ཞི་འཚོལ། 2017-11-13
སྟོན་ཟླ་སྒོར་མོ་ཆུ་འཛིན་གསེང་ནས་འཛུམ། །
སྡོང་ལོ་སེར་པོ་བསིལ་རླུང་ཡང་མོས་དེད། །
རྩོད་རའི་དྲོད་ཁོལ་སྟོན་མཇུག་ལྷགས་པས་བཅོམ། །
རས་གཟན་རྐྱང་པས་བཙག་རླུང་མི་འགོག་ཀི །
ལྗང་མདོག་སྒེག་མོས་གསེར་ལྡན་ལྭ་བ་བརྗེས། །
ས་འཛིན་རྩེ་མོའི་མཐོངས་ཡངས་གངས་ཀྱིས་བཟུང་། །
འདབ་བཟང་དབང་པོའི་གཤོག་སྒྲོ་འཁྱག་གིས་གཞོམ། །
སྟོན་ཀའི་འཐོར་རླུང་དྲག་པོ་གང་སར་གཡུགས། །
རྐང་དྲུག་འཕུར་ལྡིང་རོལ་རྩེད་འཇམ་པོར་གྱུར། །
པད་མོའི་འདབ་ལོ་ས་རྡུལ་གསེབ་ཏུ་བྱིངས། །
སྟོན་རླུང་ཟད་པོས་གནག་ཕྱུགས་འདར་ཡོམ་བྱེད། །
རྫི་བོ་གཞོན་ནུའི་སྐད་ངག་རླུང་གིས་འཁྱེར། །
དབེན་གསུམ་དག་པའི་ཞིང་གི་གླིང་ག་ན། །
འགྲན་རྩོད་ཐོབ་ཤོར་དུག་གིས་མ་བསླད་པའི། །
རང་བཞིན་བག་ཕེབས་གནས་པའི་སྒོམ་ཆེན་དང་། །
རི་སྐྱེས་རི་དྭགས་ཚོགས་ཀྱིས་ཉི་མ་ལྡེ། །
ཕ་མཐའ་གཞལ་མེད་ཀུན་གསལ་བུ་མོའི་ལྟོར། །
ལན་ཆགས་སྟོང་གི་རྒྱུ་སྐར་ཁྲ་ཚོམ་དག །
ཞོགས་ཀའི་མཚམས་སྤྲིན་གསེང་ནས་དབྱིངས་སུ་ཡལ། །
སྟོན་རླུང་ངར་པོས་སྡོང་ལོ་གང་སར་སྤུར། །
སྒེའུ་ཁུང་དཀྱིལ་ནས་དུང་ཟླའི་དཔལ་ལ་ཅེར། །
སེམས་གཤིས་སྙོམ་པོས་དྲིན་ཅན་ཕ་ལོ་དྲན། །
ཁྲ་ཆུང་མིག་ཀོང་མཐའ་རུ་མཆི་ཞགས་འཁྱིལ། །
སྟོན་གྱི་ཟླ་བ་སྐྱོ་གདུང་འཕེལ་དུས་ཤིག །
ཆར་ཀྱི་པད་མོ་གངས་ཀྱི་འདབ་མར་སྤྲུལ། །
སེམས་ཀྱི་པད་མོར་འཁྱག་གི་ཐིགས་པ་ལྷུང་། །
ཉག་གའི་ཐད་ནས་ཉི་མ་ཁོག་འདར་ཤོར། །
ཞོགས་པའི་དུ་ལྗང་བ་མོའི་ཁ་རླངས་འཁྲུལ། །
རྩོམ་གསར། 10