དང་པོ།   ངོ་སྤྲོད་ཚུལ་དུ།

     སྤྱི་ལོ་༢༠༠༥ལོའི《མང་ཚོགས་སྒྱུ་རྩལ》དེབ་བཞི་བར་སེང་མགུལ་མ་ཎི་དོན་གྲུབ་ཀྱི《ཆོ་འཕྲུལ》ཞེས་པའི་སྒྲུང་ཐུང་ཞིག་བཀོད་འདུགདེར་བལྟས་པས་བདག་ལ་བསམ་ཚུལ་ཁ་ཤས་སྐྱེས་བྱུང་།མི་ཞིག་གསར་དུ་ངོ་ཤེས་སྐབས་ཐོག་མར་དེའི་གདོང་ལ་ཞིབ་ཏུ་བལྟས་ཏེ་མིང་ལ་ཅི་ཞིག་ཟེར་བ་སེམས་སུ་གཟུང་བ་ལྟར།《ཆོ་འཕྲུལ》ཞེས་པའི་རྩོམ་ཡིག་འདི་དང་འཕྲད་མ་ཐག་ཁ་བྱང་གི་གོ་དོན་ཡིད་ལ་གཅགས་ཐབས་སུ་བརྩོན་པ་དང་།ཆོ་འཕྲུལ་ཞེས་པའི་ཐ་སྙད་ལ་བསམ་ཚེ།གཞན་ལ་མགོ་བསྐོར་གཏོང་བའི་ཐབས་སམ་ཡང་ན་ལྷ་འདྲེ་གང་རུང་ཞིག་གིས་བྱས་པའི་སྤྲུལ་རྟགས་ལྟ་བུ་ཞིག་ལ་གོ་ངེས།《ཆོ་འཕྲུལ》ཞེས་པའི་སྒྲུང་གཏམ་དུ་ཨ་ཁུ་དབང་བྷོ་རྟ་ལ་དུངས་པའི་འདྲེན་སྣེ་སྲད་བུ་ཞིག་བཟུང་སྟེ།ཁོང་གི་འདོད་བློ་གང་ཞིག་མི་ཚེ་བུབས་པོར་གནས་གཅིག་སྒྲིམ་འདུག་པའི་སྣང་བརྙན་ཞིག་བཞེངས་འདུག

       གཉིས་པ།ཚན་དབྱེ་ཚུལ་དུ།

     སྤྱིར་སྒྲུང་གཏམ་དེར་ཚན་པ་ལྔ་རུ་ཕྱེས་ཡོད་མོད།དོན་དུ་དུས་ཀྱི་དབང་གི་ཚན་པ་གསུམ་དང་དོན་གྱི་དབང་གི་ཚན་པ་གཉིས་མ་གཏོགས་མི་འདུག་སྟེ།དུས་ཀྱི་དབང་གི་ཚན་པ་གསུམ་ནི།རྩོམ་པ་པོས་མངོན་སུམ་རིང་ལུགས་ཇི་བཞིན་“ཉི་མ་རི་ལ་ནུབ་ཅིང་རྫི་བོ་གཞོན་ནུས་སྒོ་ཕྱུགས་ལྷས་རར་བསྡུ་འགོ་བརྩམས་པའི་ཚེ”ན།ཨ་ཁུ་དབང་བྷོ་མཐོང་བ་དང་ལྷན་དུ་ཨ་ཁུ་དབང་བྷོའི་འདས་དོན་རེ་དྲན་པ་དང་གཅིག“ཞོགས་པའི་ཉི་ཟེར་མུ་མེད་རྩྭ་ཐང་གི་རྒྱན་དུ་མངོན་པའི་ཚེ་”ན།ཨ་ཁུ་དབང་བྷོས་རྨི་ལམ་བཟང་བོའི་སེམས་ཁམས་ཤིག་བསྣམས་ཏེ་སྦྲའི་ཡར་སྒྱེད་དུ་བསྲུབས་ཇ་དཀར་ཡོལ་གང་འཐུང་བ་དང་།ཨ་མ་བཀྲ་ཁོས་ནངས་ཇ་བསྐོལ་རྗེས་འོ་མ་དཀྲོག་པའི་དུས་སུ་སྦྲའི་ཕྱི་རོལ་ནས་རྒྱུན་ལྡན་མིན་པའི་རྟ་འཚེར་བར་བརྟེན།ཨ་ཁུ་དབང་ལྷོ་སྟོང་གཞིག་གི་དབྱིངས་ནས་ཕྱིར་སྦྲ་ནང་དུ་ལོག་སྟེ།ཨ་མ་བཀྲ་ཁོར་ལབ་མོ་གླེང་བ་དང་།“ཕྱི་ཉིན་དགོན་པར་སོང་ནས་ཨ་ལགས་ལྡོང་ཚང་ལ་གནས་ཚུལ་རྣམས་ཞུས”ཏེ་ཕྱིར་ལོག་པ་དང་གསུམ་འདུས་ཡོད།

