རྫ་གཞུང་གི་ཉིན་སྲིབ་ཀུན་པོ་ཁ་བས་མནན་ལུགས་ལ་བལྟས་ན།རྫ་གཞུང་གི་ཉི་མ་འདིའང་དེ་ཙམ་ཚ་དྲོད་མེད་པ་ཤེས་ཐུབ་ལ།རྫ་གཞུང་གི་ཞོགས་པ་ཧྲིལ་པོ་དུ་སྤྲིན་གྱིས་བསྒྲིབས་ལུགས་ལ་བརྟགས་ན་ཡུལ་འདི་ནི་འབྲོག་སྡེའི་ཉམས་ཀྱིས་ཕྱུག་པའི་གྲོང་ཚོ་ཆུང་ཆུང་ཞིག་ཡིན་པའང་ཚོར་ཐུབ། ཡུལ་རྫ་གཞུང་ནི་ངོ་མ་ཕྱུག་པོ་མོད་སའི་ས་ཆ་ཞིག་རེད། ཡུལ་འདི་ཡིས་འགྲོ་གྲོན་ཡོད་ཚད་ཁང་པ་དང་རླངས་འཁོར་གཉིས་ལ་གཏོང་བ་ནི་དངོས་ཡོད་གནས་ཚུལ་གྱིས་ང་ཚོར་ར་སྤྲོད་གསལ་པོར་བྱས་མི་འདུག་གམ། ལམ་གྱི་བཞི་མདོ་ན་འཛད་མཐའ་མེད་པའི་རླངས་འཁོར་དག་གཅིག་ལས་གཅིག་རྫིག་གི་འགྲོ་འོང་རྒོད་ཅིང། དུད་ཚང་སོ་སོའི་ཁང་པའི་ཐོག་བརྩེགས་སྟེང་དུ་ཐོན་ཏེ་ཡར་ལ་ལྟ་སྐབས། གནམ་སྔོན་པོ་ཡང་ཁ་ཐག་ཉེ་བའི་སེམས་ཚོར་སྟེར།

“སུ་རུག་སྡེ་བའི་དུད་པ་འདི་ཚོ་ཕྱུག་བདག་རྐྱང་རྐྱང་ཡིན་ཚོད་རེད།

ཁང་པ་ཐོག་བརྩེགས་ཕུད་དེ་ངེད་ཚང་གི་ཉི་མ་བསྒྲིབས་སོང་ཐལ།

ལྟོས་དང་། ཕྱི་དྲོའི་ཆུ་ཚོད་གཉིས་པ་ཡོལ་འགྲོ་གྲབས་འདུག་ཅིང་། ད་དུང་ཁང་པའི་ནང་དུ་ཉི་ཐིག་ཙམ་ཡང་ཕོག་ཐབས་མི་འདུག ཡ་ཡ། ད་ནི་ངས་ཀྱང་ཐོག་ཁང་ཞིག་བརྩེག་མ་ཐུབ་ན།མི་ཡིས་མི་ལ་བརྙས་ཡོང་གི་གདའ།”སྐད་ཆ་དེ་ལྷ་སྐྱབས་ཀྱིས་བཤད་པ་རེད། དེ་ནས་བཟུང་ལྷ་སྐྱབས་ཀྱིས་ཐོག་ཁང་བརྩེག་རྒྱུའི་སེམས་ཐག་བཅད་ཅིང་། གཉེན་ཉེ་དུ། ཁ་ཡག་ན་ཟླ་སོགས་ཀྱི་ལག་ནས་སྒོར་མོ་ཁྲི་སྟོང་མང་པོ་བསྐྱིས་ནས་ལོ་དེའི་སོས་ཀ་ནས་བཟུང་ཁོས་མཱ་ཀྲིན་ལུན་ཞེས་པའི་ཁ་ཆེའི་སྦྱིན་བདག་ཅིག་ལ་འབྲེལ་བ་བྱས་ཏེ་ཁང་ལས་བྱེད་མི་སུམ་ཅུ་ཙམ་ཞིག་གླས་འོངས་པ་དང་ཁང་པ་བརྩེག་འགོ་ཚུགས་ཤིང་། དབྱར་ཟླ་བདུན་པའི་ཟླ་མཇུག་ལ་གཞི་ནས་ལེགས་འགྲུབ་བྱུང་བར་མ་ཟད། ད་དུང་ཁང་པའི་ནང་གི་ཁང་མིག་རེ་རེ་ལ་ཡང་གླུ་གར་ཁང་གང་རུང་ཞིག་གི་ནང་དུ་ཐོན་སོང་སྙམ་པའི་རྒྱས་སྤྲོས་ཅན་གྱི་མཛེས་བཟོའང་བྱས་སོང་བ་དང་། ཁ་ཡ་ན་ཟླ། ཡག་ས་བཟང་ས་སོགས་མགྲོན་དུ་བོས་ཡོང་ནས་ཁང་སྟོན་ཡང་གྲ་རྒྱས་པོ་བཤམས་སོང་།

