རྨོག་ཐང་དཀར། 2021-04-02
ཀྭ་ཡེ་སྙིང་སྡུག་འཁྲི་ཤིང་གཞོན་ནུ་དཔལ།།
ཁ་མིན་གཏིང་གི་རྡོ་རྗེ་གསོར་མོ་ཡིས།།
ག་ས་ཡུལ་ནི་མ་ངེས་གང་ཀུན་ཏུ།།
ང་བདག་ལྷན་སྐྱེས་ཉིད་ལ་ཨི་ཁུང་བརྟོལ།།
ཅ་ནེ་དབྱིག་འཛིན་སྤྲང་ཀོག་རི་ལ་འཁྱམས།།
ཆ་བྱད་ཀུན་བཟང་བླ་མའི་ཐོར་ཚུགས་ཅན།།
ཇ་ཆང་གཉིས་མེད་དག་པ་རབ་འབྱམས་ཀྱི།།
ཉ་གང་ཟླ་ཞལ་ཅན་གྱི་རྣལ་འབྱོར་མཁྱེན།།
ཏ་ལེན་སྣོད་དུ་གཏོར་མའི་རྩམ་དྲི་འཐུལ།།
ཐ་མལ་སྤྱོད་པའི་དགོངས་རྫོགས་གནད་དུ་སྨིན།།
ད་ལྟ་ལྔ་བདོ་དུས་ཀྱི་ཡང་ཐ་འདིར།།
ན་སྨད་ལྟུང་བས་མ་གོས་གཅིག་པུ་བ།།
པ་སངས་ཐུགས་ཀྱི་གཤིས་ལ་འོད་བརྒྱ་ཕོག།
ཕ་ལམ་དམར་པོའི་ཁྲ་རྒྱན་གསུང་གི་གསང་།།
བ་འོ་མི་འཐུང་དཀའ་ཐུབ་སྤྱོད་པ་དང་།།
མ་ལུས་བརྟུལ་ཞུགས་འཛིན་པའི་རྫོགས་སངས་རྒྱས།།
ཙ་རིའི་སྨྱུག་ཕྲན་དང་འདྲའི་ཆོས་དབྱིངས་ཐུགས།།
ཚ་ཟེར་ཁྲི་གདུགས་འོག་ཏུ་ཞི་ལྷག་བསྒོམ།།
ཛ་ཏི་སྡོང་བོའི་བསིལ་གྲིབ་ཉམས་དགའ་ནས།།
ཝ་སྐྱེས་རི་དྭགས་རྣམས་ཀྱང་ཞི་བར་གནས།།
ཞྭ་མེད་ལྷམ་ཀོག་རས་རྐྱང་ཤམ་གོས་ཅན།།
ཟ་འཐུང་རི་རྩྭ་སྨན་ལྡུམ་ཏིལ་འབྲུ་ཙམ།།
འ་འུར་ཡོ་མེད་བསམ་གཏན་སེམས་ཀྱིས་གསོལ།།
ཡ་གིའི་རྫོགས་ཆེན་བླ་མ་བདེ་གཤེགས་ལྷ།།
ར་མ་རྒྱ་མོའི་སྟངས་སྟབས་གཡུང་དྲུང་ཅན།།
ལྭ་ནག་དགའ་བདེ་ཆོས་སྐྱོང་ཞགས་པ་ཅན།།
ཤ་ཟན་སྲིན་པོ་དགུ་ཡི་ཕས་ཀྱི་རྒོལ།།
ས་མཁན་རྡོ་རྗེ་གཅོད་པས་རུས་དུང་འབུད།།
ཧ་ཅང་སྒྲོབ་ཉམས་ཆེ་བའི་ཚིག་རོ་ནི།།
ཨ་མཆོད་བནྡེའི་ཁ་ན་སྔགས་ཀྱི་ཚིག།
ཞི་ཁྲོ་ཉམས་བརྒྱ་འབར་བའི་ཀ་བཤད་འདི།།
རྟོགས་ལྡན་རྣལ་འབྱོར་ཆེན་པོའི་རང་རྣམ་ཡིན།།
རྩོམ་གསར། 10