     དོན་གྱི་དབང་གི་ཚན་པ་གཉིས་ནི།ཨ་ཁུ་དབང་བྷོ་ཆུང་དུས་གྲྭ་བ་བྱས་པའི་བཀའ་དྲིན་གྱིས་ཀ་ངོ་ཡིག་ངོ་ཆོད་པས་སྒྲུང་དཔེ་ཀློག་ཐུབ་པ་དང་།རང་ཉིད་སྐྱེས་ཡུལ་དུ་རྟ་རྒྱུག་གིས་ལ་རྒྱ་རྩོད་རེས་བྱེད་པ་ཞིག་ཡོད་པའི་རྐྱེན་ལ་བརྟེན་ནས།ཨ་ཁུ་དབང་བྷོས་དངོས་སུ་རྟ་གང་ལེགས་དང་རྒྱུད་གང་བཟང་ཅན་ཉོས་ཏེ།རང་ཉིད་ཀྱི་འདོད་བློ་སྐོང་ཐབས་དང་མཚན་སྙན་བརྩོན་ཐབས་བྱས་པ་དང་།དོན་དངོས་སུའང་ཡུལ་ཚོའི་ཤོག་པ་ཡོངས་ཀྱི་རྟ་རྒྱུག་འགྲན་བསྡུར་ནང་ནས་ཁོའི་རྟ་ཅུང་ཤེས་རྐྱང་དམར་གྱིས་ཨང་དང་པོ་བླངས་མོད།ད་དུང་ཡིད་མ་ཚིམས་པར་མཚོ་སྔོན་དང་སི་ཁྲོན་དང་ཀན་སུའུ་སོགས་ཞིང་ཆེན་ཁག་ནས་སླེབས་པའི་རྫོང་གི་རྟ་རྒྱུག་འགྲན་བསྡུར་ཁྲོད་ནས་ཀྱང་མཚན་སྙན་གྱི་བ་དན་ལེན་འདོད་ཅིང་།གླིང་ཆེན་རྒྱལ་པོའི་ལྷ་རྟ་རྐྱང་རྒོད་གཡེར་བ་ལྟ་བུ་ཞིག་ལག་ཏུ་ཡོང་བར་རེ་བ་བྱས་མཐར།ད་དུང་ཨ་ལགས་ལྡོང་ཚང་ལ་ཅི་ཞིག་ཞུ་རུ་སོང་བ་ལ་བློ་གཉིས་སུ་དབྱེ་ནས་དཔྱད་ན་ཆོག་པ་དང་གཅིག

     ཨ་ཁུ་དབང་བྷོ་སྟོང་གཞིག་གི་ཞིང་དུ་ཞུགས་ཤིང་སྦྲ་སྒོར་སོན་པའི་གླིང་སེང་ཆེན་དང་འདྲ་བའི་སྐྱེས་བུ་དེའི་ལག་ནས་རྟ་རྐྱང་རྒོད་གཡེར་བ་འདྲ་བ་ཞིག་ཉོས།རྟ་མཆོག་དེར་ཞོན་མ་ཐག“བསམ་དབང་དྲན་དབང་མེད་པར་རྟ་དེ་སྐད་ཅིག་ཉིད་ལ་གློག་འཁྱུག་པ་བཞིན་བར་སྣང་སྟོང་བའི་དབྱིངས་སུ་འཐིམས”སྟབས།ཨ་ཁུ་དབང་བྷོའི་སེམས་ནས་ཡོད་ཚད་ཤོར་སོང་བས་སེམས་པ་སྡུག་བསྔལ་གྱི་དྲག་ཏུ་མནར་ཏེ།རང་མདུན་གྱི་མཐའ་ཡངས་པའི་རྩྭ་ཐང་དེའང་མུ་མེད་ཀྱི་མྱ་ངམ་ཐང་ཆེན་པོ་ཞིག་ཏུ་མི་འགྱུར་གྲང་།