མི་ཚོའི་བཤད་སྒྲོས་ལ་ལོ་འདིར་རྫོང་ཡོངས་ཀྱི་དུད་ཚང་ཧ་ལམ་བཅུ་ཕྲག་དུ་མས་ཁང་པ་གཉིས་ཐོག་དང་སུམ་ཐོག་ཅན་རེ་བཞེངས་ཡོད་སྐད། ལྷ་སྐྱབས་ཚང་ཡང་དེ་ཚོའི་གྲས་ཀྱི་གཅིག་ཡིན། འོན་ཀྱང་མིའི་ནུས་པ་ལ་ཚད་ཡོད་ཅིང་རེ་བ་ལ་ཚད་མེད་པས་ན་མི་སེམས་སྟོང་པ་ལ་གང་རྒྱུ་ཅི་ཡོད། དུད་རོགས་འདི་ཚོར་རླངས་འཁོར་དེ་འདྲའི་རྫིག་པོ་རེ་སྐོར་རྒྱུ་འདུག། ངས་ཀྱང་སྒོར་མོ་བསྐྱི་གཡར་བསྣོག་གསུམ་བྱས་ཏེ་རླངས་འཁོར་རྫིག་པོ་ཞིག་མ་ཉོས་ན་བུ་མིན་སེམས་ཤིང་། ལྷ་སྐྱབས་ཀྱིས་ཡང་བསྐྱར་རླངས་འཁོར་གོང་ཆེན་ཞིག་ཉོ་རྒྱུའི་སེམས་ཐག་བཅད་སོང་། ཏག་ཏག་སློབ་གུང་གནང་ཚར་བའི་རྗེས་སུ་ཁོས་ལག་བརྒྱུད་རླངས་འཁོར་ལན་ཏེ་ཁུའུ་ལུའུ་ཙེ་རྫིག་ཐག་ཆོད་ཅིག་ཉོས་འདུག་ཅིང་། རླངས་འཁོར་དེ་ཡི་ནང་དུ་འཛུལ་མ་ཐག་ཁོ་རང་གཞི་ནས་མི་གཞན་ཞིག་ཏུ་འགྱུར་འགྲོ་ཞིང་། བལྟས་ཚོད་ལ་གནམ་འོག་འདིར་ང་མིན་ན་སུ་ཡིན་སྙམ་པའི་བཟོ་ལྟ་གཞན་ཞིག་འཆོས་འགྲོ་ལ།

བོས་པའི་གཏམ་ལན་ཕར་ཞོག་མི་གཞན་གྱི་ངོ་ལ་ལྟ་ཙམ་ཡང་བྱ་མི་སྲིད། འོན་ཀྱང་ཁོས་མི་གཞན་ལ་ཁྲལ་དང་བུ་ལོན་དགོས་པ་བརྗེད་དེ།

དུས་རྒྱུན་ཁྱིམ་མི་ཚོར་ཡང་མཆུ་ཏོ་མུག་མུག་གིས་ཅི་ཞིག་འཆད་བཞིན། གཞན་ལ་འགྲན་རྩོད་རེ་སློང་ཞིང་ལྕེ་ཕར་བསྒྱུར་ཚུར་བསྒྱུར་གྱིས་དུས་འདའ་བར་བྱེད། དེ་རིང་ནི་ཁོ་ཁྱིམ་ལ་ཚུགས་ཡུན་རིང་བའི་ཉི་མ་དེ་ཡིན། ཉིན་དེར་ཁོས་སྔ་མོ་ནས་འདྲིས་ཆེ་བའི་ཆོས་དཔེ་སྣ་རིང་མ་དེ་ཕྱིར་བསློགས་ཏེ་ཉམས་དོད་པའི་ངང་ནས་ཅི་ཞིག་འདོན་བཞིན་འདུག

