རྣམ་ཤེས་ཕྲ་མོ། 2020-03-27
རང་ཚེ་སྲོག་འདི་ལས་འདང་ཆེན་ཞིག་མེད་ཀྱང་།།
སྲོག་དམར་པོ་འདི་ཡང་གཞན་དོན་དུ་འབུལ་མཁན།།
དགྲ་གཡུལ་ས་འཐབ་པའི་དེང་རབས་ཀྱི་དཔའ་བོ།།
ལུས་གོས་དཀར་གྱོན་པའི་བྱང་སེམས་ཚོ་བསྟོད་དོ།།
རང་ཁྱིམ་མི་དག་དང་ལྷན་ཚོགས་དེ་མི་ཆོག།
ཟས་ཞིམ་པོ་ཞིག་ཀྱང་ཟ་ཁོམ་དེ་གན་ཡོད།།
ལུས་ཤ་ཁྲག་འདྲེས་པའི་བུ་ཕྲུག་དག་ཡོད་ཀྱང་།།
དེ་སྣང་མེད་དོར་བཞིན་གཞན་དོན་ལ་འཇུག་མཁན།།
འདི་བྱེད་དགོས་སོགས་ཀྱིས་དུང་སྒྲ་དེ་བསྒྲགས་ཀྱང་།།
གནད་འགག་ཏུ་ཕྱིན་དུས་གོ་མེད་ངང་གནས་མཁན།།
དེང་འཇིག་རྟེན་དག་ཏུ་འབུམ་ཕྲག་རང་ཡོད་མོད།།
བཤད་རྐྱང་པ་མ་ཡིན་ལག་བསྟར་དེ་བྱེད་མཁན།།
གནས་རྙོག་འཛིང་ཆེ་བའི་འཇིག་རྟེན་གྱི་ཁམས་ལ།།
འདི་འབྱུང་དང་མི་འབྱུང་བཤད་མཚམས་དེ་དཀའ་མེད།།
གནད་འགག་འགག་རེ་ལ་དཔའ་བོ་རེ་ཡོད་པས།།
དེང་གནད་དོན་འདི་ལ་དཔའ་བོ་དག་མཛད་མཁན།།
ངལ་དལ་མོ་ཞིག་ཀྱང་གསོ་ཁོམ་དེ་མེད་མཁན།།
གཏམ་སྙན་མོ་ཞིག་ཀྱང་བཤད་ཁོམ་དེ་མེད་མཁན།།
ལོ་གསར་བ་ཞིག་ཀྱང་བསུ་ཁོམ་དེ་མེད་མཁན།།
ལུས་རིན་ཆེན་ཕུལ་བའི་དཔའ་བོ་ཚོ་བསྟོད་དོ།།
རྩོམ་གསར། 10