     དེ་ལྟར་མི་ཞིག་གི་སྟོང་གཞིག་གི་ཕུགས་བསམ་དེ་བོར་ཚེ།སྟོང་གཞིག་གི་ཞིང་ནས་གོམ་ཁ་འཁྱོལ་འགྲོ་བ་མི་སེམས་ཀྱི་ཆོས་ཉིད་ཅིག་རེད།འོ་ན་ཨ་ཁུ་དབང་བྷོའང་སྟོང་གཞིག་གི་ཞིང་དེ་ནས་གོམ་ཁ་འཁྱོར་ཅིང་།“ད་ནི་ཡུལ་དུ་འགྲོ་བསམས་ཀྱང་ལམ་དང་ཁ་ཕྱོགས་མི་ཤེས”པས།ཁོའི་མིག་ལམ་དུ་སྣང་ཚད་མུ་མེད་ལུང་སྟོང་གི་མྱ་ངམ་ཐང་ཆེན་པོ་ཞིག་ཏུ་གྱུར་ཡོད།མྱ་ངམ་ཐང་དེ་ནས་ཁོང་གིས་རྟ་བཙལ་ཀྱང་འཕྲུལ་སྣང་གི་རྟ་ཞིག་ལ་དངོས་སུ་མ་རྙེད་ལ།རང་ཁྱིམ་བཙལ་ཀྱང་ཡི་དྭགས་མ་བུ་གཉིས་ཀྱིས་ས་ཁང་དོག་པོ་ཞིག་ཏུ་རྩམ་སྐྱ་འགམ་བཞིན་ཡོད་པ་ཙམ་ལས་ཅི་ཡང་མ་རྙེད།ཡི་དྭགས་ཀྱི་གནས་དེ་ནས་ཨ་ཁུ་དབང་བྷོས་སླར་ཡང་འཁོར་བ་ཞིག་གི་འགོ་གཞི་ནས་བརྩམས་ཏེ་ར་རྫི་བྱས་ཤིང་བུ་ཕྲུག་གཉོར།རྟ་ལ་བསྐྱོན།དེ་དག་ཀྱང་སྐད་ཅིག་ཉིད་དུ་མི་སྣང་བར་གྱུར་པ་དང་བཅས་གཉིས།།

      གསུམ་པ།འཚོལ་རྟོག་ཚུལ་དུ།

      བདག་གི་བསམ་བློ་གཏོང་ཕྱོགས་ཀྱིས་དོན་གྱི་ཚན་པ་གཉིས་དང་དུས་ཀྱི་ཚན་པ་གསུམ་ཕྱེ་བ་དང་།རྩོམ་པ་བོས་ཚན་པ་ལྔ་རུ་བཀར་བ་གང་ཞིག་ཡིན་རུང་།བརྩམས་ཆོས་ཀྱི་སྲོག་ནི་རྩོམ་པ་པོ་རང་ཉིད་ཀྱི་དབང་བོ་ལྔའི་སྟེང་ན་གནས་ཡོད་ཕྱིར།ཆོ་འཕྲུལ་གྱི་གར་སྟེགས་《ཆོ་འཕྲུལ》ཁོང་ལས་མ་འདས།གར་སྟེགས་དེའི་སྟེང་གི་ཆོ་འཕྲུལ་གྱི་ཟློས་གར་དེར་བལྟ་དགོས་ན་སྔར་བཞིན་གར་མཁན་ཨ་ཁུ་དབང་བྷོར་མི་བལྟ་ཐབས་མེད་རེད།

     རྩོམ་པ་པོས་མངོན་སུམ་སྒྱུ་འཕྲུལ་རིང་ལུགས་ཀྱི་ལམ་ནས་ཨུ་ཁུ་དབང་བྷོ་ཞེས་པའི་མི་སྣ་ཞིག་ཉི་མ་རི་ལ་ནུབ་བཞིན་པའི་དུས་སུ“གྲོང་རྡལ་ཆུང་བ་ནས་འཐེན་པའི་རྐང་ལམ་ཕྲ་མོ”ཞིག་གི་སྟེང་ནས་གར་སྟེགས་སུ་ཁྲིད་འོངས་པ་རེད།ཨ་ཁུ་དབང་བྷོས“གར”མ་འཁྲབ་པའི་སྔོན་ལ་རྩོམ་པ་པོས་ཁོང་ལ་སྤྲད་པའི་གར་ལྗོངས་སུ་ཐེངས་ཤིག་བལྟས་ན།“ཉི་མ་རི་ལ་ནུབ་ཅིང་རྫི་བོ་གཞོན་ནུས་སྒོ་ཕྱུགས་ལྷས་རར་སྡུད་འགོ་བརྩམས་པའི”སྐབས་དེའི་དགུང་སྔོན་ཐང་ལ་བཏིངས་འདྲའི་དངུལ་རའི་རྩྭ་ཐང་ལ་གྲིབ་ཡོལ་ཆེན་པོ་ཞིག་གིས་གཡོགས་པ་དང་།གྲོང་རྡལ་ཆུང་བ་ནས་འཐེན་པའི་རྐང་ལམ་ཕྲ་མོ་ཞིག་བཅས་རེད།ཡིན་ཡང་ཨ་ཁུ་དབང་བྷོས་དངོས་སུ་གར་འཁྲབ་སྟེ་གླུ་ལེན་པའི་དུས་ན།མཐའ་ཡས་པའི་རྩྭ་ཐང་དེ་ནི་མུ་མེད་ལུང་སྟོང་གི་མྱ་ངམ་ཐང་ཆེན་པོ་ཞིག་ཏུ་གྱུར་ལ།རྐང་ལམ་ཕྲ་མོ་དེའང་རང་དབང་མེད་པར་བོར་པ་རེད།འདི་ནི་ཆོ་འཕྲུལ་གྱི་བཙན་དབང་ཡིན་ལ་ཨ་ཁུ་དབང་བྷོའི་སྟོང་གཞིག་ཀྱང་ཡིན།ཨ་ཁུ་དབང་བྷོའི་སྟོང་གཞིག་གི་འབྲས་བུའང་ཡིན་སྲིད།

