དྲིན་ཕ་ལོའི་བཀའ་དྲིན་ཡིད་ལ་འཁོར།

ཀ་རྒྱའི་འཕྲིན་ལས་རྒྱ་མཚོ།        2020-07-22

རབ་དཀར་གངས་རིའི་མུ་ཁྱུད་དོ་ཤལ་རི་མོར་བཀྲ་བའི་ཞིང་ཁམས་ཀྱི།།

རི་བོ་མཐོ་ཞིང་ཆུ་བོ་གཙང་བའི་ནེའུ་གསིང་སྔོན་མོའི་སྤང་ཁུད་ནས།།

མཐིང་སྨུག་སྦྲ་ནག་དཔྱིད་དུ་ལྷུམས་པའི་ཕ་མེས་གཏམ་རྒྱུད་མ་ངེས་ཀྱང་།།

གཉེན་སྐྱོང་ལས་ལ་བྲེལ་བའི་ཨ་ཕའི་རྔུལ་ཆུ་བུ་ངའི་སེམས་ན་འཁྱིལ།།

ཟླ་ལམ་ཉིན་གྱིས་གཅོད་པའི་གྱི་ལིང་རྟ་ཕོའི་བང་རྩལ་ངོམ་བཞིན་དུ།།

རྭ་རྩེ་རྣོ་བའི་ཁལ་མ་དེད་དེ་རི་ལམ་འཕྲེད་ཀྱིས་གཅོད་པའི་དུས།།

གནག་སྣུམ་སྐྲ་ལོའི་ཉག་མ་རེ་རེ་སྐྱི་སེར་རླུང་བུས་སྒུལ་བའི་ཚུལ།།

ད་དུང་བུ་ངའི་ཀུན་རྟོག་མེ་ལོང་ངོས་ན་རི་མོ་བཞིན་དུ་གསལ།།

གནམ་ལོ་གསར་བའི་དུས་སྟོན་འདུ་འཛི་གཡོ་བའི་མི་ཚོགས་ཡོ་ལང་ཁྲོད།།

བརྩེ་བ་ཤམ་གྱིས་བཞུར་བའི་གྲོགས་དང་ན་ཟླས་དྲངས་པའི་མྱོས་བྱེད་སྐྱེམས།།

འཐུང་བས་ངག་གི་ལྡབ་ལྡིབ་ཚིག་དང་འཁྱར་འཁྱོར་འགྲོས་ཀྱི་གོམ་པའི་སྒྲ།།

ད་དུང་བུ་ངའི་ཀུན་རྟོག་མེ་ལོང་ངོས་ན་རི་མོ་བཞིན་དུ་གསལ།།

རབ་དཀར་སྤྲིན་པ་དུམ་བུ་དུམ་བུར་མཁའ་ལ་དལ་གྱིས་རྒྱུ་བའི་དུས།།

སྙན་མོའི་གླུ་གཞས་ངག་ལ་འགུག་བཞིན་བརྗིད་ཆགས་རྫ་རིའི་རི་སུལ་ནས།།

གཡང་དཀར་ལུག་ཁྱུ་སྤྲིན་དང་བསྡེབས་པའི་མི་ཚེ་བཞུད་ལམ་རིང་མོ་དེ།།

ད་དུང་བུ་ངའི་ཀུན་རྟོག་མེ་ལོང་ངོས་ན་རི་མོ་བཞིན་དུ་གསལ།།

དབྱར་སྐྱེས་རྔ་གསང་དལ་གྱིས་འཇགས་ཤིང་ཁྲུང་ཁྲུང་དཀར་མོ་གཤོག་རིང་མ།།

ཁ་བའི་གཡབ་མོ་བཞིན་དུ་ལྷོ་མོན་ཡུལ་དུ་གཤོག་ཟུང་རྡེབ་པའི་དུས།།

ཁབ་སྐུད་བསྣམས་ཏེ་དགུན་ལྭ་ཚེམ་པའི་ལག་རྩལ་སོར་མོ་འཁྱུག་པའི་འགྲོས།།

ད་དུང་བུ་ངའི་ཀུན་རྟོག་མེ་ལོང་ངོས་ན་རི་མོ་བཞིན་དུ་གསལ།།

རིམ་དང་ཁད་ཀྱིས་མི་རྟག་འཇིག་རྟེན་འཁོར་བའི་རང་གཤིས་མངོན་པ་བཞིན།།

ལས་ཀྱིས་བདས་པའི་མི་ཚེ་ཕྱེད་ཀ་རྨི་ལམ་བཞིན་དུ་ཡལ་བའི་ཚེ།།

