ཁམས་སྨྱུག་གསར། 2020-10-12
ཟླ་གཞོན་འཛུམ་པའི་ལང་ཚོ་འཁུར་བའི་ལྷས།།
བརྩེ་བའི་རྒྱུད་མང་སོར་རྩེར་དྲངས་པའི་རླབས།།
སྲིད་ཞིའི་ཁྱོན་དུ་ཡང་ཡང་རྩེན་མཛད་པའི།།
དབྱངས་ཅན་འཛུམ་པའི་ལྷ་དེར་སྙིང་ནས་གུས།།
ཚོར་བའི་རླབས་ཀྱིས་ཕྱོགས་སུ་སྐྱོད་པ་ཡི།།
ཚིག་གི་དབྱངས་རྟ་འཁྲོལ་བའི་རྣམ་ཤེས་ལ།།
ཐ་སྙད་སྒྱུ་མའི་གཤོག་ཟུང་ཐོགས་པ་ན།།
སྲིད་གསུམ་སྣང་བ་བསླུ་བའི་གར་དུ་བསྒྱུར།།
ལས་ཀྱིས་འཁུར་བའི་མི་ཡུལ་གཙང་བོའི་འགྲམ།།
དགའ་སྐྱོ་ཟུང་གི་ངང་བ་རྩེན་པ་ན།།
འཚོ་བའི་རླབས་རིས་གཡོ་བའི་ངང་ཚུལ་གྱིས།།
ཚིག་གི་འདབ་ལོ་སྐྱོམ་པའི་གཏམ་རྒྱུད་མང་།།
མི་རྟག་ཟ་ཟིས་ངུ་སྐད་འཐེན་པའི་ཁྲོད།།
སྣང་བ་ལྷ་མོའི་རྐང་རྗེས་འཚོལ་བ་ཡི།།
བདག་གི་ལང་ཚོ་ནགས་ཀྱི་བྱ་ཁྱུ་བཞིན།།
ངེས་མེད་རྒྱལ་ཁམས་ཉུལ་བའི་ཚུལ་ལ་སྤྲོ།།
རེ་དོགས་ལྷ་འདྲེའི་ཞལ་ངོ་སྲུང་བ་ཡི།།
བཅོས་མའི་སེང་རས་སྤྲས་པའི་བུ་ཆུང་ལ།།
གྲོང་དང་ལམ་འཕྲང་བརྒལ་བའི་བར་མཚམས་ན།།
བརྗོད་མེད་ཡིད་ལ་འཁོར་བའི་ཡིག་ཕྲེང་གསལ།།
ཚོགས་དྲུག་ཕྱེ་ལེབ་ལྡིང་བའི་ཡིད་ཀྱི་ཁར།།
སྣ་ཚོགས་སྒྱུ་མའི་རོལ་རྩེད་གཡོ་བ་ན།།
དྲན་ཤེས་རླུང་གིས་གསེད་པའི་རྣམ་འགྱུར་གྱིས།།
སྙིང་གི་མེ་ལོང་ངོགས་སུ་ཁྱེད་ཉིད་འཛུམ།།
འདུས་བྱས་འཕྲེད་གླིང་འབུད་པའི་ན་ཆུང་གིས།།
རྨི་ལམ་སྒྱུ་མའི་རང་མཚང་སྟོན་པའི་ཚེ།།
རང་བྱུང་གདོད་ནས་གྲུབ་པའི་མཁའ་དབྱིངས་སུ།།
ཟང་ཐལ་རིག་པའི་གཞོན་ནུ་དགོད་ཅིང་འཛུམ།།
ལས་འབྲས་འཁྲུལ་བ་མེད་བའི་དེད་དཔོན་གྱིས།།
འཁོར་བའི་ཉིན་སྲིབ་ཀུན་ལ་བསྐྱོད་པ་ན།།
རེ་དོགས་འདབ་ལྕེ་སྐྱོམ་པའི་ངལ་དུབ་ཀྱིས།།
ཡིད་བློ་གཏིང་ནས་དགྱེས་པའི་སྐལ་བ་ཆད།།
སྐྱེ་འཆིའི་ཆོས་ཉིད་བརྒལ་བའི་དུར་ས་ན།།
སྣང་བ་ཚིག་གི་རི་མོ་ལ་ཞེན་པའི།།
ཟིན་མེད་འདོད་བའི་བུ་ཆུང་འཚོལ་བ་ཡིས།།
མཐའ་དང་ཟད་དུས་མེད་པས་སྐྱུར་ལ་ཞོག།
ངེས་འབྱུང་རི་སུལ་ལྷ་ཡི་དགའ་ཚལ་དུ།།
ཡིད་ཀྱི་ཏིང་འཛིན་སྤྲས་པའི་ཆོག་ཤེས་ཀྱིས།།
སེམས་ཀྱི་ངལ་དུབ་གསོ་བའི་ཟླ་བའི་བསིལ།།
རྩོམ་གསར། 10