      འོན་ཀྱང་རྩོམ་པ་པོས་གར་ལྗོངས་དེ་ལྟ་བུ་ཞིག་དུས་དེ་འདྲ་ཞིག་ཏུ་བཀོད་སྒྲིག་བྱེད་པའི་གོ་རིམ་ཁྲོད་ནས་ང་ཚོས་ཤེས་དགོས་རྒྱུ་ཞིག་ཀྱང་མཆིས་ཏེ།ཕྱུགས་སྐྱོང་བའི་རྩྭ་ཐང་གི་འཚོ་བར་མཚོན་ན།དུས་དེ་ནི་ཉིན་གཅིག་གི་ལས་མཇུག་སྡུད་པའི་མཚམས་ཡིན་ལ་ཉིན་གཅིག་གི་ངལ་གསོ་ཆེན་པོ་བྱ་རན་དུ་སླེབས་པའི་སྐབས་ཀྱང་རེད།མི་སུ་དང་སུ་ཞིག་ཡིན་རུང་ངལ་གསོའི་མཚམས་སུ་སླེབས་ཙ་ན།གདོད་ནས་ཇི་ལྟར་ངལ་གསོ་རྒྱུའི་བསམ་གཞིག་གི་དབུ་བརྩམས་ངེས།རྩྭ་ཐང་གི་གཞོན་ནུ་ཕོ་མོ་ཚོར་གོམས་སྲོལ་དུ་གྱུར་པའི་ངལ་གསོ་སྟངས་ནི་སྒོ་ཕྱུགས་ལྷས་སུ་བསྡུས་ཏེ་མུན་རུབ་པ་དང་ལྷན་དུ་གཞོན་ནུ་ཚོས་རུ་མྱུལ་ཏེ་ཚེ་རབས་གཏན་གྱི་ཆུང་མ་འཚོལ་བའམ།ཡང་ན་ཡུན་ཐུང་ཞག་གི་མཛའ་མོ་འཚོལ་བ་བཞིན་དུ་གཞོན་ནུ་མ་ཚོས་ཀྱང་དེ་དང་དེ་ལྟ་བུ་ཞིག་ལ་རེ་སྒུག་བྱེད་པར་གདོན་མི་ཟ།འདི་ནི་རྩྭ་ཐང་གི་གཞོན་ནུ་ཕོ་མོ་ཚོའི་ངལ་གསོ་སྟངས་ཤིག་ཡིན་ལ་འཇིག་རྟེན་རོལ་སྟངས་ཤིག་ཀྱང་རེད།འདི་ལྟའི་འཚོ་བའི་འདུ་ཤེས་ཆགས་ནས་ཡུན་རིང་འགོར་པའི་གར་ལྗོངས་ཤིག་སྔོན་དུ་བཏང་ཡོད་ཚེ།སྤྱིར་ན་དེ་དང་དེ་ལྟ་བུའི་ཟློས་གར་ཞིག་ཀྱང་འཁྲབ་པར་སྲིད་མོད།འདིར་རྩོམ་པ་པོས་མངོན་སུམ་འཚོ་བ་དེ་ལྟ་བུ་ཞིག་རྨང་དུ་བྱས་པ་ཙམ་ལས།མངོན་སུམ་དོན་ལ་གཞོལ་བའི་འཇིག་རྟེན་ཞིག་ཇི་བཞིན་དུ་བྲིས་པ་མ་ཡིན་པར་རྟོག་པ་འཆར་ཡན་གྱིས་ཨ་ཁུ་དབང་བྷོའི་སྟོང་གཞིག་གི་སེམས་ཁམས་རང་དབང་གིས་སྔོག་འདོན་བྱས་པ་རེད།ལྷག་པར་དུ་རྩྭ་ཐང་གི་གཞོན་ནུ་ཕོ་མོ་ཚོར་མཆིས་པའི་འཇིག་རྟེན་རོལ་སྟངས་ཀྱི་འདུ་ཤེས་དེ་ནི།དོན་དུ་འཇིག་རྟེན་འཁོར་བའི་ཐོག་མ་དང་མཐའ་མ་རེད་ཅེས་ཀྱང་འགལ་བ་མེད་ཚོད་དུ་གདའ་མོད།ཨ་ཁུ་དབང་བྷོས་གླིང་སེང་ཆེན་རྒྱལ་པོའི་ལྷ་རྟ་རྐྱང་རྒོད་གཡེར་བ་ལྟ་བུ་ཞིག་འཐོབ་ཆེད།ཁྱིམ་གྱི་རྒྱུ་ནོར་ཡོད་ཚད་བློས་བཏང་བ་ལས།བུ་དང་མནའ་མར་མཁོ་བའི་ཅ་ལག་དང་རྒྱན་ཆ་སོགས་ཅི་ཡང་བསྒྲིགས་མེད་པ་རེད།འོན་ཏེ་ཨ་ཁུ་དབང་བྷོ་ནི་རང་དབང་མེད་པར་འཇིག་རྟེན་གཞན་ཞིག་ཏུ་ཕྱིན་ཏེ་འཇིག་རྟེན་པའི་འཚོ་བ་ངོ་མ་ལྟ་བུ་ཞིག་རོལ་པ་དེ་ནི་ཨ་ཁུ་དབང་བྷོའི་སྟོང་གཞིག་གིས་གྲུབ་ལ།རྩོམ་པ་པོས་དགོས་དབང་གཞན་ཞིག་གི་སླད་དུ་རྟོག་པ་འཆར་ཡན་གྱིས་དྲངས་པའི་འཇིག་རྟེན་རོལ་སྟངས་ཤིག་ཀྱང་རེད་སྙམ།

