ལྷ་ཚོགས་དགྱེས་པའི་ཐུགས་བརྩེའི་ཀློང་ནས།།
རྟེན་འབྲེལ་བྱིན་རླབས་ཆར་དུ་བསྙིལ་སོང་།།
བརྒྱ་སྦྱིན་ཆེན་པོའི་གཙུག་གི་རྒྱན་དུ།།
མཚོ་འབྱུང་ནོར་བུའི་འོད་དཀར་འགྱེད་སོང་།།
 
ཟླ་བའི་མ་མའི་མཁུར་ཚོས་ངོས་ལ།།
ཚངས་སྲས་བུ་མོའི་ཕྱག་གིས་བྱིལ་སོང་།།
སྐྱེ་དགུའི་དྭངས་བ་ངང་གིས་འདྲེན་པའི།།
དྲི་ཟའི་རྒྱུད་མངས་སུ་ཡིས་དཀྲོལ་སོང་།།
 
ཆུ་འཛིན་བུ་མོའི་ལང་ལོང་མངལ་ནས།།
མུ་ཏིག་བདུད་རྩིའི་དོག་པ་འཐོར་སོང་།།
ཆུ་སྐྱེས་གསར་བ་འཛུམ་པའི་ངོས་ལ།།
ར་ཡིག་གཉིས་པས་འོ་ཞིམ་སྦྱར་སོང་།།
 
ཀ་ལི་ཨ་ལིའི་སྡེབ་འཕྲེང་བསྒྲིགས་ནས།།
ས་ཆེན་སྙིང་ལ་སྨོན་པ་བསླངས་སོང་།།
སྙན་པའི་ཚིག་གི་མེ་ཏོག་ཕུལ་ཏེ།།
ས་མཐོའི་རྨི་ལམ་འཇའ་རུ་བཀུག་སོང་།།