གནའ་དུས་སུ།མི་གླེན་པ་གཏི་མུག་ཕག་ལྟ་བུ་ཞིག་ཡོད།ཉིན་ཞིག་ཁོང་གིས་ཁྲོམ་ར་ནང་དུ་བ་བཙོང་བར་སོང་།ཡིན་ཡང་ཁོ་ཡིས་བ་ཚོང་བཤད་བྱེད་མི་ཤེས་པས་ཞག་གསུམ་བཞི་འགོར་ཡང་ད་རུང་འཚོང་མ་ཐུབ།དེ་དུས་ཁོང་ལ་ཤག་པོ་བློ་རིག་རྒོད་ཅིང་ཁ་བདེ་མོ་ཞིག་ཡོད་པ་དེ་དང་འཕྲད།མི་དེས་ཤགས་པོ་ཁྱོད་ལོངས་སུ་ངལ་ཅུང་ཙམ་གསོས་དང་།བ་འདི་ངས་ཁྱོད་ལ་བཙོང་རོགས་བྱེད་ཅེས་ཟེར་ཏེ།དེ་མ་ཐག་ཏུ་སྐད་གསང་ཐོན་པོའི་སྒོ་ནས་བ་ཉོ་ཤོག བ་ཉོ་ཤོག བ་བེའུ་ཡོད་ཡོད་བཞོན་མ་ཡིན།བེའུ་སང་སྐྱེ་གནངས་སྐྱེ་ཡིན་ཞེས་འབོད་པས།ཐོས་མཁན་རྣམས་ཀྱི་སེམས་སུ་བ་འདི་འདྲ་བཟང་པོ་བེའུ་ཡོད་པ་མ་ཟད་མར་ཡང་འཆའ་ཆོག་ཆོག་པ་ཞིག་ཉོ་རྒྱུ་ཡོད་ན་ཁེ་ཁ་ཆེན་པོ་ཡོད་འདུག་བསམས་ནས་བ་དེ་ངས་ཉོ།ངས་ཉོ།ངས་ཊམ་ཀ་བརྒྱ་སྦྱིན།ངས་ཊམ་ཀ་བརྒྱ་དང་ལྔ་བཅུ་སྦྱིན་ཞེས་འཚང་ཁ་ཤིག་ཤིག་དང་ཉོ་མཁན་མང་པོ་འདུས་ཏེ་མཐར་རིན་གོང་ཆེན་པོས་ཉོས་སོང་།དེ་དུས་གླེན་པ་ཤིན་ཏུ་དགའ་བཞིན་ད་ནི་ངས་ཀྱང་ཤག་པོ་ཁ་བདེའི་ཚོང་རྒྱག་ལུགས་ཀྱི་བློ་གྲོས་ཤེས་སོང་ཞེས་སྙམ་ཏེ་དགའ་དགའ་སྤྲོ་སྤྲོའི་ངང་ཁྱིམ་དུ་ལོག་གོ དེ་ནས་གླེན་པའི་བུ་མོ་གཉེན་ལམ་བརྒྱངས་ནས་མནའ་མ་གཏོང་བའི་དུས་ལ་ཁད།གཉེན་ཡ་དང་གཉེན་གྲོས་བྱེད་དུས།གླེན་པའི་སེམས་སུ་ཤག་པོ་ཁ་བདེའི་བ་འཚོང་ལུགས་དེ་དྲན་ཏེ་གཉེན་ཉེ་བ་དང་གྲོགས་ཤག་པོ་ཐམས་ཅད་ལ།རྣམ་པ་ཚོ་ལགས།ངའི་བུ་མོ་ཡི་གཉེན་ཐག་ནི་ང་རང་གིས་ཆོད།ཁྱེད་ཅག་གིས་དེར་སེམས་ཁྲལ་ཅི་ཡང་བྱེད་མི་དགོས་ཞེས་ཟེར་ནས་གཉེན་ཡ་ལ།ངའི་བུ་མོ་འདི་མཛངས་མ་ཞིག་ཡིན་པས་མང་པོ་བཤད་རྒྱུ་མེད།མོར་ཕྲུ་གུའང་སང་སྐྱེས་གནངས་སྐྱེས་ཡིན།ཁྱེད་ཚང་གིས་ནམ་དུད་ཁྲིད་ཀྱང་ཁྲིད་ཆོག་ཅེས་པའི་གླེན་གཏམ་ལུང་པ་གང་ལབ།
གཉེན་ཡ་ཡིས་སྐད་ཆ་དེ་ཐོས་ཚེ་མནའ་མ་སྐྱུག་བྲོ་བ་འཇིག་རྟེན་དཔེ་ལས་མི་སྲིད་པ་དེ་འདྲ་བ་ཞིག་སུ་ལའང་མི་དགོས་ཞེས་བསམས་ནས་ཞེ་ལོག་པས་གཉེན་ལམ་མཚམས་སུ་གཅོད་དེ་རང་ཁྱིམ་དུ་ལོག་སོང་།།