ཧྲེན་དབྱང་དང་ཧྥུང་ཧྥ་ཀུའེ་ཡིས་དར་མདོ་གུར་དྲག“8·03”གྱི་ཆུ་ལོག་གནོད་འཚེ་ཚབས་ཆེན་ལ་ཁ་གཏད་གཅོག་པའི་བཀོད་འདོམས་པུའུ་ཡི་གྲོས་ཚོགས་སུ།

མི་གཙོ་བོར་འཛིན་པ་རྒྱུན་འཁྱོངས་ནས་དུས་ཚོད་སྐར་ཆ་ཙམ་ཡང་འཕྲོག་པ་དང་། ཤུགས་ཡོད་རྒུས་ཉེན་སེལ་རོགས་སྐྱོབ་བྱས་ནས་གནོད་ཐེབས་མང་ཚོགས་བཀོད་སྒྲིག་འགན་ལེན་ལས་ཀ་ཡག་པོ་བསྒྲུབ་དགོས་ཞེས་ནན་གསུང་གནང་།

     སྤྱི་ཟླ8ཚེས4ཉིན་ཁུལ་ཨུའི་ཧྲུའུ་ཅི་དང་བཀོད་འདོམས་པུའུ་ཡི་བཀོད་འདོམས་མགོ་དཔོན་ཧྲེན་དབྱང་གིས་དར་མདོའི་གུར་དྲག“8·03”གྱི་ཆུ་ལོག་གནོད་འཚེ་ཚབས་ཆེན་ལ་ཁ་གཏད་གཅོག་པའི་བཀོད་འདོམས་པུའུ་ཡི་ཚོགས་འདུ་གཙོ་སྐྱོང་གནང་སྟེ། ཞིང་ཆེན་ཏང་ཨུའི་ཧྲུའུ་ཅི་ཝང་ཞའོ་ཧུའེ་དང་ཞིང་ཨུའི་ཧྲུའུ་ཅི་གཞོན་པ་ཧྲི་ཞའོ་ལིན། འཚུབ་བསྟུན་དོ་དམ་པུའི་འབྲེལ་ཡོད་མགོ་ཁྲིད་བཅས་ཀྱིས་གནོད་འཚེ་ཐེབས་ཡུལ་དངོས་སུ་མཛུབ་ཁྲིད་གནང་སྐབས་ཀྱི་མཛུབ་སྟོན་དང་བླང་བྱ་བརྒྱུད་བསྒྲགས་དང་ལག་ལེན་མཐར་ཕྱིན་བསྟར་བ་རེད། དར་མདོ་དང་གུར་དྲག་ཕྱོགས་གཉིས་དང་ཚོ་ཆུང་ཁག་གིས་ལས་ཀ་སྤེལ་ཚུལ་ལ་གསན་འཇོག་གནང་རྗེས། ཁོང་གིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གནོད་འགོག་གནོད་བསྙུང་གནོད་སྐྱོབ་ལས་དོན་སྐོར་གྱི་མཛུབ་སྟོན་གལ་ཆེན་གྱི་དགོངས་དོན་སློབ་སྦྱོང་དང་ལག་ལེན་མཐར་ཕྱིན་བསྟར་ནས་མཆན་བཀོད་མཛུབ་སྟོན་བླང་བྱ་ཁྱོན་ཡོངས་ནས་དོན་འཁྱོལ་བྱེད་ཅིང་། ཐོག་མཐའ་བར་གསུམ་དུ་མི་གཙོ་བོར་འཛིན་པའི་འདུ་ཤེས་བརྟན་པོ་བཅངས་པ་དང་དུས་ཚོད་སྐར་ཆ་ཙམ་ཡང་འཕྲོག་རེས་བྱས་ནས་ཤུགས་ཡོད་རྒུས་ཉེན་སེལ་རོགས་སྐྱོབ་བྱེད་པ་དང་། གནོད་འཚེ་ཐེབས་པའི་མང་ཚོགས་བཀོད་སྒྲིག་འགན་ལེན་ལས་དོན་ཡག་ཅིང་ཏན་ཏིག་བསྒྲུབ་དགོས་པའི་ནན་གསུང་གནང་བ་རེད།

