གློག་ཞགས། 2018-03-23
སྐྱིད་ན་ལ་ཁའི་རྩྭ་ལ་མཉམ་ཟ་དང་། །
སྡུག་ན་སྔོན་མོའི་ཆུ་ལ་མཉམ་འཐུང་གིས། །
ངང་རྒྱུད་ཕྱི་ཐག་རིང་བའི་གྲོགས་གང་དེས། །
མངར་སྐྱུར་འཚོ་བའི་ནང་ལ་དྲོད་ཅིག་སྟེར། །
མཐོང་མ་ཐག་ནས་གྲོགས་ཞེས་ཁ་སྙན་འབོད། །
འདྲིས་ལོང་མེད་པར་དགྲ་ཡི་རྣམ་འགྱུར་བསྟན། །
ཨ་གསར་ངོ་གཉིས་ཅན་གྱི་མི་དེ་འདྲར། །
སྙིང་གི་གསང་བ་ཤོར་ན་འགྱོད་ཅིག་ཡོད། །
འགྲོགས་ཚད་མཐོང་ཚད་ཡོད་ཚད་གྲོགས་པོ་མིན། །
གྲོགས་པོ་རྣལ་མ་དེ་ལ་ཚད་ཅིག་ཡོད། །
མི་བརྟན་སྐྱིད་སྡུག་འཁོར་བའི་བཤུལ་ལམ་ན། །
དོན་གྱི་གྲོགས་པོ་ཡོད་ན་སྐྱིད་ཅིག་ཡོད། །
དགའ་ན་ཉེ་ནས་བགད་མཁན་གྲོགས་པོ་མིན། །
སྡུག་དུས་ཟུར་ནས་ངུ་མཁན་གྲོགས་པོ་ཡིན། །
མདོར་ན་སྐྱིད་སྡུག་འཚོ་བའི་འཕྲེད་ལམ་ནས། །
ནམ་ཡང་ལག་གདང་སྦྲེལ་ན་གྲོགས་པོ་ཡིན། །
ངོ་བསྟོད་མཐེ་བོང་ཀེར་མཁན་གྲོགས་པོ་མིན། །
གཤེ་དང་བསྐུལ་ལྕག་གནང་མཁན་གྲོགས་པོ་ཡིན། །
ཁྱོད་ལ་འགན་འཁྲི་ལྷག་བསམ་གཙང་མ་ཡིས། །
བླང་དོར་ཐེ་ཇུས་མཁན་དེ་གྲོགས་པོ་ཡིན། །
ཆང་ཕོར་ཁ་ཡི་སྙིང་གཏམ་དེ་ཙམ་རེད། །
དམིགས་ཡུལ་ཅན་གྱི་འཛུམ་མདངས་ཅི་ཡང་མིན། །
མགོ་བདེ་བློ་ཆུང་ཅལ་གྱིས་མ་འདྲོགས་པར། །
གྲོགས་དང་གྲོགས་ཀྱི་དབྱེ་བ་འབྱེད་པ་གལ། །
དོན་གྱི་གྲོགས་པོ་འཁོར་བའི་ལམ་གྲོགས་རེད། །
སྙིང་གི་གྲོགས་པོ་དགའ་སྐྱོ་སྡུག་རོགས་རེད། །
ནམ་ཡང་དམ་ཚིག་གཙང་མའི་རྩ་དོན་གྱིས། །
མཐུན་པའི་ལག་གདང་མ་འཐོར་སྙིང་གི་གཏམ། །
དང་པོ་གྲོགས་ལ་བརྟག་ནས་བསྒྲིག་པ་གལ། །
བར་དུ་གྲོགས་དང་དམ་ཚིག་བརྟན་པ་གལ། །
མཐའ་མ་སྐྱིད་སྡུག་ལྷན་དུ་མྱོང་བ་གལ། །
གལ་པོ་གསུམ་འདི་རང་ལ་དྲན་བསྐུལ་ཡིན། །
གྲོགས་ཀྱི་བར་ལ་རྩོད་དང་འཐབ་པ་ཡོད། །
གྲོགས་པོའི་བར་ལ་བགད་དང་ངུ་བ་ཡོད། །
འོན་ཀྱང་ནམ་ཡང་འཁོན་འཛིན་མེད་པ་ཡི། །
ཡིད་ཆེས་བློ་འཁེལ་རྩ་བའི་དམ་ཚིག་ཡིན། །
འདྲེས་སླ་ཨ་གསར་ཅན་དེ་མ་ཉེ་དགོས། །
བློ་དཀར་གཞུང་དྲང་ཅན་དེ་མ་རིང་དགོས། །
ཤ་ཚ་སྙིང་དང་ཉེ་བའི་གྲོགས་གང་དང་། །
ཚེ་གཅིག་ཡུན་ལ་འགྲོགས་པའི་དམ་བཅའ་དགོས། །
མདོར་ན་རང་ལ་བརྩེ་བའི་མི་དག་དང་། །
གང་ལྟར་རང་ཉིད་དུང་བའི་མི་དེ་དག །
དུས་ལ་འགྱུར་བ་ཡུལ་གྱི་བསྐལ་བ་སོགས། །
འཕྲལ་རྐྱེན་ངན་པས་སེམས་ཁ་མ་གསོད་དགོས། །
རྩོམ་གསར། 10