གླུ་གར་གྱི་རྒྱ་མཚོ་ཞེས་མི་རྣམས་ཀྱི་བསྔགས་པ་བྱ་ཡུལ་དུ་གྱུར་པའི་ཁ་བའི་ལྗོངས་ཀྱི་ཡུལ་གྲུ་འདིར་རིང་ནས་བོད་མི་རིགས་རང་གི་ཁྱད་ཆོས་ལྡན་པའི་གླུ་དང་།གར།རོལ་མོ་སོགས་སྒྱུ་རྩལ་གྱི་རྣམ་གྲངས་ནི་མཐའ་ཡས་ཤིང་།དེ་ཡང་གངས་ཅན་རིག་པའི་གནས་གཞན་དང་འདྲ་བར་ཚང་མ་བོད་མི་དམངས་ཀྱིས་ལོ་རབས་དུ་མའི་འཚོ་བའི་ནང་རང་གི་ཤེས་རབ་བློ་གྲོས་ལ་བརྟེན་ནས་གསར་གཏོད་བྱས་པ་ཞིག་ཡིན་པ་དང་།དེ་བཞིན་རྒྱལ་ཁབ་ཕྱི་ནང་མི་རིགས་ཁག་གི་ཕུལ་དུ་བྱུང་བའི་སྒྱུ་རྩལ་གྱི་རྩི་བཅུད་བསྡུ་ལེན་བཅོས་གསུམ་བྱས་པ་བརྒྱུད་རང་རེའི་གླུ་གར་གྱི་སྒྱུ་རྩལ་གྱི་རྣམ་པ་རིམ་བཞིན་ཕུན་སུམ་ཇེ་ཚོགས་སུ་ཕྱིན་པ་ནི་ལོ་རྒྱུས་ཀྱི་དངོས་དོན་ལགས་སོ།། འདིར་དཔེ་ཙམ་དུ་བརྗོད་པ་ནི་བོད་རིགས་མི་དམངས་ཀྱིས་སྤྲོ་བར་ཉན་འདོད་པའི་རོལ་ཆ་ཡང་ཆིན་དེ་བོད་ལ་ཇི་ལྟར་དར་བའི་སྐོར་ཡིན། ཡང་ཆིན་ཞེས་པའི་མིང་ཚིག་དེ་ནི་རྒྱ་སྐད་ལས་གཡར་བའི་མིང་ཚིག་ཅིག་ཡིན།རྒྱ་ཡིག་ནང་དུ་ཡང་ཆིན་ཞེས་སྒྲ་འདྲ་བར་གཟུགས་ཐ་དད་པའི་འབྲི་སྲོལ་འདུག་ཀྱང་ཕྱི་གླིང་རྒྱལ་ཁབ་གཞན་ནས་ནང་འདྲེན་བྱས་པའི་རོལ་ཆ་ཞིག་ཡིན་པར་ངེས།དེ་ཡང་རྒྱ་ཡིག་གི《ཚིག་མཛོད་རྒྱ་མཚོ་》ནང་རོལ་ཆ་ཡང་ཆིན་ནི་སྔར་པུའོ་སི་དང་དབྱི་ལ་ཁེ་ས་ཁུལ་དུ་དར་ཞིང་།དུས་རབས་བཅོ་ལྔ་པའི་མིང་རྒྱལ་རབས་ཀྱི་དུས་མཇུག་ལ་རང་རྒྱལ་མཚོ་འགྲམ་ས་ཁུལ་བརྒྱུད་རིམ་བཞིན་ནང་སར་དར་བ་ཡིན་ཞེས་བཀོད་འདུག  བོད་ལྗོངས་ས་ཁུལ་དུ་རོལ་ཆ་ཡང་ཆིན་དར་བའི་སྐོར་རྡོ་རིང་བསྟན་འཛིན་དཔལ་འབྱོར་གྱིས་བརྩམས་པའི《དགའ་བཞི་བའི་མི་རབས་ཀྱི་བྱུང་བ་བརྗོད་པ་ཟོལ་མེད་གཏམ་གྱི་རོལ་མོ》ཞེས་བྱ་བའི་རྣམ་ཐར་ནང་གསལ་དོན།སྔར་བོད་འདིར་མིང་གྲགས་ཆེ་བའི་རྡོ་རིང་བཀའ་བློན་ཕ་བུ་གཉིས་བྱུང་བའི་ནང་བཀའ་བློན་བསྟན་འཛིན་དཔལ་འབྱོར་ནི（༡༧༦༠—？）