ཕ་སྐད་མ་ཡིག་ཚིག་ཏུ་བྱས་ནས།།

བྱེའུ་ཆུང་འཇོལ་མོའི་ངག་གི་རྩལ་ལས།།

གངས་ཅན་བོད་མིའི་རྣ་བའི་བདུད་རྩི། །

རིགས་ཞེན་བུ་མོ་ཁྱོད་ཀྱི་སྙན་དབྱངས། །

ཆོལ་གསུམ་སྤུན་ཟླ་མཉམ་དུ་སྒྲིལ་ཤོག།

མཛའ་བརྩེའི་གསེར་ཐག་ཆད་འདི་མི་ཉན། །

སེམས་ཀྱི་སྙིང་གཏམ་གླུ་རུ་ལེན་པའི། །

(ཞི་བདེ་)སེམས་ཀྱི་ལྷ་བྱ་དཀར་པོ། །

གསར་གཏོད་རིག་པ་བག་མར་ལེན་ཅིག།

སྐད་ཡིག་བུ་ཚ་ལེགས་པར་སྐྱོང་ཞིག།

ཆོས་སྲིད་ཟུང་འབྲེལ་ཁྱིམ་འདི་སྐྱོང་ཞིག །

(བཟའ་མི་གསུམ་)ཀྱི་གཏམ་འདི་སྙན་བྱུང་། །

གར་སྟེགས་སྟེང་གི་ལང་ཚོའི་མེ་ཏོག།

རྩྭ་ཐང་སྟེང་གི་མཚར་སྡུག་མེ་ཏོག།

སྐྱེ་བོའི་སེམས་ཀྱི་སྙིང་གི་མེ་ཏོག།

གངས་ཅན་བོད་མིའི་གླུ་ཡི་ལྷ་མོ། །

ཁྱེད་རང་ཐད་པ་ངོ་མ་སྔ་སོང་། །

ལེན་འཕྲོར་ལུས་པའི་མགུར་གླུ་སུས་ལེན། །

གཅེས་ཕྲུག་ཁོང་ལ་བཀའ་སློབ་སུས་བྱེད། །

ཆོལ་གསུམ་སྤུན་ཟླར་བརྩེ་བ་སུས་གླེང་།།

མ་བརྗེད་ཡི་རངས་ངག་གི་ལྷ་མོ། །

བདེ་བར་ཕེབས་ཤིག་དབྱངས་ཀྱི་ལྷ་མོ། །

གླུ་ལ་དགའ་བའི་སྐྱེ་བུ་ང་འདྲས། །

ཡིག་དྲུག་མ་ཎིས་སྨོན་ལམ་བརྒྱབ་ཆོག།

ལས་འདི་མི་རྟག་རྩྭ་སྟེང་ཟིལ་པ །།

བདེ་བ་མི་རྟག་ཆུ་ནང་ཟླ་བ།།

ཐམས་ཅད་ལས་ཀྱི་བཀོད་ཐང་ཡིན་ན། །

བདེ་བར་ཕེབས་ཤིག་བོད་ཀྱི་གླུ་མ། །