ཁ་བ་རྐང་གླིང་། 2017-11-13
པད་མའི་ཁྲི་འཕང་སྟེང་ལ་བཞུགས་མཛད་ཅིང་།
ཕྱག་ཏུ་རྒྱུད་སྟོང་འགྱུར་བག་རྒོད་པོ་བསྣམས།།
དྲི་ཟའི་བུ་མོར་སྐྱེངས་པ་སྟེར་མཁན་མ།།
ཚངས་སྲས་བུ་མོར་གུས་པས་ཕྱག་གསུམ་འབུལ།།
ངག་གི་དཔལ་ལ་དབང་འབྱོར་མཚོ་བྱུང་མ།།
གུས་པས་ལག་ཟུང་ཡར་ལ་བཏེགས་ནས་ནི།།
པི་ཝང་ལེན་པར་ཆས་སོ་ལྷ་མོ་ཀྱེ།།
གཙང་མའི་པང་ལ་གཡོར་ཤོག་ལྷ་གཅིག་མ།།
ཀུན་གསལ་བུ་མོས་ཆུ་འཛིན་གསར་པ་འཐེན།།
སྐྱེ་བསེར་རླུང་བུ་ག་ལེ་ག་ལེར་བསུས།།
འབྲས་ལྡན་དུས་ལ་སླེབས་པའི་སྔོན་བརྡ་ཞིག །
སྦས་པའི་ངང་ནས་འབྱོར་བ་མིན་ནམ་ཀྱེ།།
ས་འཇིན་བུ་མོས་སེར་མདོག་གོས་ལྭ་གྱོན།།
གོས་ལྭ་མཛེས་པོ་འདྲེན་བྱེད་ཡུལ་དུ་འཚེར།།
ཞིང་པ་རྒན་པོར་ལོ་འབྲས་སྨིན་ནོ་ཞེས།།
ལྟ་བྱེད་དབང་པོར་དྲན་སྐུལ་བྱེད་པ་འདྲ།།
སྙེ་མའི་མགོ་ལྕོག་ཐུར་ལ་དུད་ནས་འདུག །
བསིལ་རླུང་འཇམ་པོ་དལ་བུར་ལྡང་བའི་ཚེ།།
རྒྱ་མཚོའི་རླབས་བཞིན་གཡོ་བས་ལྟད་མོ་བཟི།།
སེམས་པས་བསམ་པའི་ཚེ་ན་ཕ་ཡུལ་དྲན།།
ལང་ཚོ་དར་ལ་བབས་པའི་ཕོ་མོ་ཚོས།།
ཐོ་རེངས་མལ་ལས་ལངས་ཏེ་ཞིང་ས་རུ།།
སྐྱིད་པོའི་དབྱངས་ལ་བཀུགས་ཏེ་ལོ་ཏོག་བརྔས།།
ཚག་ཚག་ཤོབ་ཤོབ་ནས་ཀྱི་དྲི་ཞིམ་བྲོ།།
དེང་རབས་འཕྲུལ་གྱི་མེ་ལོང་གསར་པ་ལས།།
རླངས་འཁོར་འདྲ་མིན་སྣ་ཚོགས་ནང་དུ་ཡང་།
ལོ་འབྲས་ལེགས་པོ་བླུགས་ནས་སྐྱོད་པ་འདི།།
མཁའ་ལ་འཁྱུག་པའི་གྲུ་བཞིན་རང་ལམ་བསྙེགས།།
གཡུལ་གཅོག་ལས་སོ་རྩྭ་དང་འབྲུ་དཀར་དབྱེ།།
ནང་ལ་བླུགས་པའི་སྒོ་ཟོག་སེམས་ཅན་ལ།།
སྙིང་རྗེའི་སྒོམ་པ་ཆེན་པོས་གཟིགས་པ་འདྲ།།
ཡ་མཚན་འཕྲུལ་གྱི་བུ་མོས་གཡུལ་ལོ་བྱེད།།
ཞིང་ཐང་ཡངས་པོའི་ངོས་ལ་ཟུག་སྐྱ་ན།།
ལྡིང་བཞིན་འདུག་ལ་མཆོང་བཞིན་འདུག་པའི་ནོར།།
སྐྱིད་པའི་གཞས་ཆུང་ལེན་ལ་བྲོ་གར་འཁྲབ།།
བདེ་བའི་བདེ་སྐྱིད་ཟེར་བར་ལོངས་རེ་སྤྱོད།།
མཚར་སྡུག་འབྲས་ལྡན་དུས་ཀྱི་ལྟད་མོ་འདི།།
གཅིག་མིན་གཉིས་མིན་ལན་མང་བལྟས་ཀྱང་རུང་།།
སེམས་འབྱུང་འདི་ལ་ངོམ་པ་མི་འདུག་གོ།།
འདྲེན་བྱེད་འདི་ལ་ངལ་བ་མེད་པ་འདྲ།།
རྩོམ་གསར། 10