སླར་ཡང་ཁ་བ་བབས་སོང་།

སྟག་གི་མཆེ་བ་གཙིགས་པའི་ནམ་ཟླ་དེར། 

ཁ་བ་ནི་ཇི་འདྲ་སྙིང་རྗེ་མེད་པ་ཞིག་རེད་ཨང་།

ནམ་ཟླ་དུག་སྦྲུལ་གྱི་ལྕེ་བཞིན་རྒོལ་ཡོང་དུས།

ངའི་ཨ་མ་དང་ངའི་ཨ་ཇོ།

ཅི་འདྲའི་འཁྱགས་ཨང་།

སེམས་པའི་ཞིང་ས་ཁ་བས་བརླན་དུས།

ངས་ཁ་བའི་ཁྲོད་དུ་གནས་པའི་ཨ་ཇོ་ཁྱེད་རང་དྲན།

ཨ་ཇོ། ཁྱེད་ཀྱི་སེམས་པའི་ཞིང་ས་ན་ཁ་བ་འབབ་ཀྱིན་འདུག

ཨ་ཇོ། ཁྱེད་ཅི་འདྲའི་འཁྱགས་ཀྱང་།

འཚོ་བ་ཁ་བའི་རྡོག་པོ་བཞིན་ཁྱེད་ཀྱི་སེམས་པ་ན་བབས་དུས།

ཨ་མའི་དཔྲལ་བ་ན་ཁ་བ་ལྟ་བུའི་གཉེར་མའི་བང་རིམ་ཆགས་ཟིན།

ཁྱོད་ཀྱི་སེམས་པ་ན་ཁ་བའི་གྲང་ཟུག་གི་རྨ་ཁ་གྲངས་མེད་བཟོས་ཟིན།

ལོ་འདི་དག་ནང་། ཁྱོད་ཀྱི་ཁ་བའི་ཁྲོད་དུ།

ཤར་གྱི་ཉི་ཟེར་ལ་རེ་མྱོང་། ཚག་ཚག་གི་མེ་སྟག་ལ་ཆགས་མྱོང་།

ཡིན་ནའང་། ཨ་ཇོ་ཁྱོད་ནི་ཅི་འདྲའི་གྲང་ཞིང་ཅི་འདྲའི་འཁྱགས།

ཨ་ཇོ། ངའི་དཔེ་དེབ་ཀྱི་གསེང་ན་ཁྱེད་ཀྱི་

འཛུམས་མདངས་མི་འདུག

ཁྱིམ་ཚང་མཉམ་འཛོམས་ཀྱི་དགོད་སྒྲའི་ཁྲོད་ཁྱེད་མི་འདུག

ཨ་ཇོ། ཁྱོད་ཁ་བ་བབས་སའི་ཡུལ་ཞིག་ན།

གཅེས་པའི་ཕྲུ་གུ་དང་ལྷན་དུ་རྩེད་བཞིན་ཡོད་ལ།

གྲང་ཟུག་ཆེ་བའི་སྨྲ་ལྕེ་ནག་པོ་ཞིག་གི་ལེ་ཁག་གྲངས་མེད་མྱོང་བཞིན་ཡོད།

ཨ་མས་མཚན་མང་པོ་ཞིག ཨ་ཕས་ཉིན་མང་པོ་ཞིག

ཨ་ཇོ། ཁྱེད་ཀྱི་སེམས་པ་ན།

འཚོ་བའི་མནར་གཅོད་ཀྱི་ཁ་བ་འབབ་བཞིན་འདུག

ཁྱིམ་ཚང་ཞིག་གི་ཁ་བའི་གྲང་ཟུག་གི་རླུང་བུ་ལྡང་བཞིན་འདུག

ཨ་ཇོ། ཁྱོད་ཅི་འདྲའི་འཁྱགས་ཨང་།

མཚན་མོ་དེར། 

ངའི་སེམས་པ་ཡང་ཁྱོད་ཀྱི་ཁ་བས་བརླན་སོང་།

ངའི་རྨི་ལམ་ན་ཡང་ཁྱེད་ཀྱི་ཁ་བ་འབབ་བཞིན་འདུག

ཨ་ཇོ་ཁྱོད་ནམ་ཡང་བདེ་སྐྱིད་ཡོང་བར་ཤོག

ཁ་བ་ལེབ་མོ་ས་གཞིར་བབས་ན་བཟང་།

ཁ་བ་རྡོག་པོས་རྩྭ་ལྗང་མྱུ་གུར་འདྲེན།

ཁ་བ་ལྷབ་ལྷུབ་རི་རྩེར་བབས་ན་བཟང་།

ཁ་བ་གངས་ཅན་ཕ་མ་གངས་རི་ཡོད།

ཁ་བ་གྲང་མོ་སེམས་ལ་བབས་པའི་དུས།

ཁ་བའི་གཅེན་གཅུང་གཉིས་པོའི་སེམས་ལ་བརླན།།