ཙ་སུར་སྦྱིན་པ། 2020-03-27
ལྷ་རྗེ་མི་རུ་བབས།
མི་བུ་ལྷ་རྗེ་རུ་གྱུར་པ།
ཅི་འདྲའི་རྨད་བྱུང་གི་སྐལ་བ་ཞིག་རེད་ཨང་།
མི་སེམས་ལྷ་ཡིས་སྐྱབས།
ལྷ་སེམས་མི་ཡིས་བཅོས།
ནད་པ་སྨན་གྱིས་གསོས།
འདི་ནི་ལྷ་རྗེ་མི་རུ་བབས་པའི་ལྷ་ཚོགས་ཤིག
གོས་དཀར་པོ་ཅན་ཀྱི་རུ་དཔུང་།
གློ་དཀར་པོ་ཅན་གྱི་སྙིང་སྟོབས།
སེམས་དཀར་པོ་ཅན་གྱི་ལྷག་བསམ།
ཅི་འདྲའི་གཞལ་དུ་མེད་པའི་བྱ་གཞག་ཅིག
འདི་ནི་གོང་ནས་མ་གནང་ཞིང་།
གནམ་ནས་མ་བབས་པ།
ཞོལ་ནས་མ་ཕུལ་ཞིང་།
ས་ནས་མ་སྐྱེས་པའི་སེམས་དཔའི་དཔུང་སྡེ་ཞིག
ཉིན་མཚན་དབྱེར་མེད་དུ།
རྒྱབ་ཀྱི་གོས་མ་ཕུད་ཅིང་མིག་གིས་ནད་པ་མ་བོར་བར།
འདུག་ས་རྐུབ་སྟེགས་དང་བལྟ་ས་ནད་ཡམས།
ཉལ་ས་རྡོ་གཅལ་དང་ཟ་ས་ཤོག་ཕོར་དང་མ་བྲལ་བའི་ཁྱེད་ཚོ།
ལྷ་རྗེ་མི་རུ་བབས་པའི་སེམས་དཔའ་སེམས་མའི་ཚོགས་
དེ་ཅི་ལ་མིན།
དཀའ་བས་ཚེགས་ཕུད།
ལས་ཀྱིས་ནད་བཅོས།
ཚུར་རྒོལ་མེད་རུང་ཕར་རྒོལ་ལ་བྲེལ།
ནང་མི་བཞག་སྟེ་གཞན་མི་སྐྱོབ་པའི་རིམས་ནད་འཇོམས་པའི་
འཐབ་མོ་བ།
ཁྱེད་ཚོ་དེང་གི་དཔའ་བོ་དང་དུས་ཀྱི་རླབས་ཆེ་བའི་མི་སྣ་ཏག་
ཏག་ཡིན།
མི་ཞུམ་པའི་གདེང་ཐོབ།
མི་སྔངས་པའི་དཔའ་བརྙེས།
མི་འཇིགས་པའི་གོ་ཆ་གྱོན་ཏེ།
མི་མཐུན་པའི་རིམས་ནད་ལ་འཐབ་འཛིང་བྱེད།
མི་འགྱངས་པར་གཡུལ་འགྱེད་འདི་ལས་རྣམ་པར་རྒྱལ་བའི་
ཆོད་སེམས་བརྟན།
དུས་ཀྱི་དཔའ་བོ་དང་།
ལྷ་རྗེ་མི་རུ་བབས་པའི་སྨན་པ།
མི་རྗེས་བླ་རུ་བཀུར་བའི་ནད་སེལ་གྱི་འགྲོ་བའི་མགོན་པོ།
ནད་པའི་མིག་དང་སྨན་པའི་དོན་དུ་འགྱུར་བའི་ཁྱེད་ཚོ།
མི་རིགས་དང་རྒྱལ་ཁབ་ཀྱི་ལས་དབང་ཕྲག་ཏུ་བླངས་པའི་
གདོང་མཆོང་བ་ཡིན།
གཞན་དོན་སྒྲུབ།
མིང་དོན་མཚུངས།
རྒྱལ་ཁབ་སྐྱོབ།
འདི་ནི་ལྷ་རྗེ་མི་རུ་བབས་པའི་སེམས་གཤིས་དང་།
བཅོས་མིན་དོན་གྱིས་སྒྲུབ་པའི་རུ་དཔུང་ཁག་ཅིག་གི་ལ་རྒྱའི་
རང་སྒྲ་ཡིན།
ལྷ་རྗེ་མི་རུ་བབས་པའི་སྨན་པ།
འགྲོ་བའི་ནད་རིམས་སེལ་བའི་དྲང་སྲོང་འཚོ་བྱེད།
ཡི་རངས་དང་གུས་འདུད་མ་བོར་བར་སླར་ནས་སླར་དུ།
ཁྱེད་ཚོ་ལྟ་བུ་ལྷ་རྗེ་མི་རུ་འབབ་པའི་རེ་སྨོན་དང་ཡིད་ཆེས་
གྲངས་མེད་ཀྱིས་བརྟས་སོ། །
རྩོམ་གསར། 10