2019-08-02
ལས་དང་སྨོན་ལམ་རྡོ་གཅལ་སྒྲིག་ལྟར་བྱས་ཏེ།།
ཚོགས་དྲུག་རལ་གྲི་གློ་ཤུབས་ནང་དུ་བཅུག་མོད།།
རབ་རིབ་འཚོ་བའི་ལམ་གྱི་སྐོམ་གདུང་ཆེན་པོས།།
བདག་ནི་རྒུད་པའི་མལ་དུ་བསྟུད་མར་བསྐྱལ་བྱུང་།།
རྐང་ཆུང་བཏེགས་པའི་ཤུལ་གྱི་རི་མོ་སྣ་ཚོགས།།
ང་ལ་ཡོད་ཀྱང་མེད་ཀྱང་སྙིང་པོ་མ་རེད།།
འདི་དང་ཕྱི་མའི་ཁ་རླངས་སིབ་སིབ་འཐིབ་པའི།།
ཁངས་འཁྱག་ཟོ་བའི་སྦུབས་ཀྱི་རྣམ་ཤེས་ཁྲ་ཁྲ།།
ངོས་ཀྱི་བར་སྣང་འདྲ་བའི་སྨིག་རྒྱུའི་སྒམ་དུ།།
ཕྱི་ཡི་འཛིང་རྩོད་མེད་ཀྱང་སྐྲ་ལོ་རྒས་སོང་།།
མི་རྟག་གོད་ཁ་འཚུབ་པའི་ལུས་ཀྱི་ཞལ་འབག།
ཆག་སྒོའི་ཟམ་དུ་བཅུས་པའི་ཉ་མོ་ཞིག་ཡིན།།
རླུང་དང་ཐེ་ཚོམ་འདྲེས་པའི་འཆི་འཕོའི་འོད་རླབས།།
མེ་སྟག་འཕྲོ་བའི་ཆུ་ལས་ཧང་ཧང་མཆེད་དེ།།
ཞེ་བློ་གཏད་སོ་མེད་པའི་ནམ་མཁའི་མཐོངས་ལ།།
རི་ཁའི་སྨུག་ཆུང་བཞིན་དུ་འཁྱིལ་ནས་འདུག་གོ།
ཅུང་ཟད་དམའ་བར་རྒྱུ་བའི་སྤྲིན་པ་དག་ནི།།
ང་དང་ལས་སྐལ་གཅིག་གི་འཕངས་པར་འདྲའོ།།
སྡེ་དགེའི་རྣོ་ངར།
རྩོམ་གསར། 10