བུ་སྣ་ཡུ། 2019-12-04
གྲོང་སྡེ་དུད་པས་བཅུད་པ།།
ཁྱེད་ལ་དགུན་ཁ་འབྱོར་དུས།།
ང་རང་ཡུལ་ལ་ལོག་མེད།།
སེམས་ལ་ཁ་བ་ཆགས་སོང་།།
ང་གཉིས་རི་ཆུས་བསྐལ་ཡོད།།
སྙིང་སྡུག་ཡར་ལུང་གཙང་པོ།།
སེམས་ཀྱི་དབུས་ལ་འཁྱིལ་རོགས།།
སྒྱིད་པུ་འགྲམ་གྱི་འོ་ཇ།།
མ་འཐུང་མི་ལོ་གཅིག་རེད།།
ཨ་མའི་ཡར་ཐོད་གཉེར་མས།།
བྱམས་པའི་དྲན་གདུང་མཚོན་ཡོང་།།
ཡིད་སེམས་ཁ་བའི་མདངས་རེད།།
ཉི་ནུབ་དམར་བོའི་ཕྱོགས་སུ།།
མིག་གིས་ལན་གསུམ་བལྟས་ཡོད།།
སྲོད་ཀ་སྒོ་ཁྱིའི་ཟུག་སྐད།།
སྐྱ་མོའི་རླུང་གིས་ཁྱེར་བ།།
ཁ་བའི་གསེབ་ཀྱི་གྲོང་སྡེ།།
རྨི་ལམ་གྲང་མོའི་ཐང་རེད།།
ལོ་ཟླ་དྲན་པས་སྲིང་དུས།།
རིང་དང་མི་རིང་མ་འབྲི།།
མི་ཡུལ་འུག་པ་ཁེར་འདུག།
ནམ་ཞོགས་གང་ལ་གནས་འཆའ།།
ཕ་ཡུལ།
ཕ་ཡུལ་ཐག་རིང་རྒྱང་རེད།།
རིང་ཡང་རིང་རྒྱུ་མི་འདུག
སེམས་པའི་ལོགས་སུ་ཡོད་འདུག།
ཉི་མ་ནུབ་ཁའི་ཕྱོགས་སུ།།
གོམ་པ་བརྒྱབ་ནས་ཆས་འདོད།།
ཁ་པར་ནང་གི་པར་ལ།།
བལྟས་པ་གྲངས་ཀྱིས་མི་ཚད།།
སེམས་ལ་ཡོད་པའི་གྲོང་སྡེ།།
ཉིན་དང་མཚན་ལ་བཀླགས་ཡོད།།
ཁ་པར་བཞུར་ཚད་འདྲ་བའི།།
སེམས་པའི་དྲན་གདུང་སྐྱ་བོ།།
ལ་ལུང་བརྒལ་ནས་ཤོར་འགྲོ།
རང་ལ་རང་དབང་མི་འདུག།
ཕ་ཡུལ་ཕ་ཡུལ་ཟེར་དུས།།
ཕ་མའི་རྒས་གཉེར་རིག་འོང་།།
གཉེན་ཉེའི་འཛུམ་རིས་དྲན་འོང་།།
ལོ་ཟླའི་གསེབ་ནས་བོར་བའི།།
གྲོགས་པོ་ཆུང་འདྲིས་རྣམ་པ།
ད་ཚོད་གང་དུ་ཡོད་པ།།
ང་ལ་གསལ་ཁ་མི་འདུག།
སེམས་ལ་དྲན་པ་ཡོད་འདུག།
རྩོམ་གསར། 10