བྲན། 2019-08-02
སྤྱི་ལམ།
རང་བྱུང་བཞིན་གྱི་ཟླ་ཤེལ་མནྡ་ར།།
ལྷུན་གྲུབ་སྒྱུ་མའི་རོལ་བ་དམ་དུ་འཛིན།།
ངག་རིག་སྒྲ་དབྱངས་སྟོང་གི་འཁོར་ལོ་མ།།
ཀུན་དགའི་དྲན་པ་མྱོས་པའི་ཤིས་པ་སྩོལ།།
ལུས་ཀྱི་བྱི་དོར་ཕྱི་ནང་གསང་བའི་ངག།
ཡིད་ཀྱི་མཚོ་མོ་སྐྱོམ་པའི་རླབས་ལ་འཁུ།།
རང་གི་གཟུང་འཛིན་སེམས་ཀྱི་འཁྲི་ཤིང་ལ།།
འཁྱུད་པའི་ལས་སྐལ་ཕྱེ་ལེབ་གང་ལ་འཕུར།།
ནོར་བུའི་དྲ་ཕྱེད་འཕྱང་བའི་སྒེག་ལྡན་པར།།
སྲིད་གསུམ་སྐྱེངས་པས་བྲེད་ཤ་རྒོད་པ་ལྟར།།
རང་སྲིད་ཉམས་ལ་གདུང་བ་འཕེལ་ན་ཡང་།།
ཐབས་ཚུལ་མན་ངག་སྟོན་ལ་ཁྱེད་ཉིད་དཔའ།།
ཡིད་འོང་སྲེད་པ་འཕེལ་བའི་ཉ་རྒྱས་བཞིན།།
ཐུན་མཚམས་སར་བའི་རྨི་ལམ་དགའ་ཚལ་མར།།
འཕྲོས་པའི་ནང་གི་ཉམས་རྟོགས་ཀུ་མུད་ཚོགས།།
བཞད་རྗེས་འདབ་ལོ་ཤིག་ཤིག་འགུལ་བ་འདྲ།།
དཀར་དམར་མདངས་ཀྱིས་མཛེས་པའི་ཞལ་རས་ལ།།
ལན་བུ་ཤམ་ཤམ་གཡོ་བའི་མཛེས་སྡུག་གིས།།
གཅིག་ཏུ་མ་ངེས་ཀུན་རྫོབ་སེམས་ཀྱི་དབྱིངས།།
རོ་གཅིག་འཛིན་མེད་སྤྲིན་པའི་གོས་སུ་བགོས།།
དྲི་བསུང་ག་བུར་ལྡང་བའི་མ་ལ་ཡར།།
རྟག་ཏུ་གནས་མལ་འཆའ་བའི་རི་དྭགས་ལ།།
འཇབ་པའི་ཆོམ་པོ་ཇི་བཞིན་གང་ཞིག་ལ།།
སྲེད་པའི་བ་ཀུ་ལ་དེ་བཞད་པར་དཀའ།།
ལྔ་ཕྲག་ལྔ་ལྡན་ཁྱེའུ་འཛུམ་པའི་མིག།
ཅིག་ཅེར་སྙེམས་པ་གང་ལ་འགྲན་བཟོད་པའི།།
དཀྱུས་རིང་ཨུཏྤལ་གཡོ་ལྡན་བུང་བའི་མིག།
ཁྱེད་ལ་མངའ་བ་མ་ཡིན་ཅི་ཞིག་ལགས།།
ཕྱོགས་ཀྱི་འདུ་འགོད་བྲེལ་བས་དོན་མཐུན་དག།
རླབས་འགྲོས་སྐྱོམ་ལས་རང་གི་གྲུ་གཡོར་ལ།།
བརྟེན་ཏེ་རང་ཡུལ་བསྙེག་འདོད་ཆེ་ན་འང་།།
གཡོ་དང་སྒྱུ་མའི་ཕྱི་བཤོལ་བྱེད་འདི་ཅི།།
ལེགས་བཤད་བརྗོད་ལ་བློ་གྲོས་རབ་ཡངས་པ།།
དྲན་དབང་ཉིད་དོ་ཅོལ་ཆུང་ངག་ཚིག་མདའ།།
གང་གི་སྙིང་ལ་བསྣུན་པའི་ཀྱལ་ཀ་ནི།།
རྨོངས་པའི་ལས་སོ་མཁས་པ་སུ་ཞིག་ལགས།།
ལྡོག་ལམ།
བྱས་པ་སྔོན་གྱི་ཤིང་བལ་མེ་ཏོག་ཕོན།།
སྟོན་གྱི་རླུང་བུས་དབྱིངས་སུ་ཁྱེར་བ་བཞིན།།
ནང་གི་ཉོན་མོངས་བ་སྤུའི་ཕྲ་ཕུང་ལས།།
ཟག་པ་སྐད་ཅིག་འཕེལ་འདི་དངོས་པོའི་གཤིས།།
འོན་ཀྱང་གཉིས་སྦྱོར་རྩེ་དགའི་རོལ་བ་ནི།།
གདུང་བའི་ཡིད་ལ་འཐད་ན་གཞན་ཅི་སྨྲས།།
དེ་བས་གཡེལ་མེད་བྱ་ར་གཅེས་སོ་ཞེས།།
གསུང་གི་ཚད་མ་ཡིད་ལ་མི་འཐད་དམ།།
ཁྱད་པར་ན་ཆུང་སྙིང་གི་ལྡིང་ཁང་ལ།།
ཡིད་སྲུབ་ཞུགས་པའི་ཆོ་འཕྲུལ་སྟོན་པ་འདྲ།།
སྒྲེན་པོར་མིག་ལ་རྒྱུ་ཞིང་འཛེམ་མེད་དུ།།
ངག་ཚིག་མི་གཅིག་ན་ཡང་རྣམ་འགྱུར་རྒོད།།
ཟུར་གྱིས་འཛུམ་པ་པདྨའི་གེ་སར་ལ།།
བུང་བའི་མཆུ་དག་བསྣུན་པའི་མྱོང་བ་ནི།།
གསལ་བར་སྟོན་པ་འདིས་ཀྱང་ཁྱེད་ཉིད་ལ།།
འོ་བརྒྱལ་ག་ཙམ་བྱས་པ་བརྗོད་དུ་མེད།།
དེས་ན་སེམས་ངལ་གསོ་བའི་བར་སྟོང་ནས།།
བཙུན་པའི་གཟུགས་ཙམ་འཛིན་པ་གང་དེ་ཡིས།།
ནང་གི་རྣམ་རྟོག་ཚོར་བའི་དབྱངས་འགྲོས་ལ།།
བཅོལ་བའི་མཆིད་འདི་རྒྱང་གི་གྲོགས་ལ་འབུལ།།
རྩོམ་གསར། 10