སྐྲ་ནག་རྒྱ་ལྕང་ལོ་མའི་འཕྱང་འཕྲུལ་ཉུལ།།

སྨིན་རྫིབ་བར་ན་ཆགས་འདོད་བརྩེ་བ་ལྡང་།།

མིག་ཟུང་སྐར་རྗེན་མཐའ་ན་འཇའ་རིས་འཁྱུད།།

བཞིན་འཛུམ་དཀར་གསལ་ཟླ་འོད་ཡིད་ངོར་འཕགས།།

མཆུ་ཏོ་པད་འདབ་གཡོ་བའི་ངད་ཁ་འཐུལ།།

དགོད་ཙམ་ཚེམས་ཕྲེང་བར་གྱི་འཛུམ་དེ་མངར།།

སྨྲ་བ་ཚིག་གི་འདེགས་འགྲོའི་སྒྱུ་རྩལ་ཡངས།།

སྨྲ་བསམ་བརྗོད་པ་འདས་པའི་སྣང་ཚོར་བཞེངས།།

གཡོལ་ཚེ་བྲོ་བའི་དྲི་ལས་བཟི་བའི་ཤིང་།།

ལྡང་བའི་རླུང་དང་རྒྱུ་བའི་རླུང་གིས་དེད།།

དོག་ཙམ་དོད་པའི་འདོད་པའི་མྱོས་བུམ་འགུལ།།

བཅུ་དྲུག་ལང་ཚོ་སྨིན་པའི་མེ་ཏོག་མ།།

སེམས་ཀྱི་མཁའ་ལ་གཤེགས་པའི་གོམ་ཁ་ལྷོད།།

ལོ་ཟླའི་ཕྱི་ནང་སྒུལ་བའི་གཏམ་རྒྱུད་བཞག།

སྣང་བའི་ཐང་ལ་ཟེགས་པའི་ཟུར་མིག་རྗེ།།

སྒྱུ་མའི་ལམ་ལ་ཐོགས་པའི་སྨིན་ལེགས་མ།།