སྔོན་གྱི་དུས་སུ།རྒྱལ་པོ་ཞིག་གིས་ཁོའི་འཁོར་བློན་གཡོག་དང་འབངས་མི་སེར་ཚང་མ་ཕོ་བྲང་དུ་བསྡུ་རུབ་བྱས་ཏེ།ཉིན་དེ་རིང་འོ་སྐོལ་ཡོངས་ཀྱིས་འཇིག་རྟེན་སྐད་ཆའི་བདེན་རྫུན་ཤན་འབྱེད་དགོས།ད་ནི་གོང་དཔོན་བློན་ཡིན་ནའང་འདྲ།འོག་འབངས་མི་ཡིན་ནའང་འདྲ།ཚང་མས་མ་གསང་དྲང་པོ་ཤོད་ཅིག ཁྱོད་ཚོས་བལྟས་ན་སྐད་ཆ་ཞེས་པ་དེ་ལ་གང་བདེན་པ་དང་གང་རྫུན་མ་རེད་ཅེས་བཀའ་ཕབ་སྟེ་དྲིས། ཐོག་མར་བློན་པོ་འགའ་རེས་ཁ་གྲགས་སྟེ་སྨྲས་པར།དབང་བཙན་སྔ་མའི་དགེ་བ་བསགས་པའི་བདེན་རྫུན་མུན་ནག་དྲ་བ་སྒྲོན་མེས་སེལ་མཁན་གྱི་རྒྱལ་མཆོག་ཁྱེད་ཀྱི་གསུང་ནི་བདེན་པ་རེད་ཅེས་ཞུས།དེའི་འཕྲོ་ལ་འོག་འབངས་འགའ་རེ་ཡིས་བློན་པོ་རྣམས་ལ་ངོ་བསྟོད་ཀྱི་ཆེད་དུ་ཤེས་རབ་མཐའ་ཡས་རྒྱ་མཚོ་ལྟར་ཟབ་ཅིང་བློ་བརྟན་གཞུང་དྲང་ཅན་གྱི་བློན་ཆེན་རྣམས་ཀྱི་གསུང་ཡང་བདེན་པ་རེད་ཅེས་བཤད་པ་ལས།དྲི་བའི་གཞི་རྩ་མི་སུ་ཡིས་བཤད་པའི་སྐད་ཆ་ནི་བདེན་པ་རེད་དམ་རྫུན་མ་རེད་ཟེར་མཁན་ནི་སྐྱེ་བོ་གཅིག་ཀྱང་མེད། དེ་དུས་ཨ་ཁུ་སྟོན་པའང་འདུ་འཛི་ཆེ་བའི་ཚོགས་ར་དེ་ལ་ཐོན་འོང་ནས་འགྲམ་གྱི་རྒན་པོ་ཞིག་ལ་འདི་ན་ཅི་བྱས་པ་ཡིན་ཞེས་དྲིས་པར།རྒན་པོས་ཁོང་ལ་ཇི་མ་ཇི་བཞིན་དུ་བཤད་པས་ཨ་ཁུ་བསྟན་པ་ཁོང་དགོད་ཅིག་དགོས་ཤོར་ནས་སྐད་གསང་མཐོན་པོས་བདེན་རྫུན་གྱི་ཤན་འབྱེད་བྱེད་སྟངས་ངས་ཤེས་ཟེར་བཞིན་རྒྱལ་པོའི་རྩ་ལ་བཅར་ནས།རྒྱལ་མཆོག་ལགས།མིག་གིས་དངོས་སུ་མཐོང་ནས་བཤད་པའི་གཏམ་སྐད་ཆ་ནི་བདེན་ལ་མིག་གིས་མ་མཐོང་ཁ་ནང་གང་མོས་བཤད་པ་ནི་རྫུན་རེད་ཅེས་སྨྲས་པས།རྒྱལ་པོ་དང་བློན་འབངས་ཐམས་ཅད་བློ་བབ་སེམས་བབ་ཀྱིས་དེ་བདེན་ནོ།དེ་བདེན་ནོ་ཞེས་མགྲིན་གཅིག་ཏུ་ཁས་བླངས་ཏེ་བདེན་དོན་དུ་བརྩིས་སོ།།