༡བྱ་གྲལ་བྱི་སོ། ཞེས་པའི་གཏམ་དཔེ་འདིའི་བྱུང་ཚུལ་ནི་དམངས་ཁྲོད་ཀྱི་གཏམ་རྒྱུད་ལས་སྔོན་ཕ་ཝང་ལ་བྱ་ཁྲལ་བསྐུལ་དུས་ཁོས་སོ་བསྟན་ནས་ང་བྱ་རིགས་མིན་པར་བྱི་བའི་རིགས་ཡིན་ཞེས་བཤད།ཡང་ཁོ་ལ་བྱི་བའི་ཁྲལ་བསྐུལ་དུས་ང་བྱི་བ་མིན་བྱའི་རིགས་ཡིན་ཞེས་གཤོག་པ་ལྷེབ་ལྷེབ་
བརྡབས་པས་མཐར་ཁྲལ་གཉིས་ཀ་རྒྱུག་མི་དགོས་པ་བྱུང་བ་ཡིན་ཞེས་གྲགས་པ་ལྟར་དཔེ་དེ་བྱུང་ཞིང་།མི་མགོ་བདེ་པོ་ལ་ལས་ཐབས་ཤེས་ངོ་གཉིས་མ་སྤྱད་དེ་གྱོང་གཡོལ་ཁེ་བཟང་ཟ་ཐབས་བྱེད་མཁན་ལ་གཏམ་དཔེ་འདི་སྤྱད་ནས་སྟིང་ཚིག་སྒྲོག་གིན་ཡོད་དོ།
༢བྱ་བརྒྱ་ཤར་ལྟ།ཕ་ཝང་ནུབ་ལྟ།གཏམ་དཔེ་འདིའི་འབྱུང་ཁུངས་ནི་སྔར་གྱི་གཏམ་རྒྱུད་ཅིག་ལ།གནའ་སྔ་མོར་བྱ་རིགས་རྣམས་འཚོགས་ཏེ་བྱའི་རྒྱལ་པོ་གདམ་བསྐོ་བྱ་སྐབས།སང་ཞོགས་བྱ་སུ་ཞིག་གིས་ཉི་མ་ཤར་བ་སྔོན་ལ་མཐོང་བ་དེ་ལ་བྱའི་རྒྱལ་པོ་བསྐོ་རྒྱུར་གྲོས་ཐག་ཆོད་པ་ན།སང་ཉིན་སྐྱ་རེངས་འཆར་མ་ཐག་བྱ་ཐམས་ཅད་རི་རྩེར་འཛོམས་ཤིང་།བྱ་གཞན་རྣམས་ཁ་ཤར་ལ་གཏད་ནས་ཉི་མ་ཤར་རྒྱུར་སྒུག་ནས་བསྡད་པ་ན།ཕ་ཝང་གིས་ཁ་ནུབ་ངོས་ཀྱི་རི་རྩེར་གཏད་ནས་ཉི་འོད་འཆར་རྒྱུར་བལྟས་ནས་བསྡད།ཉི་མའི་འོད་ཟེར་ཐོག་མ་འཕྲོས་མ་ཐག་ནུབ་ཕྱོགས་ཀྱི་རི་རྩེར་ཉི་མདངས་སེར་ལྷག་གེར་ཕོག་པ་དང་ཕ་ཝང་གིས་སྐད་ཆེན་པོ་ཞིག་བརྒྱབ་སྟེ།ཉི་མ་དགོས་ན་ཡ་གིར་འདུག་ཅེས་བསྟན་པ་ན་བྱ་ཐམས་ཅད་ཁ་ནུབ་ལ་བལྟས་སོ།ཕ་ཝང་གིས་འདི་ནི་ཉི་མདངས་མ་གཏོགས་ཉི་མ་ངོ་མ་མ་རེད་ཟེར་ཡོང་སྙམ་ནས་ལམ་སེང་ཁ་ཤར་ལ་བསྐོར་མ་ཐག་ཉི་མ་ཤར་ཕྱོགས་ཀྱི་རི་རྩེ་ནས་ཤར་བས་ཡང་ཁོས་སྐད་དེ་བས་ཆེ་བ་ཞིག་བརྒྱབ་སྟེ།ངོ་མ་དགོས་ན་ཡ་གིར་འདུག་ཅེས་དངོས་སུ་བསྟན་པ་རེད་ཟེར་བ་ལས་མཆེད་པ་ཡིན་ནོ།