      རྒྱུ་མཚན་ནི་ཨ་ཁུ་དབང་བྷོ“ཕོ་ལོ་ལྔ་བཅུ་བརྒལ་ནས་དྲུག་ཅུ་སོ་ཡི་ཕྲེང་ཐག་ཆད་རུང་”“ཁ་འདོན་དགེ་སྦྱོར་དང་སྨྱུང་གནས་སོགས་སྲུང་མེད”པའི་ཁར།“ཞལ་འདེབས་དང་མང་ཇ་འབུལ་བ་སོགས་ཕྱོགས་གང་ཡིན་རུང་སྦྱིན་པའི་ལག་ཟུང་ནམ་ཡང་དམ་པོར་བཅིངས”ཟིན་པས།རང་ཅག་བོད་མིའི་འདུ་ཤེས་ལྟར་ན།དེ་ལྟ་བུའི་སེར་སྣ་ཅན་ཞིག་ཡི་དྭགས་ཀྱི་གནས་སུ་མི་འགྲོ་གྲང་།དེའི་ཕྱིར་རྩོམ་པ་པོས་ཀྱང་ཨ་ཁུ་དབང་བྷོ་ཡི་དྭགས་ཀྱི་འཇིག་རྟེན“ཉི་མ་ས་ཞི་ལས་ཐོན་ཞིང་།ཕྱིར་ས་གཞི་ལ་བྱིང་བ་དང་ཀུན་ནས་འདྲ་བའི་”དམྱལ་ཁམས་ཤིག་ཏུ་ཁྲིད་དེ།“འཕྱི་བའི་ཁུང་དང་ཁྱད་པར་ཆེར་མི་འདུག་པའི་སའི་ཁང་མིག་དོག་པོ་ཞིག”ཏུ“སྙིང་རྗེའི་ཡུལ་དུ་གྱུར་པའི་མིའུ་ཐུང་མ་སྨད་གཉིས”དང་ལྷན་ཅིག་ཏུ་རྨི་ལམ་ལྟ་བུའི་འཇིག་རྟེན་ཞིག་གཞི་ནས་བསྐྱངས་པ་རེད།

      དོན་དུ་ཨ་ཁུ་དབང་བྷོས་དངུལ་རའི་རྩྭ་ཐང་ནས་ཀྱང་འཇིག་རྟེན་འབའ་ཞིག་གཉེར་ཡོད་པར་གོར་མ་ཆག་མོད།རྩྭ་ཐང་དེར་འཚོ་སྐབས་ལྷ་རྟ་རྐྱང་རྒོད་གཡེར་བ་ལྟ་བུའི་ཁོ་ནའི་ཕྱིར་དུ་འཚོ་བ་ལས།ཁྱིམ་དང་ཆུང་མ་དང་བུ་དང་མནའ་མ་སོགས་དང་དེ་དག་ལ་མཁོ་བའི་ཅ་ལག་དང་རྒྱན་ཆ་སོགས་གཅིག་ཀྱང་དོན་དུ་མ་གཉེར་པར་གདའ།དེའི་ཕྱིར་ཨ་ཁུ་དབང་བྷོ་ནི་རང་གི་ཞེན་བློ་ཁོ་ནའི་ཆེད་དུ་གནས་གཅིག་ལ་ཡར་འཁོར་དང་བསྐྱར་འཁོར་བྱས་ནས་འདུག་ཅིང་།འདི་ནི་ཕྱོགས་ཆེ་ས་ནས་བལྟས་ཚེ་འཁོར་བའི་འཁོར་ཕྱོགས་ཤིག་ཀྱང་ལོས་ཡིན་སྙམ།

