རང་ཡིད་འགུག་པའི་མི་ལ།།

སྙིང་གཏམ་དག་དག་བཤད་ཡོད།།

ལོ་དང་ཟླ་བ་འགོར་ཡང་།།

ངོ་ཡི་འཛུམ་ཞིག་མ་ཚོར།།

འཕྲད་པའི་དུས་ཤིག་སྒུག་ཀྱང་།།

གོ་སྐབས་ཡོད་ཚད་བྱོལ་སོང་།།

སྙིང་གྲོགས་ཨེ་ཡོང་བསམ་ནས།།

ཚིག་གི་མདུད་པ་བརྒྱབ་ཡོད།།

ལ་དང་འགག་ཕྲེང་བཅད་ནས།།

ཕར་ལ་ཅི་ལྟར་བཅར་ན།།

ཚུར་ལ་དེ་ལྟར་བཀྱེད་འགྲོ།

རེ་འདོད་རེ་བ་ཤི་སོང་།།

ཁ་ཡག་བསླུ་བྲིད་བཙན་པོས།།

གང་སར་ཁྲིད་ནས་རྒྱུགས་འགྲོ།

གཞོན་པའི་དུས་འདི་མཚར་བ།།

བུད་མེད་གཤིས་འདི་གྱོང་པོ།།

མནའ་ཁ་ཚིག་གིས་རྩབ་ཡང་།།

དོན་དངོས་དང་ལེན་མེད་ཁུ།།

ལས་དབང་མེད་པར་བསམ་ནས།།

ལས་འཕྲོ་བཅད་ནས་གྱེས་དུས།།

གང་གི་ས་ནས་འཕྲད་ན།།

མཚམས་འདྲི་ཡང་ཡང་ཞུ་ཞོར།།

དགའ་མདོག་དུངས་མདོག་སྟོན་གི།

འགྲིག་ལུགས་མཐུན་ལུགས་ལབ་གི།།

སྙིང་གྲོགས་ཡོད་རབས་བཤད་ན།།

མིག་གི་རྫི་མ་ལྡེམ་ལྡེམ།།

ངག་ནས་ལྡབ་ལྡིབ་བཤད་གི།

མི་སེམས་གསོད་པའི་ཚིག་ངན།།

ནན་གྱིས་འདྲི་བར་མ་བྱེད།།

ང་ལ་བཤད་ཕོད་མེད་གི།

ལས་འདི་སྔོན་ནས་བསགས་པའི།།

མ་འཇལ་བུ་ལོན་ཨེ་རེད།།