“ཏིག……ཏིག…ཏིག་ཏིག”ཕྱི་རོལ་ནས་སྒོ་བརྡུངས་སོང་།

ཁོས་ཁང་སྒོ་ཅུང་ཙམ་རྡུང་དུ་བཅུག་རྗེས་སྒོ་ཕྱེས།

“འོ་བརྒྱལ། ཤག་པོ་ལྷུན་གྲུབ་ཁྱོད་བདེ་མོ།”ལྷ་སྐྱབས་ཀྱིས་ཁོའི་ལག་པར་བཟུང་སྟེ་མི་གཏོང་།

“བདེ་མོ་ཡིན།”

“བཞུགས། བཞུགས།”

“ཨེའོ། ལྷ་མོ།…ལྷ་མོ། འདི་རུ་འོ་ཇ་ཁྱེར་ཤོག་དང་།”

“ལྷ་མོ། ཤ་ཚོས།”

“ཧིན…”ལྷ་སྐྱབས་ཀྱིས་ཧ་ཅང་ནག་པའི་ངོ་གདོང་ལས་ཤིན་ཏུ་དཀར་བའི་སོ་དག་སྟོན་ཙམ་བྱེད་ལ། ཅོ་སྤུ་ཧ་ལམ་མེད་པའི་ཀླད་དཀྱིལ་དུ་ཕུར་ཕུར་བྱེད། ལྷུན་གྲུབ་ཀྱིས་གཞི་ནས་ཁ་གྲག་བྱུང་།

“ཨིམ།…ད་ཤ་མ་བཙོ། ང་ཡུན་རིང་ཁོམ་གྱི་མེད།”

ལྷུན་གྲུབ་ཀྱིས་གློ་ལུད་ཅིག་བྱས་རྗེས།

“ང་སྔོན་མའི་དོན་དག་དེའི་ཕྱིར་དུ་ཡོང་བ་ཡིན།

ཨིན…སྤྱི་ལོ2022ལོའི་ཟླ10པའི་ཚེས་པ5ལ་ཁྱོད་ཀྱིས་ངའི་ལག་ནས་སྒོར་མོ་ཁྲི་གཉིས་བསྐྱིས་སོང་བ་དང་།ཕྱི་ལོ2023ལོའི་ཟླ10 པའི་ཚེས་པ5ལ་དངུལ་ཁྲལ་ཕྱིར་ལ་འཇལ་རྒྱུ་ཞེས་བྲིས་འདུག”ཅེས་བཤད་རྗེས་ཁོས་ཤོག་ལྷེ་ཞིག་ཁོའི་ལག་ན་བཞག། ལྷ་སྐྱབས་ཀྱིས་ད་གཟོད་གློ་རྒྱབ་ལ་ཅི་ཞིག་དྲན་སོང་བ་བཞིན།“འོ— རེད་རེད།—

ངའི་སར་ཡང་གན་རྒྱའི་ཡི་གེ་དེ་རང་འདུག།

ཨ་བོ་ལོ་ལོ། ངའི་ཤག་པོ་སྐུ་ཚེ་བརྟན་རྒྱུ་བོ།

ཁང་པ་བརྒྱབ་མ་ཐག་རླངས་འཁོར་ཞིག་ཀྱང་ཉོ་སྤྱད་ཨེ་རྙེད་བལྟས་བཞག་པས། གནས་སྐབས་ལ་དངུལ་ཁྲལ་འཇལ་རྒྱུ་ལར་ནས་མེད།