      ལྷག་ཏུ“ཞོགས་པའི་ཉི་ཟེར་མུ་མེད་རྩྭ་ཐང་གི་རྒྱན་དུ་མངོན་པའི་ཚེ”ན།ས་གཞི་ཡོངས་སུ“གསར་བ་གསར་བའི་ཚུལ་དུ་མངོན་ལ་བཙས་མ་ཐག་པའི་བྱིས་པ་ཞིག་དང་ཀུན་ནས་འདྲ”ཕྱིར།ཡིད་ཆས་དང་སྤོབས་པས་ཁེངས་ཤིང་དྲི་དང་ལྷད་ཀྱིས་མ་སྦགས་པའི་མཇུག་འབྲས་ཤིག་ཏུ་རེ་ན་འཚམ་ངེས་སྙམ་མོད།ཨ་ཁུ་དབང་བྷོའི་སྟོང་གཞིག་ཐམས་ཅད་དེ་ལས་ལྡོག་སྟེ་སྒྱུ་མ་མཁན་གྱི་འཕྲུལ་སྣང་ལྟར་གྱུར་པ་རེད།མ་གཞི་རང་གི་ཞེན་བློར་སྟོབས་ཆེ་བས།གླིང་སེང་ཆེན་ལྟ་བུའི་ལག་ནས་ལྷ་རྟ་རྐྱང་རྒོད་གཡེར་བ་ལྟ་བུ་ཞིག་ཉོས་ཤིང་།དམྱལ་ཁམས་འགྲིམས་ཏེ་ཡི་དྭགས་དང་གཉེན་བསྒྲིགས་པ་རེད།འདིའི་མཚམས་སུ་ཁ་ཕྱིར་འཁོར་ཏེ་སྒྲུང་གཏམ་འདིའི་མིང་ལ་བལྟས་ཚེ།《ཆོ་འཕྲུལ》ཞེས་པར་ང་ལ་གོ་བ་གསར་བ་ཞིག་སྐྱེས་བྱུང་།

     ཨ་ཁུ་དབང་བྷོའི་སྟོང་གཞིག་ཡིན་ན་འདྲ།ཁོང་གི་ཞེན་བློ་ཡིན་ཡང་རུང་།གང་ལྟར་དེ་ལྟ་བུའི་འཇིགས་རུང་གི་གནས་གང་མང་དང་ཕྲད་རྗེས།ཨ་ཁུ་དབང་བྷོས་གདོད་ནས“ཨ་ལགས་ལྡོང་ཚང་ལ་གནས་ཚུལ་རྣམས་ཞུས་པ”རེད།ཕྱིར་དྲན་ཐེངས་ཤིག་བགྱིས་ན།ཨ་ལགས་ལྡོང་ཚང་གདན་སར་འགོད་སྐབས་ཨ་ཁུ་དབང་བྷོ་ལ“སྡེ་བ་རུ་སྐོར་ཡོངས་ཀྱིས་རྒད་པོ་སེར་སྣ་ཅན་དང་དད་ལོག་སོགས་ཀྱི་མིང་ཡང་འགོད་ཀྱིན་ཡོད”སྟབས།བདག་གི་སེམས་སུ་“འཇིགས་པ་མ་རིག་ན་བླ་མ་མི་དྲན”ཞེས་པར་གོ་རྒྱུ་འདུག་ཨང་སྙམ།

