ཤ་དང་ཁྲག་རུས་ཀྱི་ཐོབ་ཐང་གཅིག་རུང་།།
གོ་དང་ངོ་སོ་ཡི་ཁེ་ཕན་དྲན་ན།།
ཁྲེལ་མེད་རྒན་པོ་དེའི་བསླུ་བྲིད་གསེབ་ནས།།
ཨ་མའི་ལས་དབང་འདི་གླེང་དགོས་བྱུང་སོང་།།
ཐོབ་དཀའི་མི་ཚེ་འདི་ལྡོག་མེད་ཐེངས་གཅིག།
རྒྱུ་དང་འབྱོར་བ་ཡི་གཟབ་འཆོར་དགོས་ལ།།
ལང་ཚོའི་ཤོག་དཀར་གྱི་མེ་ལོང་ངོས་སུ།།
བབ་ཅོལ་རྫུན་གཏམ་ཞིག་འབྲི་ན་འདོད་དམ།།
ཞེན་སྣང་ཁྲེལ་དགོད་ཀྱི་ལས་དབང་གཉོམ་པོ།།
གཞན་གྱི་ངོ་སོ་ལ་བརྩི་སྲུང་དགོས་ལ།།
མི་འདོད་བཙན་དབང་གི་གཉེན་གྱི་སོ་ཁ།།
དུང་དུང་གཉོམ་གཉོམ་གྱི་ཁུར་དགོས་བྱུང་འདུག།
འཇིག་རྟེན་སྲིད་པ་འདི་བྲོ་ར་ཆེན་པོ།།
མི་ཚོགས་འདུ་འཛི་དེ་ཟློས་གར་མཁན་པོ།།
འཚོ་བའི་ཁྲེལ་དགོད་འདི་སྒྲ་དབྱངས་གསོན་པོ།།
བརྙས་བཅོས་གདོང་འབག་ཅིག་གྱོ ན་དགོས་བྱུང་འདུག།
ཨ་ཕའི་ཞལ་གདོང་གི་གཉེར་རིས་དོད་པོ།།
དུང་དུང་ཞེན་ཞེན་གྱི་བཀུར་བསྟི་དགོས་ལ།།
མི་གཙང་བྲན་གཡོག་གིས་གཙེས་པའི་བུ་མོ།།
མནར་གཅོད་རྡུང་རྡེག་གི་མཚོ་ལས་ཐར་རམ།།
གཞོན་པའི་ཤེས་རིག་གི་མཁའ་དབྱིངས་འདི་ནས།།
འཚོ་བའི་བརྩེ་དུང་གི་རྨི་ཐག་བཅོས་མ།།
ལང་ཚོའི་མཛེས་སྡུག་གི་བཅོམ་བྱེད་རྐུན་པོ།།
བཙན་དབང་ཁེ་མེད་ཀྱིས་དྲུད་དེ་བུད་སོང་།།