     ཁུལ་ཨུའི་ཧྲུའུ་ཅི་གཞོན་པ། ཁུལ་དཔོན། བཀོད་འདོམས་པུའུ་ཡི་བཀོད་འདོམས་མགོ་དཔོན་ཧྥུང་ཧྥ་ཀུའེ་ཚོགས་འདུར་ཞུགས་པ་དང་འབྲེལ་ལས་དོན་བཀོད་སྒྲིག་ཞིབ་ཕྲ་གནང་བ་དང་། ཁུལ་ཨུའི་ཧྲུའུ་ཅི་གཞོན་པ། བཀོད་འདོམས་པུའུ་ཡི་བཀོད་འདོམས་མགོ་དཔོན་གཞོན་པ་ཏེང་ལི་ཅུན་ཚོགས་འདུར་ཞུགས་ཡོད།

     གནོད་འཚེ་ཐོན་རྗེས་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས་མཐོང་ཆེན་ཚད་མཐོན་པོར་བྱས་ནས་འཚུབ་བསྟུན་དོ་དམ་པུའུ་ཡི་ཏང་ཨུའི་ཨུ་ཡོན། ཀྲུང་གོ་ས་ཡོམ་ཅུས་ཀྱི་ཅུས་ཀྲང་ཝང་ཁུན་གྱིས་རྒྱལ་ཁབ་གནོད་འགོག་གནོད་བསྙུང་གནོད་སྐྱོབ་ཨུ་ལྷན་གྱི་ལས་དོན་ཚོ་ཆུང་ཁྲིད་ནས་ཡུལ་དངོས་སུ་རོགས་སྐྱོབ་ཐག་གཅོད་ལས་དོན་ལ་མཛུབ་ཁྲིད་གནང་བ་དང་ཞིང་ཨུའི་ཧྲུའུ་ཅི་ཝང་ཞའོ་ཧུའེ་དང་ཞིང་ཨུའི་ཧྲུའུ་ཅི་གཞོན་པ། ཞིང་དཔོན་ཧྲི་ཞའོ་ལིན་གནོད་འཚེ་ཐེབས་ཡུལ་གྱི་འཐབ་ཕྱོགས་དང་པོར་རོགས་སྐྱོབ་དང་ཉེན་སེལ་བཀོད་གཏོང་གནང་བ་རེད།ཁུལ་ཡོངས་ཀྱི་རྒྱ་ཆེ་བའི་ལས་བྱེད་པ་དང་མང་ཚོགས་དང་ཕྱོགས་ཁག་གི་རོགས་སྐྱོབ་སྟོབས་ཤུགས་ཀྱིས་བཀའ་འབྱོར་བ་དང་མགྱོགས་མྱུར་བསྡུ་རུབ་བྱས་ཏེ་དུས་ཐོག་ཏུ་མི་སྣ་འཚོལ་སྐྱོབ་དང་རོགས་སྐྱོབ་བགྲོད་ལམ་མགྱོགས་པོར་གཏོད་པ། གནོད་ཐེབས་མང་ཚོགས་བཀོད་སྒྲིག་བཅས་བྱས་པས། མིག་སྔར་རོགས་སྐྱོབ་ལས་དོན་ཁག་ཛ་དྲག་དང་གོ་རིམ་ལྡན་པའི་ངང་སྤེལ་བཞིན་ཡོད་པ་རེད། ཧྲེན་དབྱང་དང་ཧྥུང་ཧྥ་ཀུའེ་སྔ་ཕྱིར་དར་མདོ་ཕྱོགས་ཀྱི་བཀོད་འདོམས་པུའུ་དང་གུར་དྲག་ཕྱོགས་ཀྱི་བཀོད་འདོམས་པུའུ་ལ་ཕེབས་ནས་གྲོས་ཚོགས་ཐེངས་མང་འཚོགས་ཏེ། དེང་སྐབས་གནས་ཚུལ་སྤྱི་འདོམས་བཀོད་སྒྲིག་གནང་བ་རེད། ཡུལ་དངོས་སུ་གུར་དྲག་གྲོང་རྡལ་རི་བརྒལ་གྲོང་སྡེ་དང་ཟམ་པ་རྡིབ་སའི་ཡུལ་དངོས་སུ་མང་ཚོགས་ཀྱི་སྡོད་ཁང་དང་འགྲིམ་འགྲུལ་གཏོར་བཤིག་ཐེབས་ཚུལ། གཞུང་ལམ་མྱུར་ལས་བྱས་ཚུལ་ལ་ལྟ་ཞིབ་དང་དར་མདོ་སྨན་ཁང་གཉིས་པ་དང་གུར་དྲག་བཀོད་འཇོག་སར་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་། ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་བཅས་ཀྱིས་གནོད་ཐེབས་མང་ཚོགས་ལ་ཐུགས་ཁུར་དང་དོ་ཁུར་བྱེད་ལུགས་བརྒྱུད་བསྒྲགས་གནང་། ཚང་མས་ཉེན་མེད་ལ་དོ་སྣང་དང་ཚན་རིག་དང་མཐུན་པའི་སྒོ་ནས་སྐྱོབ་པ། ཞོར་ཐོན་གནོད་འཚེ་སྔོན་འགོག་ནན་པོ་བཅས་བྱས་ཏེ་གྱོང་གུན་ཆུང་དུ་གཏང་དགོས་པའི་ཐུགས་རེ་གནང་བ་རེད།

