ཁྲག་རྒྱུན་མི་གཅིག་ཀྱང་། །
སེམས་བརྩེ་བ་ཉེ་དུ་ལས་ཀྱང་ལྷག །
སྤྱིར་རང་གཤིས་མཐུན་པའི་ཕྱོགས་དང་གཅིག །
སྒོས་ལྟ་བ་མོལ་བའི་གཏམ་དང་གཉིས། །
ཡང་ཞིག་ན་དགའ་ཕྱོགས་མཐུན་པས་གསུམ། །
རྐྱེན་དུ་མས་མཉམ་དུ་གཤིབ་སྐལ་བྱུང་། །
དུས་བྲལ་མེད་རང་གི་གྲིབ་མར་ཡང་། །
བློ་ཡིད་ཆེས་བྲལ་བའི་དེང་གི་དུས། །
གྲོགས་བཟང་པོ་བྱམས་ལྡན་ཕ་མ་བཞིན། །
ནམ་ཡིན་ཡང་བློ་གཏད་བྲག་ལྟར་བཅོལ། །
གདོན་ཕྲག་དོག་གིས་བརླམས་གཞན་དབང་དང་། །
བགེགས་བར་ཆད་ངན་པས་རེ་ཞིག་ན། །
སྡུག་དོང་རྙི་ཟབ་མོར་ལྷུང་བའི་དུས། །
གྲོགས་བཟང་པོའི་སྙིང་གཏམ་རྒྱུན་མི་ཆད། །
ལྷན་ཅིག་ཏུ་མཉམ་འཛོམས་བྱུང་བའི་དུས། །
རོ་ཤིན་ཏུ་མངར་བའི་སྦྲང་རྩི་བཞིན། །
ཚིག་འཇམ་སྙན་སྨྲ་བར་མི་བྱེད་ཀྱང་། །
ཡིད་ཚིམས་པའི་རྣམ་འགྱུར་གཏིང་ནས་འདོན། །
དུས་བགྲང་བྱ་ཇི་ཙམ་གཤིབས་ན་ཡང་ །།
བློ་འགྱུར་མེད་དཔེར་ན་ཆུ་བཞིན་ཏེ། །
ཡུན་ཇི་ཙམ་བསྐོལ་བར་བྱས་ན་ཡང་། །
ཚ་སྲེག་པའི་མེ་རུ་མི་འགྱུར་འདྲ། །
གང་འགྲོགས་པའི་གནས་སྐབས་མཐའ་དག་ཏུ། །
དྲུང་གུས་པའི་ཚིག་འཇམ་མི་སྨྲ་ཞིང་། །
རྒྱབ་ཕྱོགས་ཚེ་འདུ་ཤེས་ལྷོད་གྱུར་པའི། །
ངག་སྦྱོར་བ་རྩུབ་པོ་གཏན་ནས་སྤངས། །
རྒྱུ་ལོངས་སྤྱོད་ཀླུ་དང་མཉམ་ཡང་རུང་། །
ཡང་རྒུད་དེ་སྤྲང་ལ་འཁྱར་ཡང་རུང་། །
བློ་འགྱུར་མེད་དཔུང་པ་བརྟན་པོ་ཡིས། །
སྙིང་བརྩེ་བ་མ་འཇགས་གྲོགས་པོ་ཉིད། །
མཐོ་རི་བོས་མཐོང་ལམ་བཀག་ཀྱང་རུང་། །
དྲག་གཙང་པོས་བགྲོད་ལམ་བཅད་ཀྱང་རུང་། །
གྲོགས་བཟང་པོའི་དོན་ཟབ་འབེལ་གཏམ་སྨན། །
ཡིད་འཇགས་མེད་གཏན་དུ་དྲན་པར་ངེས། །
མདོར་བསྡུས་ན་སྔོ་བསངས་ལྷ་ལམ་ངོས། །
དཀར་ལྷམ་ལྷམ་རྒྱུ་སྐར་གྲངས་མེད་ཀྱང་། །
སེམས་བསམ་པའི་སྟེང་གི་གྲོགས་པོ་ནི། །
བཀྲག་ཆེ་བའི་ཆུ་ཤེལ་ཁྱོད་གཅིག་སྣང་། །
རྩོམ་གསར། 10