མི་རིགས་ཀྱི་ལ་རྒྱ་དང་མི་དམངས་ཀྱི་བརྩེ་དུང་སྙན་པའི་དབྱངས་སུ་གྱེར་བའི་ལས་ནི་སྙན་ངག་པའི་སྙིང་རྩའི་ནུས་པ་ཡིན་ལ།སྐུལ་སློང་བྱེད་ཡུལ་དུས་རབས་ཧྲིལ་བོའི་བསམ་བློ་ཡིན།
སྙན་ངག་ནི་མིའི་རིགས་ཀྱི་སེམས་གཏིང་ནས་ཐོན་པའི་གདངས་དབྱངས་ཡིན་ཏེ།མ་ཡིས་བྱིས་པར་ནུ་ཞོ་བསྣུན་པའི་དུས།སྤྲོ་སེམས་དབང་མེད་འཁོལ་བའི་སྙན་གླུ་ལེན།བྱིས་པ་བདེ་མོར་གཉིད་དུ་ཡུར་བའི་ཚེ།རེ་ལྟོས་ངག་གླུ་སྙན་མོས་ཡིད་སེམས་གསོ།ཡར་ལ་བདུད་རྩི་ཉིང་ཁུ་འདྲེན་པའི་དུས།ཚེ་རིང་བདེ་སྐྱིད་ཡོང་བའི་སྨོན་གླུ་ལེན།གཉེན་གྲོགས་རྒྱང་རིང་བགྲོད་པའི་སྐྱེལ་མ་ལ།དཔའ་སྙིང་འཛུམ་དྲུག་རྒྱས་པའི་ངར་གླུ་ལེན།སོ་ནམ་ཞིང་ལས་གཉེར་བར་སྐུལ་བ་ལ།དུང་བརྡ་དྭངས་མོས་ཡིད་སེམས་སྐུལ་བར་བྱེད།དགའ་སྟོན་སྦྲེང་བའི་རྩེ་དགའི་བཞད་སྒྲ་ཡང་།བདེ་སྐྱིད་འཚོ་བ་མཚོན་པའི་སྙན་ངག་ཡིན།ཁྲོས་འཁྲུག་རྔམ་པའི་གད་རྒྱངས་སྒྲོག་པའི་ཚེ།ཁམས་གསུམ་ཟིལ་གྱིས་གནོན་པའི་སྙན་ངག་འབྱུང་།དགའ་བདེ་སྙིང་ནས་འགོག་མེད་འཕྱོ་བའི་དུས།འཇམ་ནས་འགོག་མེད་འཕྱོ་བའི་དུས།འཇམ་མཉེན་ཡན་ལག་གར་ལ་ངང་གིས་མོད།སྐྱོ་ཤས་བསམ་པ་དབང་མེད་སྐྱེ་བའི་དུས།གདུང་སེམས་མིག་ཆུ་ངུ་འབོད་ངག་ལས་འབྱུང་།སྤྲོ་སེམས་མཚོ་མོ་རབ་ཏུ་འཁོལ་བའི་དུས།དགའ་བའི་རྣམ་འགྱུར་ལུས་ཀྱི་དགྱེ་སྒུར་འབྱུང་།སྙན་ངག་ནི།མིའི་རིགས་ཀྱི་སེམས་གཏིང་ནས་ཐོན་པའི་གདངས་དབྱངས་ཤིག་མ་ཡིན་ནམ། སྐྱིད་སྡུག་འཚོ་བའི་འབྱུང་ཁུངས་མེད་ན།གསོན་ཉམས་ལྡན་པའི་སྙན་ངག་གི་སྣང་བརྙན་འབྱུང་མི་ཐུབ།དགའ་སྐྱོ་ཟུང་གི་ཡིད་འགྱུར་མེད་ན།རྔམ་བརྗིད་ཀྱི་ཉམས་དང་ལྡན་པའི་སྙན་ངག་ཡོད་མི་སྲིད།ཀྱེ་ཀྱེ།འཚོ་བ་དང་དུང་སེམས་གཉིས་ནི་སྙན་ངག་གི་གཤོག་ཟུང་ཡིན་ལ།དེ་ལས་གཅིག་མེད་པར་གྱུར་ན།སྙན་རྩོམ་གྱི་བྱ་རྒྱལ་ནམ་མཁར་འཕུར་མི་ནུས། སྙན་ངག་ནི་ནོར་འཛིན་དགའ་མའི་བཅུད་མངར་ལས་བྱུང་བའི་དྲི་ལྡན་མེ་ཏོག་ཅིག་དང་།གངས་དཀར་ཆབ་རོམ་ལས་ཐོན་པའི་བདུད་རྩི་བསིལ་མ་ཞིག