ནམ་དབང་ཕྱོགས་གསལ་བའི་སྐྱ་རེངས་ཀྱི་དུས་སུ། །

　　　　　　བྱེའུ་འཇོལ་མོས་ཐོག་མའི་ངག་སྒོ་དེ་ཕྱེ་སྐབས། །

　　　　　　མཛེས་རྒྱན་ཆས་སྤྲས་པའི་ལང་རྫོགས་ཀྱི་བུ་མོ། །

　　　　　　གཉེན་མིང་པོའི་སྐྱེལ་མས་གཞན་ཡུལ་དུ་བསྐྱལ་ཡོད། །

　　　　　　དྲིན་ཕ་མའི་མགོ་དཀར་གཉེར་མང་གི་ཞལ་རས། །

　　　　　　མཛེས་མེད་ཀྱང་སྲིད་པའི་བྱམས་བརྩེ་ཡི་ངོ་བོ། །

　　　　　　དྲིན་འཇལ་མེད་ལུས་སྦྱིན་གསོ་སྐྱོང་གི་བཀའ་དྲིན། །

　　　　　　གཞི་གོར་མོར་བསྐྱར་ནས་འགྲོ་དགོས་འདི་སྐྱོ་ཨང་། །

　　　　　　དགུང་ཨ་སྔོན་གཡུ་ཡི་ཞུན་མ་ཡིས་བསྐུས་པར། །

　　　　　　སྤྲིན་ཕུང་པོས་དྲི་བྲལ་འཛུམ་དཀར་གྱིས་བསུས་ཤིང་། །

　　　　　　འབྲུག་ཕོ་ཆུང་དབྱངས་སྙན་ས་གསུམ་དུ་འགང་ཚེ། །

　　　　　　གནས་བུ་མོས་སྐྱོ་བའི་ཆར་ཟིམ་ཞིག་ཤོར་སོང་། །

　　　　　　གཉེར་སྨྱན་པའི་ཚིག་མཛེས་ཁ་ཡག་གིས་བསྟོད་པའི། །

　　　　　　ཚེ་འདི་ཡི་དགའ་སྡུག་སྐྱོ་གསུམ་གྱི་འགྲོགས་རོགས། །

　　　　　　རིག་མ་མྱོང་སེམས་སུ་རྟོག་བཟོ་རེ་བྱེད་ཞོར། །

　　　　　　ཕྱིར་མི་ལྡོག་ལམ་ཕྲན་སྐྱ་བོ་ཞིག་དེད་འགྲོ། །

　　　　　　རོགས་དགའ་ལོ་སེམས་པའི་གཏིང་རིམ་ལ་ཉར་བཞིན། །

　　　　　　ཆུང་རྩེད་རོགས་ཕྱིར་དྲན་ཡོལ་རས་སུ་བྲིས་ཚེ། །

　　　　　　རིགས་མི་བཟང་དམན་པར་དམོད་པ་ཡི་ང་ཚོ། །

　　　　　　མགོ་འཁྱོག་པ་ཉིན་མོའི་གཟའ་སྐར་གྱི་གྲངས་ཙམ། །