     ཚོགས་འདུར་མིག་སྔར་ཉེན་སེལ་རོགས་སྐྱོབ་ལས་དོན་དེ་འགག་རྩའི་དུས་སུ་སླེབས་ཡོད་པས་རིམ་པ་དང་སྡེ་ཚན་ཁག་གིས་བསྟུད་མར་འབད་འཐབ་བྱེད་པའི་སྙིང་སྟོབས་དར་སྤེལ་བཏང་ནས་ཆུ་ཚོད72རིང་གར་སོང་ཆ་མེད་དུ་གྱུར་པའི་མི་ཤུགས་ཡོད་རྒུས་ཚགས་བཤེར་དང་འཚོལ་སྐྱོབ་བྱས་ཏེ་མི་སྣ་ཤི་རྨས་བྱུང་ཚད་ཆུང་དུ་གཏོང་གང་ཐུབ་བྱ་དགོས་ཞེས་བསྟན་པ་རེད།

     ཚོགས་འདུར་ཁུལ་ཡོངས་སུ་འབྲུབ་འགོག་གི་སྤྱི་ཟླ་བདུན་པའི་སྨད་དང་བརྒྱད་པའི་སྟོད་ཀྱི་འགག་རྩའི་དུས་སུ་སླེབས་ཡོད་པ་དང་འབྱུང་འགྱུར་ཉིན་ཤས་ནང་སྔོན་དཔག་བྱས་ན་ད་དུང་ཆར་པ་དྲག་པོ་འབབ་རྒྱུ་རེད། ཉེན་སེལ་རོགས་སྐྱོབ་ཀྱི་ལས་འགན་སྔར་བཞིན་རྙོག་འཛིང་ཆེ་ཞིང་ལྕི་བ་ཡིན་པས། ཁུལ་ཡོངས་ཀྱི་རིམ་ཁག་དང་སྡེ་ཚན་སོ་སོས་ཆུ་འབྲུབ་དུས་ཀྱི་ཉེན་མེད་དོགས་ཟོན་ལས་དོན་ཡག་པོ་སྒྲུབ་པའི་རང་བཞིན་གལ་ཆེན་ལ་ངོས་འཛིན་གང་ལེགས་བྱས་ཏེ་ས་གཤིས་གནོད་འཚེའི་ལྟ་ཞིབ་ཚད་ལེན་དང་སྔོན་ཚུད་ཉེན་བརྡ་གཏང་རྒྱུར་ཤུགས་ཏན་ཏིག་བརྒྱབ་སྟེ་རིགས་ཁག་གི་ཉེན་ཁ་དང་མངོན་མེད་རྐྱེན་ངན་ཁྱོན་ཡོངས་ནས་ཚགས་བཤེར་བྱས་ནས་མི་སྣ་ཤི་རྨས་བྱུང་བའི་དོན་རྐྱེན་སླར་ཡང་མི་ཐོན་པ་མཐའ་གཅིག་ཏུ་བྱ་དགོས་པའི་བླང་བྱ་བཏོན་པ་རེད། འགྲིམ་འགྲུལ་དང་གློག་ཤུགས། འཕྲིན་གཏོང་སོགས་གཏོར་སྐྱོན་ཐེབས་པའི་རྨང་གཞིའི་སྒྲིག་བཀོད་ཉམས་གསོ་དམ་