སྐྱ་ཁྲ 2019-11-15
སྤྲིན་དཀར་གྱི་ཡང་སྟེང་དུ།
ཆུ་མིག་ཅིག་ཤག་ཤག་བཞུར་བའི་སྒྲ།
དྭངས་བསིལ་བསིལ་དུ་ངའི་མགྲིན་པ་བརྒྱུད་ནས།
རྩྭ་རྐང་གི་སྦུབས་སུ་འཐིམས་སོང་།
གནམ་ས་ངོས་སྦྱོར་གྱི་ལུང་པ།
འབྲོང་གི་གཤར་ལམ།
འབྲོང་ལ་བདག་པོ་རྒྱག་མཁན་དེ་སུ་རེད།
ཇག་པ་སྐོར་ཞིག་གིས་མདའ་གཞི་ཁུར་ནས་ས་ཆུ་བརྩད།
ལ་ནས་ཀི་བཏབ། ལུང་ནས་མེ་འབུད།
ཁ་དཀར་རྐྱང་ལ་ཁ་ལོ་བཏུལ་བ་ཉིན་ནས་བཟུང་སྟེ།
གེ་སར་ལ་རྟ་ཕོ་རྐྱང་ངེ་ཟེར་བ་ཞིག་ཡོད་སོང་བ་མིན་ནམ།
སོང་གིན་སོང་གིན་སྣང་བ་ཞིག་ལ།
སྐར་མ་གཞན་ཞིག་གི་སྟེང་དུ་སྤོ་བ་དང་འདྲ།
ཁ་བ་དཀར་བོའི་འཁྱགས་གྲང་།
མཚམས་དང་མཚམས་སུ་རླུང་གི་རྦ་རླབས།
རྒྱ་མཚོ་ཆེན་པོ་བསྒུལ་ནས་ཚེ་སྲོག་གི་ཁྲག་བྲུག
ས་སྟོང་རེ་ན་དགོ་བ་འགའ་རེ་བག་ཡངས་སུ་རྒྱུ་ཞིང་།
རི་སྤྱང་སྔོན་མོ་དང་འུར་རྡོ།
བྱ་རོག་གི་སྒྲོ་སྤུ་མཐུག་པོའང་ལོ་ཟླར་བརྡར་ནས་
ཟད་ཀྱིན་བདོག
སོང་གིན་སོང་གིན་རི་གླུ་སྙན་མོ་ཞིག་གྲག་འོང་།
ཝ་ཞྭ་གྱོན་པའི་བོད་དག་མ་ཞིག་རྫི་བོར་ཆས་བཞིན་ཡོད།
སོང་གིན་སོང་གིན་སྣང་བ་ཞིག་ལ།
ཕྱིར་ལོག་གིན་འདུག
གྲོང་ཁྱེར་གྱི་རྡོ་ཁང་མཐོན་པོ་དང་གད་སྙིགས།
མི་ཚོགས་ཀྱི་ཞེ་སྡང་དང་མི་གཞི།
ལྕི་ཨོང་འཐུ་བའི་ཨ་མ་རྒན་མོ་དེའི་འཁྲིས་སུ་བཅར་
གྱིན་འདུག
ཕྱིར་ལོག་གིན་འདུག
མྱགས་རུལ་གྱི་ཆུ་ཆེན་དང་ཟམ་པ།
གཙང་ཁྲུས་ལན་གཅིག་བྱ་ཆེད།
ཕྱིར་ལྡོག་གི་རྨི་ལམ་རྨི་བཞིན་རྨི་བཞིན།
ཕྱིར་ལོག་གིན་འདུག ཕྱིར་ལོག་གིན་འདུག
རྩོམ་གསར། 10