ལོ་རྗེས་མར་དབྱར་རྩྭ་དགུན་འབུ་བརྐོས་ཚར་རྗེས།ཅི་དྲག་གང་དྲག། གང་མྱུར་ཅི་མྱུར་གྱིས་བུ་ལོན་འཇལ་ཐབས་བྱེད་ཡོང་ལགས…”ཁོས་ཉམ་ང་བའམ་ཡི་མུག་པའི་རྣམ་འགྱུར་ཅི་ཡང་བསྟན་པས་ད་གཟོད་ཤག་པོའི་ཁ་ལས་ཐར་ཙམ་བྱུང་། དེ་ནས་བཟུང་ཁོང་ཚང་ལ་འགྲུལ་པའང་ཇེ་མང་ལ་སོང་འདུག་པར་མ་ཟད་ཉིན་མ་རེར་ཕལ་ཆེར་འགྲུལ་པ་འགྲོ་འོང་གི་རྒྱུན་མི་ཆད། ཆ་རྒྱུས་མེད་པའི་སྡེ་བ་གཞན་པས་བསམས་ན་ཕྱུག་པོ་ཚང་དུ་འགྲུལ་པ་མང་བ་ཆོས་ཉིད་རེད་བསམ་འོངས་ལ། ཕྲག་དོག་དང་ཡིད་སྨོན་མཉམ་དུ་བསྐྱེད་པར་བྱེད། དོན་དུ་འགྲུལ་པ་དེ་དག་མང་ཤོས་དེ་བུ་ལོན་གྱི་དོན་དག་ཏག་ཏག་རེད། དེ་ལྟ་ནའང་། ལྷ་སྐྱབས་ལ་ཁ་པར་གྱི་སིར་སྒྲའང་རྒྱུན་མི་ཆད།

དགོང་མོ་ཞིག་ལ་ལྷ་སྐྱབས་བཟའ་ཉོབ་ཚོ་དང་ལྷན་དུ་དགོང་ཟས་ལ་རོལ་བཞིན་པའི་སྐབས་སུ་རིག་མ་མྱོང་བའི་ཨང་གྲངས་གསར་པ་ཞིག་གིས་ཁ་པར་བཏང་སོང་།“སི་ལི་ལི…སི་ལི་ལི…”

“ཝེ… ལྷ་སྐྱབས་ཡིན་ནམ”

“ཡིན། ཁྱོད……”

“ང་རྫོང་ཁྲིམས་ཁང་ནང་གི་ཁྲིམས་དཔྱོད་མི་སྣ་ཞིག་ཡིན།

ཁ་ཉིན་མི་འགས་ང་ཚོའི་ཁྲིམས་ཁང་ལ་གཏུག་བཤེར་བྱས་སོང་བས། སང་ཉིན་ཞོགས་པའི་ཆུ་ཚོད་དགུ་པའི་ཐོག་ནས།གྲོང་ཚོ་གསར་པའི་ཁྲིམས་ཁང་ནང་ལ་ཐོན་ཐུབ་པ་གྱིས་ཤོག”“རྫོང་ཁྲིམས་ཁང་ནང་གི་ཁྲིམས་དཔྱོད་མི་སྣ་ཞིག་ཨེ…”

“ད་མང་པོ་མ་འདྲི། སང་ཉིན་ཡིན་གཅིག་མིན་གཅིག་ཐོན་ཐུབ་ལེ་གྱིས།”ཞེས་བཤད་རྗེས་ཁ་པར་གྱི་སྒོ་ཤར་མར་བརྒྱབ་སོང་།

མི་དེའི་ཁ་ནང་ལས་ཕྱིར་ལ་མཆེད་ཡོང་པའི་ཚིག་དེ་དག་དང་ཁོའི་སྐད་གདངས་ཀྱི་ཟིལ་ཤུགས་ཧ་ཅང་ཆེ། རེ་ཞིག་ལ་ལྷ་སྐྱབས་ཀྱི་ངག་ཀྱང་འགག་པར་གྱུར། ཅུང་ཙམ་གྱི་རྗེས་སུ་ཁོའི་སྙིང་ཡང་དལ་གྱིས་ལྷེམ་ལྷེམ་ངང་ལྡིང་བ་དང་ངོ་མདོག་ཀྱང་གཞན་ཞིག་ཏུ་ལོག་འདུག་ཅིང་།

མགོ་བོ་གུག་གུག་བྱས་ཏེ་ལག་གཡས་པས་ཐོད་པར་ཕུར་ཕུར་བྱེད་བཞིན་ཅི་ཞིག་ལ་བསམ་བློ་གཏོང་གིན་འདུག“—”