མི་ཉག་འོད་ཟེར། 2020-09-14
ཁྱེད་ཉིད་སོང་ཤུལ་དུ།
སེམས་པ་འདི།
ནམ་ཟླ་འདིའི་གྲང་ཤུར་ཤུར་གྱི་མཁའ་དབུགས་ཇི་བཞིན།
འཁྱག་པས་བསྡམས་ཤིང་དྲན་པ་འཐོར།
དྲིན་ལྡན་གྱི་ཕ་ཡབ་ལགས།
འདུས་འབྲལ་གྱི་ཆོས་ཉིད་འདི།
གཏན་ཚིགས་ཀྱི་ར་བ་ལས་འགོངས་མི་ནུས་ཀྱང་།
ང་ད་དུང་ཁྱེད་ཉིད་ཀྱི་གམ་ན་ཡོད་ཡོད་འདྲ་བའི་འཁྲུལ་འཛིན་གྱི་ཀློང་ན།
ཁྱེད་ཀྱི་བྱམས་བརྩེ་དྲོན་མོ་སྙིང་ལ་སྒོམ་ཡོད།
ཁ་སང་།
ཕ་ཡུལ་ཞེས་གླེང་དུས།
ཕ་ཡུལ་ན་ཁྱེད་ཉིད་བཞུགས་པས།
ཕ་ཡུལ་ནི་ཁོ་བོའི་སེམས་ཀྱི་འཁྲི་ཤིང་ཡིན།
དེ་རིང་།
ཕ་ཡུལ་ཞེས་དྲན་དུས།
ཁྱེད་ཉིད་ང་ཚོ་དང་དུས་གཏན་དུ་གྱེས་ཟིན་པས།
ཕ་ཡུལ་ནི་ངའི་སེམས་ཀྱི་ན་ཟུག་ཡིན།
གྱེས་བྲལ་གྱི་གདུང་བ་འདི་སྙིང་དུ་བརྣགས་པར་དཀའ་ཡང་།
འདུས་འབྲལ་གྱི་ཆོས་ཉིད་ནི་ཡོངས་ཁྱབ་ཏུ་ངེས་གཤིས།
རྒྱང་བཞུད་ཀྱི་ཁྱེད་ཉིད་ལ་གྱེས་ཕྱག་ཕུལ་ཅིང་།
བདེ་བར་བཞུད་མཛོད།
འཁོར་བ་འཁོར་བའི་ཀློང་ན།
འཇིག་རྟེན་འཇིག་པའི་ཁྲོད་ན།
སླར་ཡང་ཁྱེད་ཀྱི་དཀྱེལ་ཡངས་པའི་བྲང་གཞུང་དུ།
བྱམས་དང་བརྩེ་བའི་དྲོད་ཁོལ་མྱོང་དགོས།
དུས་ཚིགས་འདིར།
གསེར་མདོག་གི་སྦྲུམ་པའི་ཕ་ཡུལ་ཅི་འདྲའི་མཛེས་ཨང་།
འོན་ཀྱང་། ཁྱེད་ཉིད་སོང་ཤུལ་དུ།
ཕ་ས་ཕ་ཡུལ་ཞེས་པའང་མིང་བྱང་སྐམ་པོ་ཞིག་ཏུ་གྱུར་ཟིན།།
རྩོམ་གསར། 10