སའི་གོ་ལའི་ཁོངས་ནས་ཐོན་པའི་མེ་ཕུང་ཞིག་དང་།འོད་འབར་ཉི་གཞོན་སྒེག་མོའི་ཟེར་མ་ཞིག་བཅས་ཡིན་པར་མ་ཟད།བརྩེ་དུང་གི་སྲས་མཆོག་དང་།བརྩེ་དུང་ལ་ཕུལ་བའི་ནུ་ཞོའང་ཡིན། སྙན་ངག་ནི་མི་ཚེ་གཏོང་བའི་ལམ་ཆང་ལྟ་བུ་ཡིན།སྐབས་འགར་སྤྲོ་སེམས་ཀྱི་མེ་དཔུང་སྦར་བར་གྱུར་ཏེ།ཁྱེད་ཀྱི་ཁྲག་རྒྱུན་དྲོན་མོ་རབ་ཏུ་འཁོལ་ཞིང་།བློ་སྟོབས་མཁའ་རུ་སྙེག་པར་བྱེད་ལ།རྒྱང་རིང་དུ་བསྐྱོད་པའི་སྐུལ་མ་བྱེད་ཐུབ་པ་དང་།སྤྲོ་སེམས་ཀྱི་རྒྱལ་གླུ་སྙན་མོ་ཕྱོགས་བཞིར་ཁྱབ་ཏུ་འཇུག་ཐུབ།སྐབས་འགར་དྭངས་གཙང་ཆུ་མིག་ལྟར་ཁྱེད་ཀྱི་སྐོམ་པའི་གདུང་བ་སེལ་ཞིང་།ངལ་དུབ་སངས་པར་བྱས་ནས།ཡིད་སེམས་དགའ་བར་བྱེད་ལ།འཇིག་རྟེན་གྱི་གནས་ཚུལ་དྲན་གསོ་ཞིག་གཏོང་ཐུབ།དེའི་ཕྱིར་སྙན་ངག་ནི་མི་ཚེ་གཅིག་གི་འཚོ་བའི་སྙིང་བཅུད་རེད། འཚོ་བ་ནི་སྙན་ངག་གི་འབྱུང་ཁུངས།སྙན་ངག་གི་གངས་ཆུ།སྙན་ངག་གི་ཆུ་འཁོར།སྙན་ངག་གི་གཙང་བོ།སྙན་ངག་གི་རྒྱ་མཚོ་ཆེན་པོ་རེད།སེམས་ལྡན་སུ་ཡིན་རུང་།ལྷུང་ལྷུང་འབབ་པའི་ཆུ་སྒྲ།འུར་འུར་གྲགས་པའི་གདངས་དབྱངས།ཟེགས་མ་མཁའ་ལ་འཐོར་བའི་རླབས་ཕྲེང་མཐོང་ཐོས་ཀྱི་ཡུལ་དུ་གྱུར་ཚེ།སེམས་ལ་ཚོར་འདུ་མི་སྐྱེ་བ་མི་སྲིད།དེ་ནི་སྙན་ངག་པའི་སེམས་གཡོ་བའི་མ་ཡུམ་གྱི་ཁ་ཆེམས་དང་།མི་རིགས་ཀྱི་རེ་བཅོལ།མི་དམངས་ཀྱི་འདོད་མོས་དང་མཚུངས་པར་ཁྱེད་ཀྱི་སྙན་ངག་གི་ཉམས་འགྱུར་གྱི་གདངས།མཛེས་སྡུག་གི་ཉམས།སྤོབས་པའི་སྒུལ་ཤུགས་བཅས་ཐོན་པར་བྱེད་ཐུབ།སྙན་ངག་མཁན་པོ་ལགས།རང་ལ་ཨ་ལན་སྟེར