       བཞི་བ།གསལ་འདེབས་ཚུལ་དུ།

     འཇིག་རྟེན་རྩོད་སྒྲུབ་རིང་ལུགས་ཀྱི་ཐད་ནས་ཞིབ་ཏུ་བསམས་ཚེ།ཨ་ཁུ་དབང་བྷོའི་མི་ཚེ་ཡོངས་ཀྱི་བྱེད་སྟངས།དགོང་དྲོ་ཞིག་དང་ནངས་མོ་ཞིག་དང་ཕྱི་ཉིན་དགོན་པར་སོང་བ་བཅས་ཧ་ལམ་ཉིན་གཅིག་ལྷག་གི་དུས་ཡུན་ཁྲོད་སྟོང་གཞིག་དང་ཕྱིར་དྲན་དང་མངོན་སུམ་བཅས་རྐྱ་སུམ་འཐབ་ཀྱིས་རྫོགས་པར་བྱས་འདུགའདི་ཡང་མ་གཞི་ནས་ཆོ་འཕྲུལ་ཞིག་མ་ཡིན་ནམ།མངོན་སུམ་རིང་ལུགས་སམ་དྲང་བརྗོད་གང་ཞིག་གི་ངོས་ནས་བལྟས་ན།རྩོམ་པོ་པོའི་རྟོག་བཟོ་ཁོ་ནར་བརྟེན་ནས་གྲུབ་པ་ཞིག་ཏུ་གྱུར་པར་མ་ཟད།ཐུབ་བསྟན་རིག་གནས་ལ་བྱང་ཆ་མེད་པ་ཞིག་དང་བོད་མིའི་ཀུན་རྟོག་མི་ཚོར་བའི་ཀློག་པ་པོ་ཞིག་གིས་བཀླག་ན།སྒྲུང་གཏམ་གྱི་བརྒྱ་ཆའི་བདུན་ཅུ་ཙམ་ལྷུག་བརྗོད་རོལ་རྩེད་ཙམ་ཁོ་ནར་འདོད་ངེས།འོན་ཏེ་འདི་ནི་མཐའ་གཅིག་ཏུ་སྐྱོན་གྱི་གྲས་སུ་བལྟ་མི་རུང་སྟེ།རྩོམ་རིག་བརྩམས་ཆོས་ཤིག་རོལ་མྱོང་བྱ་བར་ཐོག་མའི་ཆ་རྐྱེན་ནི་བརྩམས་ཆོས་དེ་འབྱུང་སའི་ཁོངས་ནས་ཞོ་ལྟར་ཆགས་པའི་རིག་གནས་གང་ཞིག་རྒྱུས་ལོན་བྱ་དགོས།ཡིན་ཡང་སྟག་འབུམ་རྒྱལ་གྱི《ཉིན་གཅིག་གི་ཆོ་འཕྲུལ་》དང་བསྡུར་ཚེ།ཨ་ཁུ་དབང་བྷོའི་མི་ཚེའི་འཚོ་བའི་གོ་རིམ་དེ།《ཉིན་གཅིག་གི་ཆོ་འཕྲུལ》ནང་གི་གཡང་འབུམ་ལྟར།བྱིས་པའི་དུས་ནས་ན་ཚོད་དར་ལ་བབ་པ་དང་།ན་ཚོད་དར་བ་ནས་རིམ་བཞིན་རྒས་ཤིང་འཁོགས་པ།དེ་དག་གི་བར་དུ་འཇིག་རྟེན་སྐྱོང་སྟངས་སོགས་ཞིབ་ཚགས་སྒོ་ནས་མངོན་སུམ་སྣང་བརྙན་ཞིག་ཏུ་གྲུབ་པ་ལྟ་བུ་མིན་པས།ཨ་ཁུ་དབང་བྷོ་མི་སྣ་སྐྱ་རིས་ཀྱི་ཚུལ་ཞིག་གམ་རགས་མོའི་དབྱིབས་ཤིག་ཏུ་སྣང་བ་ལས་ཚོན་མདངས་དང་ལྡན་པའི་མི་སྣ་ཞིག་ཏུ་སྣང་བ་ལས་ཚོན་མདངས་དང་ལྡན་པའི་མི་སྣ་ཞིག་ཏུ་གྱུར་མི་འདུག་སྙམ་ལ།རྩོམ་པ་པོས་བསྡུས་ཆེ་བའི་སྐྱོན་ཞིག་ཀྱང་ཞར་ལ་ཆགས་ཡོད་ཚོད་གདའ།

      གཞན་ཡང་གོམས་སྲོལ་ལྟར་མངོན་སུམ་དོན་རྐྱེན་དང་སྟོང་གཞིག་གི་དོན་རྐྱེན་གཉིས་ཀའི་འགོར་ཁོར་ཡུག་རགས་མོ་རེ་བྲིས་པ་ལས་ཞིབ་ཆ་ཆེར་མི་ལྡན།གལ་ཏེ་དཔེ་གཞིའི་ཁོར་ཡུག་ཅིག་ནས་མི་སྣ་དཔེ་གཞི་ཅན་ཞིག་འཚར་ལོངས་འབྱུང་དགོས་ན།འདི་ཡང་སྒྲུང་གཏམ་གྱི་ཞན་ཆར་མི་འགྱུར་གྲང་།ལྷག་པར་དུ་ཁོར་ཡུག་གི་བཀོད་པ་དང་དོན་རྐྱེན་གྱི་བྱུང་རིམ་དང་མི་སྣའི་སེམས་ཁམས་ཀྱི་འཕེལ་འགྱུར་བཅས་ཀྱི་བར་ན།ཤ་ཁྲག་རུས་གསུམ་ལྟ་བུའི་འབྲེལ་བ་ཞིག་བཙལ་རྒྱུ་དཀའ་བས།དེ་གསུམ་ག་སྐབས་རེར་ཕན་ཚུན་འབྲེལ་མེད་དོན་གཞན་དུའང་འགྱུར་སྲིད་པ་གོང་ནས་འཚོལ་རྟོག་གི་སྐབས་སུ་སོང་ཟིན་པས།འདིར་མཛུབ་འཛུགས་ཀྱིས་ངལ་བ་བསྐྱར་མྱོང་མི་བྱ།དེ་བཞིན་དུ་ཨ་ཁུ་དབང་བྷོ་སྟོང་གཞིག་ལས་འཕྲོས་ཏེ།ཡི་དྭགས་ཀྱི་ཡུལ་དུ་བཅར་དོན་ཁོང་ཉིད་སེར་སྣ་ཆེ་བའི་རྒྱུ་ལ་བརྟེན་དགོས་པ་སྨོས་མེད་ཡིན་མོད་ཀྱང་།ཨ་ཁུ་དབང་བྷོའི་བྱེད་སྟངས་ཀྱི་ཆ་ནས་བལྟས་ན།རང་གི་འོད་བློ་སྟེ་ལྷ་རྟ་རྐྱང་རྒོད་གཡེར་བ་ལྟ་བུ་ཞིག་ཉོས་ཏེ་ཞིང་ཆེན་མང་པོ་ནས་བསླེབས་པའི་རྫོང་གི་རྟ་རྒྱུག་འགྲན་ཚོགས་སུ་ཞུགས་ཤིང་།མཚན་སྙན་གྱི་བ་དན་ཞིག་ལེན་རྒྱུའི་ཆེད་དུ་ཅི་ཡང་གཏོང་བར་ནུས་པའི་རྒད་པོ་ཞིག་རེད།དེས་ན་སེར་སྣ་ཆེ་བས་ཡི་དྭགས་ཀྱི་སར་བཅར་དགོས་པ་དང་།ལྷ་རྟ་ཉོས་ཏེ་མཚན་སྙན་འཐོབ་འདོད་ཀྱི་ཕྱིར་དུ་ཅི་ཡང་གཏོང་ཕོད་པ་གཉིས་འགལ་བ་མ་ཡིན་ནམ།ད་དུང་སྟེ་གླིང་སེང་ཆེན་དང་འདྲ་བའི་སྐྱེས་བུའི་ལག་ནས་ལྷ་རྟ་རྐྱང་རྒོད་གཡེར་བ་དང་འདྲ་བ་ཞིག་མཐོང་འཕྲལ།རང་ཉིད་ཀྱི་རྟ་རྒོད་ཀྱང་དམར་སྟེ་ཡུལ་ཚོའི་རྟ་རྒྱུག་འགྲན་བསྡུར་ཁྲོད་ཤོག་ཁ་ཡོངས་ནས་ཨང་དང་པོ་ལེན་མཁན།རང་ཉིད་ཀྱི་བློས་ཐུབ་གྲོགས་པོ་ལྟ་བུར་གྱུར་པ་དེ་ཡང་སྣང་མེད་དུ་གྱུར་སྟབས།འདི་ནི་སེར་སྣ་ཅན་གྱི་སེམས་ཁམས་དང་ལྡོག་ཟླར་མ་སོང་ངམ་སྙམ།