དུང་བ་སྣུམ་པོའི་ལས་སྐལ་རྫོགས་པས་སེམས་ཀྱི་ཨ་ཐང་ཆད་པའི་ཉམས།།

ད་དུང་བུ་ངའི་ཀུན་རྟོག་མེ་ལོང་ངོས་ན་རི་མོ་བཞིན་དུ་གསལ།།

ཞག་གྲངས་སོར་མོས་བགྲངས་ཏེ་རེས་གཟའ་ཉི་མའི་ངལ་གསོར་སླེབས་པའི་ཉིན།།

སྨུག་པ་འཕྱུར་སའི་རི་བོའི་མགུལ་གྱི་རྐང་ལམ་ཕྲ་མོའི་ཕྱོགས་མཚམས་སུ།།

ལག་པ་ཐོད་དུ་བཞག་སྟེ་བུ་ངར་ལྟ་བཞིན་རེ་སྒུག་བྱེད་པའི་ཚུལ།།

ད་དུང་བུ་ངའི་ཀུན་རྟོག་མེ་ལོང་ངོས་ན་རི་མོ་བཞིན་དུ་གསལ།།

ཁྱུང་ཆེན་གཤོག་པ་བརྐྱངས་འདྲའི་མཐིང་སྨུག་གཡུ་སྦྲའི་གོ་འདབས་ཀྱི།།

དྲོད་ཁོལ་འཛོམས་པའི་པགས་སྟན་བདེ་བའི་སྟེང་དུ་རི་རྒྱལ་ལྷུན་པོ་བཞིན།།

ལྷོད་ཀྱིས་བཞུགས་ཤིང་དངུལ་གྱི་མ་ཎི་འཁོར་ཆེན་དལ་གྱིས་བསྐོར་བའི་ཉམས།།

ད་དུང་བུ་ངའི་ཀུན་རྟོག་མེ་ལོང་ངོས་ན་རི་མོ་བཞིན་དུ་གསལ།།

ནམ་ཞིག་གློ་བུར་སྟོན་གྱི་ལོ་མའི་རང་མདངས་ཤོར་བའི་ངང་ཚུལ་བཞིན།།

ཕ་ཁྱེད་གདོང་ལ་གཉེར་མའི་ཁེབས་ཤིང་དབུ་སྐྲ་དུང་ལྟར་གྱུར་ན་ཡང་།།

མ་བཅོས་རང་བཞིན་སེམས་ན་འཁྱིལ་བའི་བྱམས་བརྩེ་དྲོན་མོའི་འཛུམ་དཀར་དེ།།

ད་དུང་བུ་ངའི་ཀུན་རྟོག་མེ་ལོང་ངོས་ན་རི་མོ་བཞིན་དུ་གསལ།།

ཡོད་ཚད་བུ་ངའི་ཀུན་རྟོག་མེ་ལོང་ངོས་སུ་རི་མོ་བཞིན་དུ་གསལ་ན་ཡང་།།

བཀའ་དྲིན་གཞལ་ཐབས་མེད་པའི་ཡབ་ཆེན་ཁྱེད་ཀྱི་མི་ཚེའི་བདེ་སྡུག་ལ།།

མདོ་མེད་བདག་གིས་ཨེན་ཙམ་བསམ་བློ་གཏོང་བའི་གོ་སྐབས་ཕྲ་བ་དེར།།

བསམ་ཞིང་བསམ་ན་བདག་གི་རང་གཤིས་ངན་པ་འདི་ལ་ཨ་ཐང་ཆད།།

ད་ནི་ཕ་ཁྱེད་རྣམ་ཤེས་སྐྱེན་པོའི་མདའ་མོ་ལྟོང་ལས་ཤོར་བ་བཞིན།།

ཅོལ་ཆུང་རང་སྐྱ་བྲལ་བའི་བུ་ཡི་ཆུ་བུར་མིག་ལས་ཡལ་བའི་དུས།།

ཆོ་ངེ་དང་བཅས་མཆི་མའི་ཆར་བས་མཁུར་ཚོས་འཛིན་མ་གཤེར་བ་ལས།།

དྭངས་གཙང་བསྔོ་བ་ཙམ་གྱི་སྐྱེལ་མ་བྱེད་པའི་ནུས་པ་བྲལ་བས་སྐྱོ།།


  • ལེ་ཚན་སྔོན་མ།:སྣང་བའི་མགུར་མ།
  • ལེ་ཚན་རྗེས་མ།:ལམ་ཐུག་ལྷ་མོ་ལ།