ཕ་མཐའ་མི་མངོན་འཁོར་བའི་གྲོང་ནས།།

ཕ་གཅིག་བླ་མར་གསོལ་བ་འདེབས་དུས།།

ཕ་རོལ་ཕྱིན་བཅུའི་དགོངས་དོན་རྟོགས་པའི།།

ཕ་རྒན་གང་གིས་རྗེས་བཟུང་མཛོད་ཅིག།

ཕ་ལོ་རྒྱང་ལ་བཞུད་པའི་ཤུལ་ན།།

ཕ་སྐད་ཕ་ཆོས་བསྟན་པ་ནུབ་དུས།།

ཕ་བཟང་བུ་དང་བུ་མོའི་དཔུང་སྡེས།།

ཕ་ཤུལ་བུ་ཡིས་ཨེ་ཟིན་ལྟོས་ཤིག།

ཕ་དང་མེས་པོའི་སྲོག་གི་རིན་ཐང་།།

ཕ་རོལ་བདུད་སྡེས་ཨེ་ཆོམ་ལྟ་དུས།།

ཕ་མའི་སེམས་རྟེན་བུ་དང་བུ་མོས།།

ཕར་ལྟ་ཚུར་ལྟ་བྱས་ཏེ་མ་འདུག།

ཕ་ཁྱིམ་འདི་བ་ཚང་གི་ནོར་བུ།།

ཕ་མེས་རུས་པ་ཅན་གྱི་ཟུངས་ཁྲག།

ཕ་སྐད་ཕ་ཆོས་འདི་ལས་མེད་པས།།

ཕ་བཟང་བུ་དང་བུ་མོས་བདག་བྱོས།།

ཕ་ལོ་རྒྱང་དུ་ཕེབས་ཀྱང་ཅི་སྐྱོན།།

ཕ་ཡུལ་སྔར་བཞིན་དར་ན་དེས་ཆོག།

ཕ་བུའི་ཕུགས་ཀྱི་མདུན་མ་དེ་ཡང་།།

ཕ་གཞིས་བདེ་སྐྱིད་ཡོང་རྒྱུ་དེ་རེད།།

ཕ་བཟང་བུ་དང་མ་བཟང་བུ་མོས།།

ཕ་མེས་གོང་མའི་ཁ་ཏ་མ་བརྗེད།།

ཕ་ཁྱིམ་འདི་ཡི་སྲོལ་རྒྱུན་རིག་གནས།།

ཕ་མ་ཇི་བཞིན་བདག་སྐྱོང་བྱེད་དགོས།།

ཕ་རོལ་མི་ཡི་ཁ་ལ་ཉན་ཏེ།།

ཕ་དང་མེས་པོའི་མིང་རྣ་མ་རྫོད།།

ཕ་ས་འདི་ཡི་བདེ་སྡུག་ཡོད་ཚད།།

ཕ་བཟང་བུ་དང་བུ་མོར་ཐུག་ཡོད།།

ཕ་ཡུལ་གངས་ལྗོངས་ལུང་པ་འདི་ནས།།

ཕ་མེས་མཛད་པའི་རྒྱལ་མཚན་བསྒྲེང་ཞོར།།

ཕ་གཞིས་དར་རྒྱས་གོང་འཕེལ་གཏོང་བ།།

ཕ་བཟང་བུ་དང་བུ་མོའི་འགན་འཁྲི།།