       ང་ཚོས་གསལ་འདེབས་བགྱིད་ཞོར་དུ་བརྩམས་ཆོས་འདིའི་ལུས་སུ་ཞིབ་ཏུ་བལྟས་ཚེ།གལ་སྲིད་སྒྱུ་རྩལ་བརྩམས་ཆོས་ནི་བརྗོད་གཏམ་དང་གོ་དོན་གྱིས་གྲུབ་པ་ཞིག་དང་།དོན་ནི་ཚིག་གིས་སྟོན་པ་ཞིག་དང་རྩོམ་རིག་གི་བརྗོད་གཏམ་ནི་བརྡ་སྤྲོད་ཀྱི་ཏོག་ཅིག་བཅས་ཡིན་དགོས་ན།རང་ཅག་བོད་ལའང་བོད་མི་བྱིངས་ཀྱི་ཚིག་སྦྱོར་སྤེལ་སྟངས་ཤིག་དང་གོ་བ་ལེན་སྟངས་ཤིག་ཡོད་སྟབས།བརྡའི་སྦྱོར་བ་དེར་ཡང་རང་ཡུལ་གྱི་གོམས་ཕྱོགས་ལྟར་དང་བརྩམས་ཆོས་བྱེ་བྲག་པ་ཞིག་གིའབྲི་སྟངས་ལྟར་བྱས་ན་མི་འོས་ཏེ།བོད་མི་བྱིངས་སུ་ཐུན་མོང་གི་བརྡ་སྤྲོད་ལུགས་ཤིག་གཏན་དུ་འཁེལ་པ་ལྟར་མ་འཁྱོངས་ན།གོ་བ་ལེན་སྟངས་ཐུན་མོང་བ་ཞིག་འགྲུབ་མི་སྲིད་པས།ཚིག་གི་སྦྱོར་བས་སྐབས་དོན་གསལ་བར་བསྟན་རྒྱུ་ཁག་ལ་གཏམ་གྱི་ཏོག་ཅིག་འགྲུབ་རྒྱུའང་དཀའོ་སྙམ།རྒྱུ་མཚན་དེའི་ཕྱིར་བརྩམས་ཆོས་འདིའི་ནང་གི་བྱ་བའི་མིང་སྟེ་ཞུགས་དང་འགོད་དང་བྱེད་དང་སྒྱུར་སོགས་ཀྱང་བོད་མི་བྱིངས་སུ་ཐུན་མོང་དུ་གྲུབ་པའི་བརྡ་སྤྲོད་ལུགས་ལྟར་འབྱུང་ན་བླ་ལྷག་གིས་ལེགས་པར་འགྱུར་སྲིད་དོ།    །