ཆུང་དུས་ནས་གངས་ཅན་རིག་པའི་གནས་ལ་བརྩོན་པ་ཆེས་ཆེར་གནང་ཏེ་ཆེད་མངགས་དགེ་རྒན་བསྟེན་ནས་སྒྲ་སྙན་དང་གླིང་བུ་སོགས་རོལ་མོ་དང་།གར་གླུ་སོགས་ལ་སློབ་སྦྱོང་དང་བརྩོན་ཞིབ་དཔྱིས་ཕྱིན་པ་གནང་ལུགས་གསལ་པོར་འདུག
ཁོང་བཀའ་བློན་ལས་ཐོག་ཏུ་ཡིད་བསུབས་བདག་པོས་རྒྱུད་བརླམས་པའི་གོར་ཥ་དབང་སྒྱུར་པས་ལྷ་ལུང་དུ་འདྲེ་ལག་བརྐྱངས་ཤིང་ས་སྤྲེལ་ལོ（༡༧༨༨）དང་ལྕགས་ཁྱི་ལོ  （༡༧༩༠）ནང་བསྟུད་མར་བོད་ལ་དྲག་ཤུགས་ཀྱིས་བཙན་འཛུལ་བྱེད་སྐབས་བཀའ་བློན་བསྟན་འཛིན་དཔལ་འབྱོར་མཐའ་མཚམས་དོན་གཅོད་དུ་ཕེབས་པའི་གོང་མའི་དཔོན་དམག་གི་སྣེ་ཤན་དང་།གོར་བོད་འཆིང་སྒྲིག་བྱེད་པའི་རང་ཕྱོགས་གཙོ་བོའི་སྐུ་ཚབ་ལ་བཀས་མངགས་འདུག
འོན་ཀྱང་ཕྱིས་རང་འགན་གྲུབ་མིན་དང་དེ་བཞིན་མན་ཇུ་གོང་མའི་མཐའ་མཚམས་དོན་བཅོད་དུ་ཆེད་འབྱོར་བློན་པོ་སྤ་དཀྲུང་གིས་ནང་ཁུལ་དུ་གཡོ་དང་བཙན་གནོན་གྱི་བྱ་བ་རབ་རིམ་སྤེལ་ཐོག་ད་དུང་གོང་མར་མཐའ་མཚམས་གསང་གནད་སྙན་ཞུའི་ནང་དངོས་མིན་གཡོ་ཞུས་སྣ་ཚོགས་བྱས་རྐྱེན་གྱིས།ཆུ་བྱི（༡༧༩༢）ལོར་ཆན་ལུང་གོང་མས་བཀའ་བློན་བསྟན་འཛིན་དཔལ་འབྱོར་སོགས་གོར་བོད་དམག་འཁྲུག་དང་འབྲེལ་ཡོད་བོད་ས་གནས་སྲིད་གཞུང་གི་དཔོན་རིགས་གཙོ་གྲས་པད་ཅིང་ལ་བཀས་བཀུགས་ནས་ངོ་གཏུག་ཞིབ་དཔྱོད་ནན་པོ་གནང་མཐར།བཀའ་བློན་བསྟན་འཛིན་དཔལ་འབྱོར་གཙོས་བོད་ཀྱི་དཔོན་རིགས་ཚོས་གོང་བོད་དམག་འཁྲུག་དང་།བལ་ཡུལ་དུ་གོར་ཥའི་བཙོན་རར་སྡོད་རིང་དགྲ་བོར་མགོ་བཏགས་བློ་ལོག་པའི་ཉེས་པ་མེད་ཅིང་གོར་བོད་དམག་འཁྲུག་གི་ཉེས་དོན་འགའ་རིགས་རྣམས་བློན་པོ་སྤ་དཀྲུང་རང་ལ་རག་ལས་ཚུལ་གྱི་དོན་མཐའ་གསལ་དཀར་འདོན་གནང་འདུག་ནའང་དམག་འཁྲུག་དེས་རྒྱ་བོད་བལ་གསུམ་ལ་བརྡབ་བསིགས་བྱུང་བས་ཁོ་པའི་བཀའ་བློན་གོ་གནས་ཕབ་ཙམ་གྱིས་ཉེས་པ་འཐུས་པ་བྱེད་རྒྱུའི་བཀའ་སྒྱུར་བྱུང་རྗེས།བསྟན་འཛིན་དཔལ་འབྱོར་བློ་གུ་ཡངས་པོས་ནམ་མཁའི་སྐར་ཚོགས་ནོར་འཛིན་གྱི་རྒྱན་དུ་བབས་པ་ལྟ་བུའི་པད་ཅིང་གྲོང་ནང་དུ་ཟླ་ཤས་བཞུགས་རིང་།གྲོང་ཁྱེར་དེའི་གནས་ཁྱད་པར་ཅན་ཁག་ལ་མཆོད་འབུལ་ཕྱག་བསྐོར་དང་།ཞོར་དུ་རོལ་ཆ་ཡང་ཆིན་གྱི་གཏོང་ལུགས་ཆ་ཚང་བར་སློབ་པ་དང་།ད་དུང་ཞེང་ཞེས་པའི་རོལ་ཆ་སློབ་འགོ་ཚུགས་སྐབས།ཁོང་འབྲུམ་ནད་ཀྱིས་བཟུང་ནས་ཞེང་སློབ་འཕྲོ་ལུས།ཆུ་གླང（༡༧༩༣）ལོར་རྡོ་རིང་བསྟན་འཛིན་དཔལ་འབྱོར་བོད་ལ་ཕྱིར་ལོག་རྗེས་ཡང་ཆིན་རོལ་ཆ་བོད་ལ་དར་འགོ་ཚུགས་ལུགས་སོགས་ཁོང་གི་རྣམ་ཐར་ནང་དེ་ལྟར་འཁོད་འདུག་པས་དེང་དུས་བོད་དུ་མངའ་རིས་སྒྲ་སྙན་དང་།རྒྱའི་ཡང་ཆིན་འཕྲེད་གླིང་བཅས་བཅོམ་ནས་གཏོང་སྲོལ་ཐོག་མའི་ལག་འཁྲིད་ཀྱི་རྒྱུན་འཛུགས་བྱེད་པོ་ཁོ་བོ་ལགས་ཤིང་ཞེས་གསལ།
གོང་ཞུས་ལོ་རྒྱུས་དག་ནས་བོད་ལ་རོལ་ཆ་ཡང་ཆིན་དར་དུས་དང་ཇི་ལྟར་དར་ལུགས་ནི་ཧ་ཅང་གསལ་པོ་རེད།ད་ལམ་བོད་ཀྱི་གླུ་གར་ལ་ཞིབ་འཇུག་གནང་མཁན་བགྲེས་རབས་ཚོས་གསུངས་པར་གཞིགས་ན།རྡོ་རིང་བསྟན་འཛིན་དཔལ་འབྱོར་ནི་བོད་ལ་རོལ་ཆ་ཡང་ཆིན་དར་ཁྱབ་གཏོང་བའི་བྱེད་པོ་ཡིན་པ་མ་ཟད།ད་དུང་ནང་མ་ཁག་གཅིག་གསར་རྩོམ་གནང་བ་དང་།ནང་མ་དེ་ཚོའི་ནང་ཅིང་ཤིའི་རོལ་གདངས་ཡང་བར་བཅུག་དང་།ནང་མ་འཁྲུག་གཞས་ཀྱི་འཁྲབ་འཁྱེར་བྱེད་ཚུལ་དག་ལ་སྔར་གྱི་རྨང་གཞིའི་ཐོག་འཕེལ་རྒྱས་ལེགས་བཅོས་གནང་ཡོད་ཞེས་པར་རྒྱུ་མཚན་ངེས་ཅན་འདུག་སྙམ།