་བའི་བུ་ཕྲུག་ལྟ་བུའི་སྙིང་གསོན་པོ་ཞིག་ཡོད་པ་གལ་ཆེ། རླབས་ཕྲེང་གི་དགོད་སྒྲ་ལྡན་པའི་གཙང་བོ་ནི་རྒྱུན་མི་ཆད་ཅིང་།འཕྲོས་པའི་ཉི་འོད་ནི་གསལ་ཞིང་འཚེར་བ་ཡིན།དེས་ན།གསལ་འཚེར་གྱི་ཉི་འོད་དང་ལྷུང་ལྷུང་དུ་འབབ་པའི་གཙང་བོ་ནི་དྭངས་ཤིང་གསལ་བའི་སྙན་ངག་ཡིན།སྙན་ངག་ལ་དོན་མེད་ཀྱི་འཁུན་སྒྲ་མི་དགོས།ནད་མེད་འཁུན་སྒྲ་འབྱིན་པ་སྙན་ངག་ག་ལ་ཡིན། དགའ་ཕོད་པ་ནི་དུང་སེམས་ཡིན་ལ།ཁྲོ་ནུས་པའང་དུང་སེམས་རེད།གལ་ཏེ་ཁྱོད་ལ་པད་དཀར་གཞོན་ནུ་བཞིན་དྭངས་གཙང་ངོ་བོར་གྲུབ་པའི་སེམས་ཡོད་ན།ངུ་བ་དང་སྡིགས་མོ་བྱེད་པ་དེའང་དུང་སེམས་མེད།བསྟོད་ཚིག་ནི་སྙན་ངག་ཡིན་ཞིང་།གལ་ཏེ་ཁྱོད་ལ་དྲག་ཏུ་འཕྱུར་བའི་སྤྲོ་སེམས་ཤིག་ཡོད་ན།འཇིག་རྟེན་ཆོས་ཉིད་ཀྱི་བསམ་བློ་སྟོན་པ་དེའང་སྙན་ངག་རེད།ཁྱོད་རང་རྒྱ་མཚོར་བཏབ་པའི་ཆུ་ཐིགས་ཕྲ་མོ་ཞིག་ཡིན་ལ།ཆུ་རྒྱུན་འདུས་པའི་རྒྱ་མཚོ་སྔོན་མོ་ཁྱེད་ཀྱི་དུང་སེམས་རེད།ས་གཞི་འཛིན་མའི་སྟེང་དུ།ཁྱེད་ཉིད་ས་གཞིར་ཕུལ་བའི་རྡུལ་ཕྲན་ཞིག་ཡིན་ལ།མཁའ་དབྱིངས་བརྟོལ་བའི་རི་རབ་ནི་ཁྱོད་ཀྱི་སྙན་ངག་ཡིན།གལ་ཏེ་ཁྱོད་རང་གངས་རི་རྩེ་མོའི་ཁ་བའི་འདབ་མ་ཞིག་ཡིན་ན།རབ་དཀར་གངས་རི་ནི་ཟད་མཐའ་མེད་པའི་སྙན་ངག་གི་བང་མཛོད་རེད།གལ་ཏེ་ཁྱོད་རང་ཁྱོད་ཀྱི་མི་རིགས་ཀྱི་ཁྲ་ཆུང་མིག་མཐར་འཁོར་བའི་མཆི་མའི་རྡོག་པོ་ཞིག་ཡིན་ན།མི་དམངས་ནི་ཁྱོད་ཀྱི་ནམ་ཡང་ཉམས་པ་མེད་པའི་སྙན་ངག་གི་སྲོག་དབང་ཡིན།དེ་ལྟ་བུ་ནི་མི་དམངས་ཀྱིས་མཐོང་ཆེན་བྱེད་པའི་སྙན་ངག་པ་ཡིན་ལ།དེ་ལྟ་བུ་ནི་སྙན་ངག་པ་རྣམས་ཀྱི་སེམས་ཁོང་དུ་གནས་པའི་སྒྲ་དབྱངས་ལྷ་མོ་ཡིན།མི་དམངས་ཁྲི་ལོར་བརྟན་པར་བྱུང་ན།སྙན་ངག་ཁྲི་ལོར་བརྟན་པར་ངེས་པས།སྙན་ངག་ཉམས་དམས་སུ་ག་ལ་འགྲོ།