འཛིན་བྱེད་པ་དང་། རྒྱལ་ལམ318ཀྱི་འཚུབ་བསྟུན་བགྲོད་ལམ་སྔ་ཙམ་བཟོ་ཐུབ་ནས་འགྲིམ་འགྲུལ་སྒྲིག་ལམ་རྒྱུན་གཏན་སླར་གསོ་གང་མགྱོགས་ཡོང་བ་བྱ་དགོས། གནོད་འཚེ་བཟོ་བ་དང་རོགས་སྐྱོབ། སླར་གསོ་བསྐྱར་སྐྲུན་སོགས་དབང་གྲགས་ཆ་འཕྲིན་དུས་ཐོག་ཏུ་བསྒྲགས་ནས་སྤྱི་ཚོགས་ཀྱི་དོ་ཁུར་ལ་ལན་བསློག་དགོས། ཏང་སྲིད་ཀྱི་འགན་འཁྲི་མཉམ་ཁུར་དང་ལས་གནས་གཅིག་གི་འགན་འཁྲི་གཉིས། ཁོངས་གཏོགས་ཀྱི་དོ་དམ་གྱི་འགན་འཁྲི་བཅས་དོན་འཁྱོལ་ནན་པོ་བྱས་ཏེ་གཞི་རིམ་ཏང་རྩ་འཛུགས་ཀྱི་འཐབ་འཛིང་བཙན་རྫོང་གི་ནུས་པ་དང་ཏང་མི་ལས་བྱེད་པའི་གདོང་ལེན་དཔེ་བཟང་གི་ནུས་པ་ཡག་པོ་བཏོན་ཏེ་གནོད་འགོག་གནོད་བསྙུང་གནོད་སྐྱོབ་ལས་དོན་ལྷོད་གཡེང་སྤུ་ཙམ་ཡང་མེད་པར་དམ་འཛིན་ཡག་པོ་བྱས་ནས་མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་ཉེན་མེད་ཡོང་བར་སྲུང་སྐྱོང་མཐའ་གཅིག་ཏུ་བྱས་ཏེ་སྤྱི་ཚོགས་ཁྱོན་ཡོངས་འཆམ་མཐུན་བརྟན་བརླིང་ཡོང་བར་འགན་ལེན་ཏན་ཏིག་བྱ་དགོས།

     དར་མདོ་གུར་དྲག“8·03”གྱི་ཆུ་ལོག་གནོད་འཚེ་ལ་ཁ་གཏད་གཅོག་པའི་བཀོད་འདོམས་པུའུ་ཡི་བཀོད་འདོམས་མགོ་དཔོན་གཞོན་པ་དང་ཁོངས་མི། བཀོད་འདོམས་པུའུ་ཡི་ཁོངས་མི་སྡེ་ཚན་ཁག་དང་ལས་དོན་ཚོ་ཆུང་ཁག་གི་འགན་འཁུར་བློ་མཐུན་གཙོ་བོ་ཚོགས་འདུར་ཞུགས་པ་རེད།།

ལོ་ཙཱ། ལྷ་འཛོམས།

རྩོམ་སྒྲིག་པ། མགར་རྒྱལ་སྲས།